"Chékiti bar" kishiler bilen alaqe qalghanlarmu jazalan'ghan

Muxbirimiz shöhret hoshur
2018-02-22
Élxet
Pikir
Share
Print
Héytgah meschiti aldida charlap yürgen saqchilar. 2017-Yili 4-noyabir, qeshqer.
Héytgah meschiti aldida charlap yürgen saqchilar. 2017-Yili 4-noyabir, qeshqer.
AP Photo/Ng Han Guan

Künes nahiyesining araltöpe yéza 1-kent ezasi nijat éli, saqchi organliri teripidin "Chékit" urulghan bir kishi bilen bir qétim birlikte tamaq yégen we bir méhmanxanida yatqanliqi üchünla künes beshtöpediki terbiyelesh merkizige ekétilgen.

Qaraqash nahiyesining yawa yéza pochtixana xadimi abduréhim ghappar, yézida "Chékiti bar" bir a'ilige bilmey tok tartip bergenliki üchün bir ay tutup turulghan we idarisining guwahliqtin ötüshi bilen terbiyeleshke élip kétilishtin aman qilghan.

Künesning araltöpe yézisida j x tarmaqliri teripidin "Chékit urulghan" qéyninisidin kelgen bir téléfonni qobul qilghanliqi üchün "Terbiyelesh merkizi" ge ekétilgen 38 yashliq a'ile ayali méhray jümening aqiwiti heqqide ehwal éniqlishimiz dawamida, bu yézida oxshash seweb bilen "Terbiyelesh" ke ekétilgen yene bir kishi heqqidimu uchurgha érishtuq.

Araltöpe yéza 1-kentidiki kompartiye ezasi we ayallar mudirining ashkarilishiche, yézida shopurluq bilen tirikchilik qiliwatqan nijat élimu, özining yeken sepiride "Chékiti bar" bir kishi bilen bir qétim birlikte tamaq yep salghanliqi we bir méhmanxanida yétip qalghanliqi üchün tutqun qilin'ghan we terbiyeleshke ekétilgen.

Mezkur ayallar mudiri, araltöpede "Chékiti bar" kishiler bilen alaqe qilghanliqi üchün terbiyeliniwatqanlar sanining xéli köplüki, emma xizmet mes'uliyet da'irisi seweblik, nijat éli alaqe qilghan "Chékiti bar" kishining kimliki we qilmishi heqqide melumati yoqluqini éytti.

Ashkarilinishiche, "Chékiti bar" kishiler bilen alaqe qilghanliqi üchün jazalan'ghan we jazaliniwatqanlar, Uyghur rayonining bashqa jayliridimu omumyüzlük mewjut.

Biz ötken yili qaraqash nahiyesining yawa yézisidiki bir saqchi xadimini ziyaret qilghan waqtimizda, yawa yéziliq pochta xadim abduréhim ghapparning "Chékiti bar" bir a'ilige tok tartip we téléwiziye qanili mulazimitini baghlap bergenliki üchün bir ayche tutup turulghanliqini ashkarilighan.

Melum bolushiche, abduréhim ghapparning xizmet orni uning mezkur a'ilining chékiti barliqidin xewersizlikini saqchixanigha tekrar-tekrar melum qilghan we guwahliqtin ötken. Netijide abduréhim ghappar "Yépiq terbiyelesh merkizi" ge élip kétilishtin aman qalghan.

Yene ashkarilinishiche, abduréhim ghappar tok tartip bergen téléwiziye qanili mulazimitini baghlap bergen mezkur a'ile, birer weqege qatnashqan emes, belki bir weqe sadir qilghuchi bilen dostluqi bolghanliqi üchünla arxipigha "Chékit" urulghan we "Chékit" urulghinighimu uzun bolmighan iken.

Nöwette Uyghur rayonidiki "Yépiq terbiyelesh merkezliri" de qanchilik kishi barliqini xitay da'iriliri izchil halda yoshurmaqta. Muhajirettiki Uyghur pa'aliyetchilerning beziliri bu sanning birqanche yüz ming ikenlikini bayan qilsa, yene beziliri bir milyondin artuq ikenlikini ilgiri sürmekte.

Muhajirettiki Uyghur közetküchilerning qarishiche, yuqiriqi ikki Uyghurning tutulush sewebi yeni "Chékiti bar" kishiler bilen alaqe qilghanliqi üchünla tutulushi, nöwette "Yépiq terbiyelesh merkezliri" ning qandaq tolduruluwatqanliqidin bir isharettur.

Toluq bet