"Tarim tori" - muhajirettiki Uyghur yashliri üchün bir köwrüktur

Muxbirimiz sada
2019-07-22
Élxet
Pikir
Share
Print
Uyghur yashlardin munewwer abdullah we zulpiqar ablikim ning birlikke kélishi netijiside wujudqa kelgen bir torbetning bashbéti.
Uyghur yashlardin munewwer abdullah we zulpiqar ablikim ning birlikke kélishi netijiside wujudqa kelgen bir torbetning bashbéti.
thetarimnetwork.com

Uyghur medeniyiti xitay hökümiti teripidin "Zaman'gha maslashmighan, qalaq bir medeniyet" dep teshwiq qiliniwatqan bolsa, Uyghur serxilliri "Ashqun idiyening tesirige uchrighan", "Döletni parchilashqa urun'ghan" dégendek namlar bilen jazalanmaqta. Pütkül Uyghur milliti hayat-mamatliq bir éghir kiriziske duch kelmekte. Mushundaq bir ehwal astida muhajirette tughulghan we kichikidin chet'ellerde chong bolghan Uyghur yashlirining Uyghurlarning tarixi, medeniyitini bilishi we til-yéziqini qollinishi jiddiy zörür bolmaqta.

Mushu munasiwet bilen muhajirettiki dangliq uniwérsitétlarda we bashqa hökümet organlirida xizmet qilidighan Uyghur yashlar Uyghurlarning nöwettiki ehwalini dunyagha anglitish we muhajirette yashaydighan Uyghurlarning uyushushchanliqini ilgiri sürüsh yolida özining bir kishilik töhpisini qoshushqa qarap yüzlenmekte. 2019-Yili may éyida qurulghan "Tarim tori" del mushu tirishchanliqlarning mehsulidur.

"Tarim tori" nöwette amérikadiki dangliq uniwérsitétlardin "Xarward uniwérsitéti" da tetqiqatchi bolup ishlewatqan munewwer abdullah we en'giliyening paytexti londondiki töt chong boghaltirliq orginining biri bolghan KPMG shirkitining maliye bölümide xizmet qilidighan zulpiqar ablikim qatarliq ikki Uyghur yashning birlikke kélishi netijiside wujudqa kelgen bir tor békettur.

Igilinishiche, munewwer abdullah we zulpiqar ablikim ikkiylen 2018-yilning aldinqi mezgilliri Uyghur milliy muzikiliri asasida ishlinidighan programmilarning Uyghurlar mesilisini bashqilargha tonutushtiki muhim bir usul ikenlikini hés qilghan. Bu heqte toxtimastin izdinish netijiside 2019-yili mayda "Tarim tori" we "Tarim parangliri" ni qurup chiqqan.

"Tarim tori" da herqaysi döletlerde yashawatqan Uyghurlardin oxshash pikirdikilirining öz-ara tonushup bir kolléktip bolup shekillinishi we shu arqiliq Uyghur yashlirining Uyghur medeniyiti we milliy kimlikini tonup yétishige purset yaritip bérish asasiy meqset qilin'ghan.

Mezkur tor béketning tepsilati heqqide ziyaritimizni qobul qilghan munewwer abdullah "Tarim tori" ning Uyghur yashlirining birlikte algha ilgirilishidiki yétekligüchi küch bolalaydighanliqini sözlep ötti.

"Tarim tori" ning yene bir alahide programmisi bolghan "Tarim parangliri" namliq radiyo programmisida muhajirette yashaydighan, oqushta we kesipte utuq qazan'ghan Uyghur yashlirining ish-izliri tonushturulush arqiliq bashqilargha ilham bérish we öz-ara tejribe almashturush asasiy nishan qilin'ghan iken.

"Tarim parangliri" ning riyasetchisi zulpiqar ablikim ziyaritimizni qobul qilip, mezkur radiyo programmisi heqqide tepsiliy toxtaldi. Uning bildürüshiche, bu programma Uyghurlarning bir-birini tonushi üchün bir köwrük bolalaydiken.

"Tarim parangliri" én'giliz tilida élip bérilidighan radiyo programmisi bolup, bu ehwal muhajirettiki Uyghurlargha "Néme üchün öz ana tilini ishletmeydu" dégen so'alni peyda qiliwatqanliqi melum. Munewwer abdullah ziyaret dawamida bu heqte tepsiliy chüshenche berdi. Uning déyishiche, programma én'giliz tilida élip bérilsa, chet'elliklernimu Uyghurlarning ehwalidin xewerdar qilghili bolidiken.

Toluq bet