12 – Dékabir herikitining 21 yilliqi xatirilendi

• Ixtiyari muxbirimiz ekremning bu heqtiki melumati
• Download story audio

Bu yil 12 – ayning 12 – küni "12 – dékabir oqughuchilar herikiti" yüz bergenlikining 21 yilliq xatire künidur. Bu munasiwet bilen, d u q ning re'isi, Uyghur milliy herikitining rehbiri rabiye qadir xanim 12 – ayning 12 – küni bayanat élan qilip, 12 – dékabir herikitining 21 yilliqini xatirilidi.

Uyghur yéqinqi zaman tarixidiki öchmes iz

Rabiye qadir xanim bu bayanatta, dunya Uyghur qurultiyi teripidin sherqiy türkistan xelqining "yashlar küni" dep békitilgen 12 – dékabir künini, Uyghur démokratik herikiti tarixidiki shanliq bir sehipe, dep atighan hemde 1985 – yili 12 – ayning 12 – küni, sherqiy türkistandiki onminglighan aliy mektep oqughuchilirining xitay mustebit hökümranliqigha qarshi élip barghan heywetlik namayishi Uyghur xelqining kommunizmi réjimigha qarshi iradisini namayen qilish bilen birge, erkinlik, démokratiye, insan heqlirigha bolghan arzu – teleplirini dunyagha jakarlapla qalmastin, pütkül xitaydiki démokratik oqughuchilar herikitining, jümlidin 1989 – yili yüz bergen tyen'enmin weqesining meydan'gha kélishige biwaste tesir körsitip, yalghuz Uyghur tarixidila emes, xitay yéqinqi zaman tarixidimu öchmes iz qaldurghanliqini eskertken.

Milli herikitimizning ilham menbesi

D u q ning re'isi rabiye qadir xanim sherqiy türkistan yéqinqi zaman tarixidiki milliy herikitimizning dawami, rawaji we démokratik küreshning bashlinish nuqtisi, dep qaralghan 12 – dékabir herikiti heqqide toxtilip mundaq dégen:

"Biz bu künni iptixar bilen yad etken waqtimizda, bundin 21 yil ilgiri Uyghur millitining kélechek teqdiri üchün kökrek kérip otturigha chiqqan batur ezimetlirimizdin pexirlenmey turalmaymiz. Ularning pilanliq tughutqa qarshi turush, atom sinaqlirini emeldin qaldurush, köchmen yötkeshni toxtutush qatarliq sekkiz maddiliq shu'ar bilen xitay mustebit hökümitige jeng élan qilghan jasaritidin ghururlanmay turalmaymiz. Yérim esir dawam qilghan qabahetlik süküt baghrini yérip chiqip, milliy iradimizni dunya jama'itige bildürgen we ewladlarni öz teqdiri heqqide oylinishqa ilhamlandurghan pidakarliqi üchün apirin éytmay turalmaymiz. 12 – Dékabir herikiti nöwettiki milliy herikitimizning rawaji hem tereqqiyati üchün ilham menbesidur".

Sherqiy türkistan yashlirining bayrimi

Sherqiy türkistan oqughuchilar herikitining rehberliridin biri bolghan, 1985 yili yüz bergen 12 – dékabir herikitige aktip ishtirak qilghan, bügün d u q ning bash katipliq wezipisini we yawropa sherqiy türkistan birliki teshkilatining re'islikini ötewatqan dolqun eysa ependi bu heqte öz pikirlirini otturigha qoyup ötti.

13 – Dékabir küni, gérmaniyining myunxén shehridiki qurultay bash shitabida, d u q ning mu'awin re'isi esqerjan, ijra'iye komitétining mu'awin re'isi ablikim idris we qurultay bash katipi dolqun eysa ependiler yétekchilikide qurultay xadimliri ara 12 – dékabir herikitini xatirilesh pa'aliyetliri we yashlar bayrimi bolup ötti.

Bu qétimqi pa'aliyetke qatnashqan qurultay xadimliri 1985 – yili 12 – dékabir küni yüz bergen oqughuchilar herikitini eslep ötüsh bilen birge, Uyghur démokratik herikitining tunji signalini yangratqan 12 – dékabir herikitining qehriman oghul – qizlirigha bolghan hörmet – éhtiramlirini bildürdi.

D u q xadimlirining éytishiche, 12 – dékabir küni tedriji halda barliq sherqiy türkistan xelqining yashlar bayrimigha aylinip, her yili ten – tene bilen ötküzilidiken we bu meqsedni ishqa ashurush yolida üzlüksiz térishchanliq körsitilidiken. (Ekrem)