Uyghur déhqanliri seper qilish üchün "4 Xil ispat" körsitip yol xéti élishqa mejbur bolmaqta

Muxbirimiz qutlan
2014-05-13
Élxet
Pikir
Share
Print
Uyghur élining jenubiy wilayetliridiki Uyghur déhqanliri bashqa yurtqa seper qilish üchün mejburiy béjiridighan yol xéti. 2014-Yili may.
Uyghur élining jenubiy wilayetliridiki Uyghur déhqanliri bashqa yurtqa seper qilish üchün mejburiy béjiridighan yol xéti. 2014-Yili may.
Oqurmen teminligen

Igilishimizche, Uyghur élining jenubiy wilayetliridiki Uyghur déhqanliri bashqa yurtqa seper qilish üchün "4 Xil ispat" teyyarlishi we shu asasta yol xéti béjirishi telep qilinmaqtiken.

Yéqinda shayar nahiyesining melum yézisidin ürümchige késel körsitish üchün chiqqan bir déhqan yerlik da'irilerning telipi boyiche yol xéti béjirgen. Uningda seper qilghuchining ismi, kimlik nomuri, seperge chiqish sewebi, alaqilishish téléfoni, barmaqchi bolghan jaydiki adrési, kim bilen körüshidighanliqi, körüshmekchi bolghan tughqini yaki munasiwetlik kishining ismi hemde téléfon nomuri qatarliq uchurlar toldurulghan. Yol xétining axirigha kent partiye yachéykisining tamghisi, kent sékrétarining imzasi we téléfon nomuri yézilghan.

Biz bu ishning tepsilati heqqide éniq uchurgha érishish üchün mezkur yol xétige imza qoyghan kent partiye sékritarigha téléfon qilduq.

U téléfonimizni qobul qilghan bolsimu, lékin téléfonning "Erkin asiya radi'osi" ning muxbiridin kelgenlikini uqqandin kéyin, bundaq ish yoq dep inkar qildi.

Biz radi'omiz tapshuruwalghan yol xétide uning imzasi we téléfon nomuri barliqini, uning kent sékrétari bolush süpiti bilen ré'alliqqa köz yummasliqini telep qilduq. U axirida bu ishning rastliqini étirap qildi.

Uning bildürüshiche, kenttin sirtqa chiqmaqchi bolghan herqandaq kishining aldi bilen "4 Xil ispat" teyyarlap yol xéti béjirishi kérekken. U buning kent yaki yézining qarari emes, belki yuqiri orunlardin kelgen buyruq ikenlikini tekitlidi.

U so'alimizgha jawab bérip mundaq dédi:
"Bu bizning kent yaki yézining öz aldigha chiqarghan qarari emes, belki yuqiridin kelgen buyruq. Biz peqet shu buyruqni ijra qiliwatimiz. Bizning kent yaki yéza tewesidin sirtqa chiqmaqchi bolghanlar yaki bashqa yurtlardin bizning bu yerge kélip turmaqchi bolghanlar aldi bilen '4 xil ispat' teyyarlishi kérek. Andin shu asasta ulargha yol xéti késilidu yaki waqitliq turush kinishkisi béjirip bérilidu."

U bizning yol xéti késishtiki meqset zadi néme dégen so'alimizgha "Qanunsiz qilmishlarning aldini élish, herqandaq kishining iz-dérikini alalaydighan bolush" dep jawab berdi.

U bizning "4 Xil ispat" heqqidiki so'alimizgha mundaq jawab berdi:
"4 Xil ispat dégende cheklen'gen ishlarni qilmighan yaki belgilimilerni buzmighan bolush (mesilen, diniy tüstiki kiyim-kécheklerni kiymigen yaki saqal qoymighan dégendek)؛ jazagha uchrimighan, tutup turulmighan yaki türmige kirip qalmighan bolush hemde pilanliq tughut siyasitige xilapliq qilip artuq baliliq bolmighan bolush dégendek shertler asasida kenttin, pilanliq tughutni bashqurush ishxanisidin, saqchixanidin we yéziliq hökümettin alghan ispatlarni körsitidu."

U yene bizning "Nawada saqal qoyghuchilar yaki uzun kiyim kiyip yüzini orighuchilar bolup qalsa, ulargha yol xéti bérilemdu?" dégen so'alimizgha mundaq jawab berdi:
"Ulargha saqal qoyma, chüshürüwet dep idiyiwi xizmet ishleymiz. Ayallarghimu diniy tüstiki kiyim-kécheklerni kiymeslikke nesihet qilimiz. Ularni özgertip andin yol xéti késip bérimiz."

U ziyaritimiz axirida yene munularni tekitlidi:
"Hazir weziyet jiddiy, biz dawamliq charlap tekshürüp turimiz. Elwette, ishlepchiqirishni yaxshi élip bérish üchün muqimliqni saqlimisaq yaki özimizni özimiz qoghdimisaq bolmaydu-de! hazir kéche-kündüz kentimizde xelq saqchiliri bilen yardemchi saqchilar charlash élip baridu, bezide kent ammisinimu seperwer qilimiz. Yéza we nahiyedin kélip charlaydighan saqchilarmu bar. Ehwalimiz shu."

Tepsilatini awaz ulinishtin anglighaysiz.

Toluq bet