Телефондики учурлири сәвәблик әр-аял магистирлар вә туғқанлири түрмигә соланған

Мухбиримиз меһрибан
2020-09-01
Елхәт
Пикир
Share
Принт
Телефондики учур сәвәблик 13 йиллиқ кесилгән, японийәдә магистирлиқ оқуған абдувәли миҗит вә униң аяли, 12 йиллиқ кесилгән түркийә ғази университетниң магистир аспиранти айгүл ели.
Телефондики учур сәвәблик 13 йиллиқ кесилгән, японийәдә магистирлиқ оқуған абдувәли миҗит вә униң аяли, 12 йиллиқ кесилгән түркийә ғази университетниң магистир аспиранти айгүл ели.
Oqurmen teminligen

Радийомиз игилигән әһваллардин мәлум болушичә, 2011-йили түркийә ғази университетида оқуш мукапатиға еришип магистирлиқ оқуған айгүл ели, 2016-йили оқуш пүттүргәндин кейин, японийәдә компютер кәспидә магистирлиқ оқушини тамамлиған ери абдувәли миҗит билән бирликтә үрүмчигә қайтип кәткәндин кейин тутқун қилинип, 10 йилдин артуқ кесилгән. Мәлум болушичә, уларниң тутқун қилинишиға ери абдувәли миҗитниң телефонидин чиққан учур сәвәб болған болуп, бу аилә кишилиридин һазирға қәдәр 5 киши түрмидә икән.

Айгүл ели вә ери абдувәли миҗитни йеқиндин билидиған достлиридин, нөвәттә түркийәдә туруватқан дилбәр әсәт ханим зияритимизни қобул қилип, түркийәдә оқуш биләнла болған бу әр-аялниң түркийәдики мәзгили вә уларниң үрүмчигә қайтқандин кейин тутқун қилинғанлиқи һәққидә өзи билидиған әһвалларни төвәндикидәк баян қилди.

Дилбәр ханим тәминлигән әһваллардин мәлум болушичә, айгүл ели вә униң ери абдувәли миҗит һәр иккийлән ғулҗа қорғас наһийә сүйдүң базар парлақ кәнтидин. Айгүл ели 2011-йили түркийә ғази университетида оқуш мукапатиға еришип магистирлиқ оқуши үчүн кәлгән. Униң йолдиши абдувәли миҗит японийәдә университетта толуқ курс вә магистирлиқ оқушини тамамлап, 2013-йили айгүл ели билән той қилғандин кейин, 2016-йили айгүл елиниң оқуши түгигәнгә қәдәр түркийәдә яшиған. Улар қайтип кәткәндин кейин үрүмчидә абдувәли миҗитниң иниси абдусәмәт миҗитниң өйидә туруп әр-аял иккиси үрүмчидики қәшқәрлик тиҗарәтчиләр ачқан шәхси ширкәтләрдә ишлигән. Әмма узунға қалмай уларниң түркийәдики достлири әр-аял иккийләнниң илгири-ахир болуп 2016-йили йил ахири вә 2017-йили тутқун қилинип лагерға қамалғанлиқи һәм кейинчә лагер ичидила һөкүм елан қилинип 10 йилдин артуқ кесилгәнлик хәвирини алған.

Айгүл ели вә униң ери абдувәлини йеқиндин билидиған тонушлиридин һазирчә өз кимликини ашкарилашни халимиған йәнә бир ханимму зияритимизни қобул қилди.

Униң билдүрүшичә, у айгүл ели үрүмчигә кәткән дәсләпки мәзгилләрдә униң билән үндидарда алақилишип турған. Айгүл ели униңға ери абдувәли миҗитниң 2016-йили 11-ай мәзгилидә «телефонда гуманлиқ учур бар» дегән баһанидә тутқун қилинғанлиқини билдүргән. Айгүл ели йәнә йолдиши 13 йиллиқ кесилип, ғулҗа күнәстики қара буғра түрмисигә қамалғанлиқи үчүн өзиниң үрүмчидики хизмитидин истепа берип қорғас сүйдүк базириға кәткәнликини, қорғас 5-оттура мәктәптә бир мәзгил боғалтирлиқ хизмити қилғанлиқини әйни чағда үндидар арқилиқ түркийәдики достлириға ейтқаникән.

Бу ханимниң билдүрүшичә, бирнәччә айдин кейин, униң айгүл ели билән болған алақисиму туюқсиз үзүлгән. 2018-Йили у ғулҗадики тонушлардин давамлиқ сүрүштүрүш арқилиқ, айгүл елиниңму 2017-йили ғулҗа қорғаста тутқун қилинғанлиқ хәвирини алған. У әр-аял һәр иккийләнниң 10 йилдин юқири кесилип чоң түрмә дәп атилидиған ғулҗа күнәстики қара буғра түрмисигә қамалғанлиқини, бу яш әр-аялниң техи йешиға йәтмигән бовақ балисиниң ғулҗа қорғастики яшанған қейнанисиниң беқишида қалғанлиқи һәққидә ишәнчлик учур алған.

Бу ханим йәнә 2019-йили айгүл елиниң ери абдувәли миҗитниң телефонида чиққан учур сәвәблик бу бир аилә кишилиридин илгири-кейин болуп, абдувәли миҗитниң иниси абдусәмәт миҗит, дадиси миҗит әпәнди вә иниси абдусәмәтниң аяли шәһрибан қатарлиқларниңму тутқун қилинғанлиқини билдүрди.

Униң билдүрүшичә, у абдувәлиниң иниси абдусәмәт, дадиси миҗит әпәндигә 12 йиллиқ қамақ җазаси һөкүми елан қилинип, улар сиясий җинайәтчиләр қамилидиған чоң түрмә, йәни ғулҗа күнәстики қара буғра түрмисигә қамалған. Абдусәмәтниң аяли шәһрибанниң аввал қорғастики лагерға қамилип, кейин қорғастики мәлум лагер ичидики завутта мәҗбурий әмгәккә селинғанлиқи һәққидә учур алған.

Пикирләр (0)
Share
Толуқ бәт