Тәләт өмәрҗаноғлиниң вапати муһаҗирәттики уйғурларни қайғуға чөмдүрди

Ихтиярий мухбиримиз әркин тарим
2020-05-28
Елхәт
Пикир
Share
Принт
Мәрһум тәләт өмәрҗаноғли әпәнди һаят мәзгилидә пәрзәнтлири өткүзүп бәргән туғулған күнидә.
Мәрһум тәләт өмәрҗаноғли әпәнди һаят мәзгилидә пәрзәнтлири өткүзүп бәргән туғулған күнидә.
RFA/Erkin Tarim

Тәләт өмәрҗаноғли 27-май күни әтигән саәт 6 йеримда дублин «маттер привате» дохтурханисида йүрәк кесили түпәйлидин давалаш үнүм бәрмәй аләмдин өткән.

Дуня уйғур қурултийиниң ерландийәдики вәкили тәләт әпәндиниң вапат болғанлиқ хәвири муһаҗирәттики уйғурларни қаттиқ қайғуға чөмдүрди.

Тәләт өмәрҗаноғли 1960-йили 5-айниң 5-күни ғулҗа шәһиридә дуняға кәлгән болуп, 2006-йили ерландийәгә келип сиясий панаһлиқ тиләп, олтурақлишип қалған. У чәтәлгә һиҗрәт қилип чиққандин буян уйғур мустәқиллиқ һәрикитини изчил түрдә актип қоллап кәлгән вә дуня уйғур қурултийи тәрипидин явропада өткүзүлгән бирләшмә намайишларға иштирак қилипла қалмай, д у қ ниң барлиқ чақириқлириға актиплиқ билән аваз қошуп кәлгәниди.

Униң вапатидин кейинла 27-май күни дуня уйғур қурултийи рәиси долқун әйса әпәнди иҗтимаий таратқулар арқилиқ бу һәқтә баянат елан қилип, мәрһум тәләт өмәрҗаноғли әпәндигә аллаһдин рәһмәт вә аилисидикиләргә сәбир тиләш билән биргә, «уйғур хәлқиниң мунәввәр оғлани мәрһум тәләт әпәндиниң шәрқий түркистан миллий мустәқиллиқ күриши үчүн көрсәткән пидакарлиқини уйғур хәлқи һәр вақит иптихарлиниш туйғуси ичидә яд етиду» тәкитлиди.

Д у қ рәиси долқун әйса әпәнди тәләт өмәрҗаноғлиниң уйғурларниң мустәқиллиқ һәрикити үчүн зор хизмәт көрсәткән киши икәнлики, уйғурларниң мәңгү яд етидиғанлиқини тәкитлиди.

Тәләт өмәрҗаноғлиниң йеқин дости җалал йүсүпоғли әпәнди униң билән д у қ ниң шиветсийә, германийә вә японийәдики паалийәтлиригә иштирак қилғанлиқини, уйғур даваси үчүн зор төһпиләрни қошқан киши икәнликини билдүрди.

У, тәләт өмәрҗаноғли 2012-йилидин тартип дублиндики уйғурларниң йигит беши болғанлиқини, ерландийәдә хитайға қарши нурғун паалийәтләрни елип барғанлиқини баян қилди.

Тәләт өмәрҗаноғлиниң 2 қиз, 1 оғли вә 6 нәвриси бар икән.

Пикирләр (0)
Share
Толуқ бәт