Xitay kommunistik partiyisining 17 ‏- qurultéyidin burunqi alametler (3)


2007-09-21
Share

Xu jintaw, wén jyabaw we zéng chingxonglar 3 - ayning 16 - künidiki, xitay memliketlik xeliq qurultiyining yépilish murasimida. AFP Photo

Xitay kommunist partiyisining chong qurultéyi her besh yilda bir qétim échilidu, her qétim échilishtin burun, siyasiy köz qarishi kommunist partiye bilen oxshash bolmighan dölet puqralirini qattiq basturup kéliwatidu. Kéler ayda xitay kommunist partiyisining 17 ‏- qurultéyi échilish aldida yene, xitay kommunist partiye siyasiy byurosining ezasi, kommunist xitay hökümitining jama'et xewpsizlik ministiri ju yungkang kommunist partiyining dölet ichi we sirtidiki düshmenlirige qattiq zerbe bérip jem'iyetni tinchlandurush pilanini élan qilghan idi.

Ju yungkang bu heqte qilghan sözide, bolupmu shinjang, tébet qatarliq jaylardiki musteqilliq heriketlirige qattiq zerbe bérishni alahide tekitligen idi. Hazir xitayda siyasiy köz qarishi kommunist partiye bilen oxshash bolmighan dölet puqralirini qattiq basturush herikiti dawamlishiwatidu. Emma xu jintaw bir munche qéyin mesilige duch kelmekte. Buning alametliri töwendikiche:

7‏- Xu jintawning 'shangxey guruhi'gha qozghighan hujumi

Amérikida xitayche chiqidighan Tycool namliq éléktronluq gézitte bayan qilinishiche, 1989 ‏- yili béyjingda yüz bergen tyen'enmén weqesidin kéyin hoquq tutqan jang zéminning, yang famililik générallarni we béyjing shehirining bashliqi chén shitongni ornidin yötkiwitip, özining hoquqini mustehkemlishi üchün alahide xizmet körsetken zéng chingxung mu'awin dölet re'isilikke érishken idi. Xu jintaw bu qétim alliqachan ölgen chong emeldarlarning baliliri tamamen orun alghan kommunist partiyining 'qandashliq tori' ni shekillendürdi. Xu jintawning 17 ‏- qurultayda hoquq teqsimatigha ige bolidighanlar üchün belgiligen yash cheklimisi we xiyanetchi emesliki dégen sherti 68 yashliq zéng chingxungni wezipisidin istipa bérishke qistashqa, jang zéminning shangxey guruhigha hujum qozghishi üchün yol achti.

'Asiya heptilik géziti'de bayan qilinishiche, merkizi intizam tekshürüsh komitétining shangxeyde tekshürüwatqan déloliri hazirghiche jiddiy dawam qiliwatidu. Hökümet da'iriliri hazir yéqinda ölüp ketken siyasiy byuroning da'imiy ezasi xu'angjüning a'ile -teweliriningmu chet'elge bérishini chekligen. Xongkongda chiqidighan 'shepe' zhurnilida bayan qilinishichimu, jang zéminning xotunining jiyeni, shangxey jama'et xewpsizliki idarisining bashliqi wu jzhmingmu alliqachan xiyanetchilik délosi da'iriside tekshürülmekte. Mulahizichilerning asasen birlikke kelgen köz qarshi buyiche éytqanda, bu xu jintaw bilen buningdin birnechche yil burun xitayning 3 ‏- ewlad rehberlik yadrosi bolghan, hazirghiche téxi hayat turuwatqan jang zémin yeni shangxey guruhi otturisidiki jiddiy ichki urushning inkasi. Bezi mulahizichilerning perez qilishiche, shinjangdiki wang léchu'enning ornimu bu ichki urushning tereqqiyatigha baghliq.

8‏- Kommunist partiye bilen déhqanlar otturisidiki toqunush

B b s ning bayan qilishiche, 17 ‏- qurultay échilishtin burun, kommunist xitay hökümitining statistika idarisi, gerche xitayning iqtisadiy küchi hazir dunya buyiche 4 ‏- orunda turidighan döletke aylandi, dölet buyiche adem béshigha toghra kélidighan kirim miqdari éship bir qatlandi, xelq hazir pulni sanap emes, belki tutamlap xejleydighan boldi, dep élan qilghan bolsimu, emma yéqinda élip bérilghan ray sinashta melum bolushiche, xitayda balilarni oqutush, késel körünüsh we toralghu mesilisi xelqning béshidiki 'üch chong tagh' bolup qaldi dep qarighuchilarning nésbiti %76 ge yetken. Buning ichide déhqanlarning inkasi eng küchlük.

B b s ning erkin munazire bétige yézilghan obzorlardin melum bolushiche, hazir xitayda emeldarlarning yer-zémin we bayliqlarni heqsiz ishlitishi bilen emgek küchliridin erzan paydilinishi ‏, junggo iqtisadini téz ashurushning biridin - bir heriketlendürgüch küchi bolup qalghan.

Teywendin yollan'ghan obzorda mundaq dep yézilidu: chong quruqluqta kommunist partiye özining 17 ‏- qurultéyidin burun, siyasiy köz qarishi oxshimighanliki ademni basturiwatidu. Olimpik musabiqisi ötküzüsh üchün xelqning yer -zéminini bulawatidu. Xiyanetchilikke qarshi turush dégen herikettimu 'oghrini qaraqchi bulash' oyunini ashkara oynawatidu. Partiyige dert éytqili kelgen xeliqnimu qoghlawatidu. Hazir xitayda xelqning hemme nersisi kommunistlarning qolida. 1 Milyard 300 milyon ademning jénimu mushu bir partiyining qolida. Emdi bu 'junggoche sotsiyalizm' gumran bolsa, xelq qaytidin yer islahati élip baridu.

En'giliyidin yollan'ghan bir obzorda mundaq dep yézilidu: xitaydiki uqum buyiche éytqanda, xitayda yer-zémin döletning, dölet xelqning, xelq kommunist partiyining qumandisigha boy sunidu, kommunist partiye pulning qumandisigha boy sunidu, pul hoquqtin kélidu, hoquq kommunist partiyining qolida. Xelq qul, uningdin kelgen qalduq qimmettin kommunistlar huzurlinidu. Yer-zémin telep qilghan xelq sim tosaqqa kirip qalidu.

Jyangsudin yollan'ghan bir qisqa obzorda peqet "emdi kommunist partiyini aghdurushtin özge yol qalmidi' dep yézilghan. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet