Süküttiki sada: ijtima'iy taratqularda "#Uyghurlargha qulaq sélinglar" namliq pa'aliyet qanat yaymaqta

Ixtiyariy muxbirimiz jewlan
2020-04-28
Élxet
Pikir
Share
Print
"#Hear Uyghurs" (Uyghurlargha qulaq sélinglar) namliq xeshteg pa'aliyitini bashlighan Uyghur pa'aliyetchi arslan hidayet ependi.
"#Hear Uyghurs" (Uyghurlargha qulaq sélinglar) namliq xeshteg pa'aliyitini bashlighan Uyghur pa'aliyetchi arslan hidayet ependi.
Social Media

Yéqinqi künlerde tiwittér qatarliq ammiwi taratqularda chet'elde yashawatqan Uyghurlarning awazsiz widéyo ishlep, xelq'ara jama'etni Uyghurlarni qutquzushqa ündewatqanliqi yaki lagérlargha qamaqliq ata-anisi we uruq-tughqanliri heqqide guwahliq bériwatqanliqi melum bolmaqta. Bu widéyolarning köpinchisi tiwittérda "#He'ar Uyghurs" (Uyghurlargha qulaq sélinglar) namliq xeshteg astida tarqitilghan.

Hazir behreynde turushluq Uyghur pa'aliyetchi arslan hidayet bu teshwiqatning bashlamchisi bolup, bu yil 20-aprél özining tiwittér hésabida 31 sékuntluq bir widéyo élan qilghan. U bu widéyoda xelq'arani Uyghurlargha köngül bölüshke, heriketlik isharetler bilen Uyghurlarning nidasigha qulaq sélishqa chaqirghan. Bu widéyo 32 ming qétim körülgen bolup, 340 qétim hembehirlen'gen.

U widéyoning astigha izahat bérip: "Deydighan nurghun geplirim bar, emma bu yerde awazim yoq. Dunyagha awazimni anglitip Uyghurlarni qutquzuwélinglar dédim, lékin ular anglimaywatqandek qilidu. Bu widéyoda birer mesile yoq, emma dunyada mesile bar," dégen.

U ziyaritimizni qobul qilip, bu pa'aliyetni bashlashtiki seweblerni chüshendürdi. U Uyghurlar nechche yildin béri shunche guwahliqlarni bérip, shunche namayishlarni qilip kéliwatqan bolsimu, emma xelq'araning buninggha yéterlik köngül bölmigenlikini, bolupmu b d t kishilik hoquq kéngishining bu mesilige sel qarighanliqini, yene kélip bu kéngeshke yéqinda bir xitay emeldarni wezipige qoyghanliqini, shunga uninggha bu usulda naraziliq bildürüshni oylighanliqini bildürdi.

U yene korona wirusi tarqalghandin kéyin Uyghur mesilisining untulup qéliwatqanliqini, dewa ishlirini bu xil yéngiche usulda élip barghanda ünümi yaxshi bolidighanliqi we téximu köp kishilerni bu pa'aliyetke élip kirgili bolidighanliqini éytti.

Amérikada turushluq pa'aliyetchi, Uyghur herikiti teshkilatning re'isi roshen abbas xanimmu bu pa'aliyetni qollighan. U 19-aprél özining tiwittér hésabida hedisi gülshen abbas heqqide awazsiz widéyo guwahliqi bergen bolup, uninggha: "Men dunyagha derdimni anglitip keldim. Méni hazir anglawatamsiler?" dep izahat bergen.

Ziyaritimizni qobul qilghan roshen abbas xanim xelq'aragha yillardin béri sözlep anglitalmighan derd-elemlerni bu qétim awazsiz körsitip béqish üchün bu pa'aliyetke qétilghanliqini bildürdi.

Türkiyede oquwatqan tursunjan ablet awazsiz guwahliq bergüchilerdin biri bolup, u bu heqtiki ziyaritimizni qobul qilip, singlisi aygül ablet lagérgha solan'ghandin kéyin taratqularda izchil türde uni qutuldurush üchün tirishiwatqanliqini bildürdi.

Tiwittérdiki "Uyghurlargha qulaq sélinglar" namliq xeshtegde körülüshiche, bu xeshteg astida élan qilin'ghan awazsiz guwahliq widéyosi 20 ge yéqinliship qalghan. Guwahliq bergüchiler lagérgha solan'ghan qérindashlirining süritini körsitip, ima-isharet we qayghuluq chiray ipadisi bilen dunyagha muraji'et qilghan. Ularning bu widéyogha izahat bérip tekitlimekchi bolghini "Dunya bizge qulaq salmaywatidu!" dégendin ibaret bolghan.

Roshen abbas xanimning qarishiche, dunya eger Uyghurlarning awazigha baldurraq qulaq salghan bolsa, xitay wabasigha, xitayning apetlirige sel qarimighan, héch bolmisa idiye jehette teyyarliq qilalighan bolatti. Shundaq bolsimu, Uyghurlar xitayni dawamliq pash qilishi, weten we millet dewasini her xil yollar arqiliq kücheytishi kérek iken.

Pakitlardin melumki, xitay 2017-yil 4-aydin bashlap ta hazirghiche 3 milyondin artuq Uyghur we bashqa musulman milletlerni lagérlargha qamighan bolup, bularning ichide chet'elde yashawatqan Uyghurlarning ata-aniliri we uruq-tughqanliri bar. Muhajirettiki Uyghurlar üch yildin béri uruq-tughqanliri heqqide guwahliq bérip kelgen. Bu qétim awazsiz guwahliq bergüchiler ene shularning bir qismi bolup, ularning bildürüshiche, bu qétimqi awazsiz guwahliq bérish dewa ishliridiki yéngi sinaq hemde Uyghurlarni qutquzush herikitining bir qismi iken.

Toluq bet