Enqerediki xitay elchixanisi aldida namayish


2007-10-01
Share

2007 - Yili 10 - ayning 1 - küni, enqere xitay bash elchixanisining aldidiki namayish. RFA Photo/Erkin Tarim

Xitay kommunistlirining Uyghur diyarini bésiwalghanliqining 58-yilliqi munasiwiti bilen xitayning enqerede turushluq bash elchixanisining aldida namayish ötküzüldi. Sherqiy türkistan medeniyet we hemkarliq jem'iyiti enqere shöbisi mes'uli xeyrullah efendigil ependining uyushturushi bilen ötküzülgen bu namayishqa, türkiyining eng chong ammiwi teshkilatliridin biri bolghan türkiye kadirlar uyushmisining bash sékritari fahrettin yoqush ependi, türkiye ma'aripchilar uyushmisining mes'uli shu'ayip ependi qatarliq kishiler bashchiliqida köp sanda kishi qatnashti. Bulardin bashqa bezi siyasi partiye mes'ulliri we enqerede yashawatqan Uyghurlarmu bar.

Bu namayishqa qatnashqan kishiler qolida türk bayriqi bilen ay yultuzluq kök bayraqni kötürgen halda hemme birdek, " ishghalchi xitaylar sherqiy türkistandin yoqal! bigunah insanlar bu yerde, insan heqliri qeyerde ? térrorist xitaylar sherqiy türkistandin chiqip ket!" dégen'ge oxshash shu'arlarni towlashti.

2007 - Yili 10 - ayning 1 - küni, enqere xitay bash echixanisining aldidiki namayishqa qatnashqan Uyghur we turk qérindashlar. RFA Photo/Erkin Tarim

Kéyin sherqiy türkistan medeniyet we hemkarliq jem'iyiti enqere shöbisi bashliqi xeyrullah efendigil ependi, metbu'at bayannamisini oqup ötti.

Bu namayish jeryanida türkiye kadirlar uyushmisi bash sékritari fahrettin yoqush ependi, sherqiy türkistan musteqilliqqa érishkiche dawamliq xitay elchixanisining aldida namayish qilidighanliqini éytip mundaq dédi: "her yil bir qanche qétim namayish qilish üchün bu yerge kéliwatimiz. Bu ish axirlishishi kérek, dunya jama'etchiliki buni körüshi kérek. Biz sherqiy türkistanliqlar erkinlikige érishkiche dawamliq bu yerge kélip namayish qilimiz. Uyghur türkliri hergizmu özlirini yalghuz hés qilmisun , 70 milyon türk xelqi Uyghurlarning yénida dawamliq ularni qollap quwwetleydu. Pütün dunya xelqi Uyghurlarni qollap quwwetlise u yerde choqum musteqil sherqiy türkistan döliti qurulidu. Biz dawamliq Uyghurlarni qollap quwwetleymiz." (Erkin tarim)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet