Бирунейда өткән яш өсмүрләр мусабиқисидә уйғурларму утуқ қазанди

Ихтиярий мухбиримиз ойған
2019-09-10
Елхәт
Пикир
Share
Принт
Өмәрҗан идиллайеф шагиртлири фарингиз ғопурова вә илһам ғаппароф билән. 2019-Йили 22-авғуст, бируней.
Өмәрҗан идиллайеф шагиртлири фарингиз ғопурова вә илһам ғаппароф билән. 2019-Йили 22-авғуст, бируней.
RFA/Oyghan

Мәлумки, қазақистан уйғурлири кейинки вақитларда тәнһәрикәтниң һәр түрлири бойичә дуня мусабиқилиригә қатнишип, яхши нәтиҗиләрни көрсәтмәктә.

Йеқинда бируней пайтәхти даруссалам шәһиридә яш өсмүрләр арисида ушу-санда, йәни чамбашчилиқ бойичә өткән асия мусабиқисигә қазақистанда паалийәт елип бериватқан «нийәт» тәнһәрикәт кулубиниң тәнһәрикәтчилириму қатнишип, илһам ғаппароф 70 килограм салмақта 2-орунни, фарингиз ғопурова болса, 3-орунға игилигән.

Биз мәзкур мусабиқидә мис медалға еришкән фарингиз ғопуровани зиярәт қилғинимизда, у мундақ деди: «мән ушу-сандаға 2018-йили февралда қатнаштим. Икки йилниң ичидә тараз, ақтав шәһәрлиригә вә қирғизистанға берип, 6 мусабиқигә қатнаштим. 15 Алтун, 2 күмүш вә 3 мис медалға игә болдум. Бирунейда 19 мәмликәт болди. Мениң билән соқушқан қиз һиндистандин кәлгән. Кейинки язда дуня мусабиқисигә барғум келиду. Ата-анам мени қоллайду.»

Ғопурова фарингиз пәрһат қизи 2004-йили алмута шәһиридә туғулуп, шәһәрдики 129-мәктәпниң 9-синипини тамамлиған. У һазир хәлқара бизнес, йәни сода академийәсиниң техникомида билим алмақтикән.

Биз шундақла фарингизниң аниси зулпийә ханим билән сөһбәт елип бардуқ. У қизи фарингиз һәққидә мундақ деди: «биринчи синипқа барғандин кейин, у маңа тәнһәрикәткә бараттим дәп башлиди. Уни елип бериш вә елип келиш мумкин болмиди. Карате, йәни қаидисиз челишиш йоқ икән. Кейин у ушу-сандаға барди вә бу маңа яқти деди.»

Зулпийә ханим фарингизниң бир йил мабәйнидә тәнһәрикәтниң бу түригә хели өгинип қалғанлиқини, бу җәһәттә чоң утуқларға йәткәнликини, оқушиниңму яман болмиғанлиқини тәкитлиди. У йәнә қизиниң билимгә қизиқип, өз күчи билән оқушқа чүшкәнликини, униңдин көп үмид күтидиғанлиқини оттуриға қойди.

Биз 2003-йили уйғур наһийәсиниң чонҗа йезисида дуняға кәлгән, бирунейда өткән мусабиқигә қатнишип, күмүш медалға сазавәр болған йәнә бир уйғур пәрзәнти илһам ғаппарофқа мураҗиәт қилғинимизда, у мундақ деди: «мән алмута шәһириниң 102-мәктипидә билим алдим. Һазир қазақистан-русийә теббий техникоминиң оқуғучиси. Тәнһәрикәт билән 2014-йили өктәбир ейидин башлап шуғуллинип келиватимән. Бәш йил мабәйнидә қазақистанниң көплигән шәһәрлиридә өткән мусабиқиләргә қатнаштим вә мукапатлиқ орунларға игә болдум. 35 Алтун, 8 күмүш, 5 мис медалиға сазавәр болдум. Өмәр ака вә анамниң үмидини ақлиғинимға хушалмән.»

Биз илһамниң аниси гүлхан ханим билән алақилишип, униңдин илһам һәққидә сориғинимизда, у мундақ деди: «һазирқи еғир вәзийәттә қазақистанда яшаватқан уйғурлар тәнһәрикәт ишлириға чоң күч чиқириватиду. Буниңға мән һәм ана, һәм устаз ретидә көп көңүл бөлидиған болдум. Сәвәби уйғур балилири һәр хил кәсип таллашта әң юқириқи пәллиләрдә болмиса, уйғур миллитиниң келәчики еғир болуши мумкин. Балиға миллийликни сиңдүрүштә ата-аниниң роли чоң дәп ойлаймән.»

Гүлхан ханим илһамниң йәткән утуқлирини пүткүл қазақистан уйғурлириниң утуқи дәп ойлайдиғанлиқини, яшларни тән-саламәтлик тәрәптинла әмәс, бәлки әқил тәрәптинму юқири дәриҗидә тәрбийәлисә, уйғурни милләт сүпитидә сақлап қелишқа болидиғанлиқини һәм бу мәсилигә чоң әһмийәт бериш лазимлиқини билдүрди.

Биз фарингиз ғопурова вә илһам ғаппарофниң мәзкур утуқларға йетишигә сәвәб болғанларниң бири, уларниң тренери өмәрҗан идиллайефни зиярәт қилдуқ.

Өмәрҗан идиллайеф 1984-йили уйғур наһийәсиниң ават йезисида туғулған болуп, шу йезидики һезим искәндәроф намидики оттура мәктәпни тамамлиған. У алмута шәһиридики тәнһәрикәт университетиға оқушқа чүшүп, тәнһәрикәтниң йәкму-йәк түри бойичә узун йиллар мабәйнидә шуғулланған. У җумһурийәтлик вә дуня мусабиқилиригә қатнишип, чемпийон аталған.

Өмәрҗан идиллайеф зияритимизни қобул қилип, мундақ деди: «нийәт» кулубида ишләватқинимға тоққуз йил болди. Бу вақит мабәйнидә бир йерим миңдин оқуш тәнһәрикәтчи тәйярлидуқ. Шуларниң ичидә ризайдин райлин, тимур һәмрайеф охшаш хәлқара дәриҗилик тәнһәрикәт маһирлирини тәйярлидим. Мушу тапта қол астимда 150-200 гә йеқин уйғур балилири мәшиқлиниду. Һазир шаңхәйдә болидиған дуня мусабиқисигә тәйярлиниватимиз.»

Игилишимизчә, узун вақитлардин буян қазақистанда тәнһәрикәтниң бокс, кикбоксиң, йәни әркин муштлишиш, карате, йәни қаидисиз челишиш, чамбашчилиқ, «җю-җитсу», йәни биразилийәчә әркин челишиш вә башқиму түрлири бойичә көплигән уйғур маһирлири йетилип чиққан икән. Абдурешит абдурахманоф, һемит тохтахуноф, закир тохтийеф, ғопур тохтийефқа охшаш тәнһәрикәтчиләрниң исми пәқәт қазақистандила әмәс, бәлки униң сиртидиму яхши мәлум. Һазир шу маһирларниң изини бесип келиватқан яшлар аз әмәс икән.

Пикирләр (0)
Share
Толуқ бәт