38 Yashliq ana méhray jüme "Xata" téléfonni qobul qilghanliqi üchün "Terbiyelesh" te

Muxbirimiz shöhret hoshur
2018-02-20
Élxet
Pikir
Share
Print
Melum "Terbiyelesh merkizi" ning aldida posta turuwatqan saqchilar. 2017-Yili 3-noyabir, xoten.
Melum "Terbiyelesh merkizi" ning aldida posta turuwatqan saqchilar. 2017-Yili 3-noyabir, xoten.
AP Photo/Ng Han Guan

Melum bolushiche, Uyghur rayonida dawam qiliwatqan atalmish yépiq terbiye dolqunining heriket nishani barghanséri kéngeymekte. Ashkarilinishiche "Chékiti bar kishiler" yeni siyasiy jehettin gumanliq dep qarilip arxipigha chékit urulghan we tor arqiliq nazaretke élin'ghan kishilerla emes, bu kishiler bilen bilip yaki bilmey alaqe qilip qalghan kishilermu qamaqqa élinmaqta. Künes nahiyesining araltöpe yéza 1-kent ezasi, üch perzentning anisi 38 yashliq méhray jüme xitay j x tarmaqliri teripidin chékit urulghan qéyin'inisidin kelgen bir téléfonni qobul qilghanliqi üchün atalmish terbiyeleshke ekétilgen.

Künes nahiyesining araltöpe bazirigha qarita élip barghan téléfon ziyaritimiz dawamida, ahalilerdin biri araltöpining 1-kentidin "Terbiyelesh" ke ekitilgenler sanining eng köplükini bayan qildi. Biz 1-kent saqchi xadimi bilen körüshüsh üchün yéziliq saqchixanigha téléfon qilghinimizda, mezkur kent saqchisining bügün doxturxanigha ekitilgenliki ashkarilandi؛ emma saqchilar 1-kent saqchisining birer weqe seweblik yaki aghriq seweblik doxturxanigha ekitilgenliki heqqide melumat bermidi. Bezi ahaliler xizmet bésimining éghirliqi seweblik saqchi xadimliriningmu salametlikide mesile chiqiwatqanliqini tilgha alghan bolsimu, emma 1-kent saqchisining bügün néme üchün doxturxanigha apirilghanliqi melum emes.

Weziyettin xewerdar kishilerdin biri araltöpe bazar 1-kentidin xalighanche we sewebsiz tutqun qilin'ghanlardin biri, 3 balining anisi, a'ile ayali, 38 yashliq méhray jüme ikenlikini ashkarilidi.

Biz méhray jümening tutulghanliq uchurini delillesh üchün araltöpe bazarliq saqchixanigha qaytidin téléfon qilduq. Saqchi xadimi qolidiki arxipqa asasen, méhray jümening tutqunda ikenliki, künes beshtöpide atalmish "Terbiyelesh" te ikenlikini delillidi. Saqchixanining yene bir xadimimu, méhray jümeni özini tutqanliqi we saqchi mashinisigha sélip beshtöpige yolgha sélip qoyghanliqini bayan qildi.

Bu saqchi yene méhray jümening tutulushigha, saqchi organliri teripidin chékit qoyulghan qéyninisi teripidin urulghan bir téléfonning seweb bolghanliqini ashkarilidi.

Qol téléfonidiki intérnét arqiliq xewer-matériyallarni körüsh birqanche yildin béri Uyghur rayonida kishilerning qanunsiz matériyallarni körüsh bilen eyiblinip jazalinishigha seweb bolup kelgen, netijide bezi jaylarda yerlik emeldarlar ahalilerni awarigerchiliktin saqlinish üchün eqilliq téléfonni ishletmeslikke dewet qilghan idi. "Yépiq terbiyelesh merkezliri" kéngeytilgendin buyan téléfon ishlitishining özimu kishilerni xewp-xeterge yéqinlashturghan. Emma, Uyghur rayoni boyiche hazirgha qeder qanchilik sandiki kishining mana mushundaq atalmish xata téléfonni qobul qilghanliqi üchün tutulghan we solan'ghanliqi hazirche melum emes.

Toluq bet