Ghulja bayandayda zéhni ajiz henipe kérimmu yépiq lagérda “Terbiyelenmekte”

Muxbirimiz shöhret hoshur
2018.03.16
kocha-charlawatqan-xitay-esker.jpg Balisini kötürüp kétiwatqan Uyghur ayalning yénidin ötüp kétiwatqan xitay qoralliq eskerler. 2010-Yili 3-iyul, ürümchi.
AFP

Melum bolushiche, ghulja shehirining bayanday yézisida bu yil 35 yashqa kirgen, zéhni ajiz henipe kérimmu bir aydin béri ghulja shehiridiki atalmish “Terbiyilesh merkizi” de tutup turulmaqta. Muxbirimizning bu heqtiki éniqlashliri dawamida bayandaydiki alaqidar kent xadimliri henipe kérimning zéhni ajiz bolushigha qarimay “Terbiyilesh” ke ekétilgenlikini delillidi bolidu.

Melum bolushiche, ghulja shehirining bayanday yéza, 3-kent 5-mehellidiki zéhni ajiz 35 yashliq henipe kérimmu bir aydin béri ghulja shehiridiki yamachang “Terbiyilesh merkizi” de tutup turulmaqta. Radiyomizgha weziyettin xewerdar kishiler teripidin yetküzülgen bu uchur, 3-kent ahaliler komitéti xadimliri teripidinmu delillendi.

Kent amanliq mudiri özlirining henipe kérimning zéhni ajizliqidin xewiri barliqini, saqchilarning henipe kérimni tutushta uning salametlik ehwali bilen hésablashmighanliqini éytti.

Mehelle bashliqi henipe kérimning “Terbiyilesh lagéri” da ikenlikini delilligen bolsimu, emma uning tutulush sewebidin xewersiz ikenlikini bayan qildi. Uning déyishiche, nöwettiki dolqunda “Terbiyilesh” ke apiriliwatqanlarning tutulush sewebini peqet saqchi xadimliri bilidu. Bayanday yéziliq ayallar mudiri, henipening ilgiri bir qétim “Terbiyilesh” ke élip méngilish üchün tizimlikke kirgüzülgenliki, emma zéhni ajizliqi bayqalghandin kéyin qoyup bérilgenliki, emma mushu aydiki dolqunda uning salametlik ehwalining nezerge élinmighanliqini bayan qildi. Biz kent mudiri teminligen alaqe uchurigha asasen henipe kérimning a'ilisige téléfon qilduq. Ashkarilinishiche, henipe kérim tughulushidinla ajiz tughulghan bolup, 15 yash mezgilide zéhnidin pütünley adashqan we bir mehel dawalan'ghandin kéyin qismen yaxshilan'ghan.

Peqet bashlan'ghuch mektepning 3-sinipqichila oquyalighan henipe kérim nöwette sawatsiz we közi ajiz méyip bolup, bügün'ge qeder saqchi organlirining xatiriside uning héchqandaq jinayet tarixi we gumanliq qilmishi mewjut emes iken. Kent xadimlirining gépining oramidin melum bolushiche, herqaysi saqchi organliri özlirige chüshken san wezipisi bolghachqa, bu wezipini orundash üchün henipe kérimning méyipliki bilen hésablashmighan.

Weziyettin xewerdar kishining bayan qilishiche, bu “Yépiq terbiye” dolquni jinayi qilmishqa emes, milliy kimlikke qaritilghanliqi, Uyghur bolushning özila bu lagérgha bérishqa yéterlik shert hésablan'ghanliqi üchün henipe kérim zéhni ajiz bir ayal bolsimu, lékin bu lagérning chétide qalalmighan.

Programmining tepsilatini awaz ulinishidin anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.