16-Nöwetlik Uyghur yashlirini terbiyelesh kursi istanbulda axirlashti

Ixtiyariy muxbirimiz erkin tarim
2018.07.16
Share on WhatsApp
Share on WhatsApp
yashlarni-terbiyelesh-kursi-2018-turkiye.jpg 16-Nöwetlik Uyghur yashlirini terbiyelesh kursidin körünüsh. 2018-Yili 15-iyul, istanbul.
RFA/Erkin Tarim

16-Nöwetlik Uyghur yashlirini démokratiye we kishilik hoquq bilimliri bilen terbiyelesh kursi istanbulda axirlashti.

13-Iyuldin 15-iyulghiche istanbul ramada méhmanxanisida ötküzülgen kursta gérmaniye, bélgiye we türkiyedin teklip qilin'ghan mutexessisler “Sherqiy türkistan tarixi”, “Sherqiy türkistanning hazirqi ehwaligha nezer”, “Shimaliy amérikidiki Uyghur dawasidin melumat”, “Xelq'araliq Uyghur insan heqlirini qoghdash tirishchanliqimizgha omumiy nezer” dégendek témilarda doklat bergendin kéyin, kursqa ishtirak qilghan oqughuchilar bilen mezkur témilar toghrisida muzakire élip bérildi. Kursning axirqi küni guruppilar boyiche muzakire ötküzülüp, muzakire netijiliri otturigha qoyup ötüldi.

Kursning axirida yighin toghrisida tepsiliy köz qarishini igilesh üchün d u q yashlarni démokratiye we kishilik hoquqi bilimliri bilen terbiyelesh kursigha riyasetchilik qilghan pétér irwen ependi, d u q yashlar komitéti mudiri gheyyur qurban, d u q ijra'iye hey'iti re'isi ömer qanat ependi, kursqa türkiyening herqaysi uniwérsitétliridin kélip ishtirak qilghan Uyghur oqughuchilar bilen söhbet élip barduq.

Pétér irwén ependi istanbulda ötküzülgen kursning muweppeqiyetlik ötküzülgenlikini bayan qilip mundaq dédi: “Men 16-nöwetlik Uyghur yashlirini démokratiye we kishilik hoquq bilimliri bilen terbiyelesh kursigha mes'ul bolup keldim. Kursimiz burunqidikilerge oxshashla muweppeqiyetlik ötti dep qaraymen. Kurs jeryanida türkiyediki Uyghur yash aktiplar bilen tonushtum. Ular bilen Uyghur dewasini türkiyediki emeliy ehwalni asas qilip turup qandaq otturigha qoyush toghrisida muzakire élip barduq. D u q ning xelq'aradiki pa'aliyetliri toghrisida melumat berduq. Muweppeqiyetlik bir pa'aliyet boldi”.

Üch künlük kurs axirlashqandin kéyin mikrofonimizni d u q ijra'iye hey'iti re'isi ömer qanat ependige uzattuq. U, kursni xulasilep, bu qétimqi kursning alahidilikining qatnashqan yashlarning aktipchanliqining yuqiri bolushi, sanining köplüki ikenlikini bayan qildi.

D u q yashlar komitéti mudiri gheyyur qurban ependi kursqa ishtirak qilghan Uyghur yashlirining dawagha bolghan qiziqishidin nahayiti tesirlen'genlikini bayan qildi.

Gheyyur qurban üch künlük kurs jeryanida yashlar bilen söhbet élip bérish jeryanida d u q ni Uyghur yashlirigha yaxshi tonushturalmighanliqini chüshinip yetkenlikini bayan qildi.

Kursqa qatnashqan Uyghur pa'aliyetchi hesen abduraxman ependi kurs jeryanida Uyghur dewasini qilishning ussulini ögen'genlikini bayan qildi.

Uyghur yashlirini démokratiye we insan heq we hoquqliri bilimliri bilen terbiyelesh kursigha amérika qoshqa shtatliri, gérmaniye, we türkiyediki d u q ning bezi rehberliri we xadimliridin sirt, türkiyening herqaysi uniwérsitétlirida oquwatqan 40 Uyghur oqughuchi qatnashti. Uyghur yashlirini démokratiye we kishilik hoquqliri bilen terbiyelesh kursi tunji qétim türkiyede ötküzülgen bolup, burun amérika, gérmaniye, shiwétsiye, shwétsariye, bélgiye, norwégiye qatarliq döletlerde échilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.