Téléfondiki uchurliri seweblik er-ayal magistirlar we tughqanliri türmige solan'ghan

Muxbirimiz méhriban
2020-09-01
Élxet
Pikir
Share
Print
Téléfondiki uchur seweblik 13 yilliq késilgen, yaponiyede magistirliq oqughan abduweli mijit we uning ayali, 12 yilliq késilgen türkiye ghazi uniwérsitétning magistir aspiranti aygül éli.
Téléfondiki uchur seweblik 13 yilliq késilgen, yaponiyede magistirliq oqughan abduweli mijit we uning ayali, 12 yilliq késilgen türkiye ghazi uniwérsitétning magistir aspiranti aygül éli.
Oqurmen teminligen

Radiyomiz igiligen ehwallardin melum bolushiche, 2011-yili türkiye ghazi uniwérsitétida oqush mukapatigha ériship magistirliq oqughan aygül éli, 2016-yili oqush püttürgendin kéyin, yaponiyede kompyutér kespide magistirliq oqushini tamamlighan éri abduweli mijit bilen birlikte ürümchige qaytip ketkendin kéyin tutqun qilinip, 10 yildin artuq késilgen. Melum bolushiche, ularning tutqun qilinishigha éri abduweli mijitning téléfonidin chiqqan uchur seweb bolghan bolup, bu a'ile kishiliridin hazirgha qeder 5 kishi türmide iken.

Aygül éli we éri abduweli mijitni yéqindin bilidighan dostliridin, nöwette türkiyede turuwatqan dilber es'et xanim ziyaritimizni qobul qilip, türkiyede oqush bilenla bolghan bu er-ayalning türkiyediki mezgili we ularning ürümchige qaytqandin kéyin tutqun qilin'ghanliqi heqqide özi bilidighan ehwallarni töwendikidek bayan qildi.

Dilber xanim teminligen ehwallardin melum bolushiche, aygül éli we uning éri abduweli mijit her ikkiylen ghulja qorghas nahiye süydüng bazar parlaq kentidin. Aygül éli 2011-yili türkiye ghazi uniwérsitétida oqush mukapatigha ériship magistirliq oqushi üchün kelgen. Uning yoldishi abduweli mijit yaponiyede uniwérsitétta toluq kurs we magistirliq oqushini tamamlap, 2013-yili aygül éli bilen toy qilghandin kéyin, 2016-yili aygül élining oqushi tügigen'ge qeder türkiyede yashighan. Ular qaytip ketkendin kéyin ürümchide abduweli mijitning inisi abdusemet mijitning öyide turup er-ayal ikkisi ürümchidiki qeshqerlik tijaretchiler achqan shexsi shirketlerde ishligen. Emma uzun'gha qalmay ularning türkiyediki dostliri er-ayal ikkiylenning ilgiri-axir bolup 2016-yili yil axiri we 2017-yili tutqun qilinip lagérgha qamalghanliqi hem kéyinche lagér ichidila höküm élan qilinip 10 yildin artuq késilgenlik xewirini alghan.

Aygül éli we uning éri abduwelini yéqindin bilidighan tonushliridin hazirche öz kimlikini ashkarilashni xalimighan yene bir xanimmu ziyaritimizni qobul qildi.

Uning bildürüshiche, u aygül éli ürümchige ketken deslepki mezgillerde uning bilen ündidarda alaqiliship turghan. Aygül éli uninggha éri abduweli mijitning 2016-yili 11-ay mezgilide "Téléfonda gumanliq uchur bar" dégen bahanide tutqun qilin'ghanliqini bildürgen. Aygül éli yene yoldishi 13 yilliq késilip, ghulja künestiki qara bughra türmisige qamalghanliqi üchün özining ürümchidiki xizmitidin istépa bérip qorghas süydük bazirigha ketkenlikini, qorghas 5-ottura mektepte bir mezgil boghaltirliq xizmiti qilghanliqini eyni chaghda ündidar arqiliq türkiyediki dostlirigha éytqaniken.

Bu xanimning bildürüshiche, birnechche aydin kéyin, uning aygül éli bilen bolghan alaqisimu tuyuqsiz üzülgen. 2018-Yili u ghuljadiki tonushlardin dawamliq sürüshtürüsh arqiliq, aygül éliningmu 2017-yili ghulja qorghasta tutqun qilin'ghanliq xewirini alghan. U er-ayal her ikkiylenning 10 yildin yuqiri késilip chong türme dep atilidighan ghulja künestiki qara bughra türmisige qamalghanliqini, bu yash er-ayalning téxi yéshigha yetmigen bowaq balisining ghulja qorghastiki yashan'ghan qéynanisining béqishida qalghanliqi heqqide ishenchlik uchur alghan.

Bu xanim yene 2019-yili aygül élining éri abduweli mijitning téléfonida chiqqan uchur seweblik bu bir a'ile kishiliridin ilgiri-kéyin bolup, abduweli mijitning inisi abdusemet mijit, dadisi mijit ependi we inisi abdusemetning ayali shehriban qatarliqlarningmu tutqun qilin'ghanliqini bildürdi.

Uning bildürüshiche, u abduwelining inisi abdusemet, dadisi mijit ependige 12 yilliq qamaq jazasi hökümi élan qilinip, ular siyasiy jinayetchiler qamilidighan chong türme, yeni ghulja künestiki qara bughra türmisige qamalghan. Abdusemetning ayali shehribanning awwal qorghastiki lagérgha qamilip, kéyin qorghastiki melum lagér ichidiki zawutta mejburiy emgekke sélin'ghanliqi heqqide uchur alghan.

Toluq bet