«Тарим тори» - муһаҗирәттики уйғур яшлири үчүн бир көврүктур

Мухбиримиз сада
2019-07-22
Елхәт
Пикир
Share
Принт
Уйғур яшлардин мунәввәр абдуллаһ вә зулпиқар абликим ниң бирликкә келиши нәтиҗисидә вуҗудқа кәлгән бир торбәтниң башбети.
Уйғур яшлардин мунәввәр абдуллаһ вә зулпиқар абликим ниң бирликкә келиши нәтиҗисидә вуҗудқа кәлгән бир торбәтниң башбети.
thetarimnetwork.com

Уйғур мәдәнийити хитай һөкүмити тәрипидин «заманға маслашмиған, қалақ бир мәдәнийәт» дәп тәшвиқ қилиниватқан болса, уйғур сәрхиллири «ашқун идийәниң тәсиригә учриған», «дөләтни парчилашқа урунған» дегәндәк намлар билән җазаланмақта. Пүткүл уйғур миллити һаят-маматлиқ бир еғир киризискә дуч кәлмәктә. Мушундақ бир әһвал астида муһаҗирәттә туғулған вә кичикидин чәтәлләрдә чоң болған уйғур яшлириниң уйғурларниң тарихи, мәдәнийитини билиши вә тил-йезиқини қоллиниши җиддий зөрүр болмақта.

Мушу мунасивәт билән муһаҗирәттики даңлиқ университетларда вә башқа һөкүмәт органлирида хизмәт қилидиған уйғур яшлар уйғурларниң нөвәттики әһвалини дуняға аңлитиш вә муһаҗирәттә яшайдиған уйғурларниң уюшушчанлиқини илгири сүрүш йолида өзиниң бир кишилик төһписини қошушқа қарап йүзләнмәктә. 2019-Йили май ейида қурулған «тарим тори» дәл мушу тиришчанлиқларниң мәһсулидур.

«Тарим тори» нөвәттә америкадики даңлиқ университетлардин «харвард университети» да тәтқиқатчи болуп ишләватқан мунәввәр абдуллаһ вә әнгилийәниң пайтәхти лондондики төт чоң боғалтирлиқ оргининиң бири болған KPMG ширкитиниң малийә бөлүмидә хизмәт қилидиған зулпиқар абликим қатарлиқ икки уйғур яшниң бирликкә келиши нәтиҗисидә вуҗудқа кәлгән бир тор бекәттур.

Игилинишичә, мунәввәр абдуллаһ вә зулпиқар абликим иккийлән 2018-йилниң алдинқи мәзгиллири уйғур миллий музикилири асасида ишлинидиған программиларниң уйғурлар мәсилисини башқиларға тонутуштики муһим бир усул икәнликини һес қилған. Бу һәқтә тохтимастин издиниш нәтиҗисидә 2019-йили майда «тарим тори» вә «тарим параңлири» ни қуруп чиққан.

«Тарим тори» да һәрқайси дөләтләрдә яшаватқан уйғурлардин охшаш пикирдикилириниң өз-ара тонушуп бир коллектип болуп шәкиллиниши вә шу арқилиқ уйғур яшлириниң уйғур мәдәнийити вә миллий кимликини тонуп йетишигә пурсәт яритип бериш асасий мәқсәт қилинған.

Мәзкур тор бекәтниң тәпсилати һәққидә зияритимизни қобул қилған мунәввәр абдуллаһ «тарим тори» ниң уйғур яшлириниң бирликтә алға илгирилишидики йетәклигүчи күч болалайдиғанлиқини сөзләп өтти.

«Тарим тори» ниң йәнә бир алаһидә программиси болған «тарим параңлири» намлиқ радийо программисида муһаҗирәттә яшайдиған, оқушта вә кәсиптә утуқ қазанған уйғур яшлириниң иш-излири тонуштурулуш арқилиқ башқиларға илһам бериш вә өз-ара тәҗрибә алмаштуруш асасий нишан қилинған икән.

«Тарим параңлири» ниң риясәтчиси зулпиқар абликим зияритимизни қобул қилип, мәзкур радийо программиси һәққидә тәпсилий тохталди. Униң билдүрүшичә, бу программа уйғурларниң бир-бирини тонуши үчүн бир көврүк болалайдикән.

«Тарим параңлири» енгилиз тилида елип берилидиған радийо программиси болуп, бу әһвал муһаҗирәттики уйғурларға «немә үчүн өз ана тилини ишләтмәйду» дегән соални пәйда қиливатқанлиқи мәлум. Мунәввәр абдуллаһ зиярәт давамида бу һәқтә тәпсилий чүшәнчә бәрди. Униң дейишичә, программа енгилиз тилида елип берилса, чәтәлликләрниму уйғурларниң әһвалидин хәвәрдар қилғили болидикән.

Пикирләр (0)
Share
Толуқ бәт