Xu jintaw hoquqini mustehkemlep kételemdu?


2007-10-11
Share

Xitayning 17 - qurultiyi harpisidiki xu jintaw. Xu jintaw melum bir yighinda, shirikliri bilen birge. AFP Photo

Xitay kompartiyisining 17- qurultiyi mushu ayning 15- küni béyjingda échilidighan bolup, bu yighin'gha 2 mingdin artuq xitay kompartiyisining wekilliri qatnishidu. Xitay kompartiyining bu yighini échilishtin burun xitay kompartiyisi ichide bir qatar tengshesh élip bérilghan , melum bolushiche, xitay re'isi xu jintaw bu yighin arqiliq öz hoquqini kücheytishni bash meqset qilghan iken.

Bu yighin xu jintawning kéyinki hoquq sepiri uchun intayin muhim

Hazir xitayning hoquq dunyasida üch xil mezhep mewjud bolup, bular sabiq xitay re'isi jyang zémin bashchiliqidiki shangxey guruhi, hazir wezipe ötewatqan xu jintaw bashchiliqidiki kommunistik yashlar ittipaqi guruhi we xitay kommunistlirining hoquq textige yoshurun tesir körsitip turidighan, kona xitay kompartiye rehberlirining perzentliri chembiriki "begzadiler guruhi" qatarliqlar bar.

Undaqta yashlar ittipaqi guruhi bu nöwetlik qurultay arqiliq öz hoquq ornini mustehkemlep kételemdu? mana bu xitay kompartiyisi we hazir kompartiye béshida hoquq tutup turghuchi xu jintawning kéyinki hoquq sepiri uchun intayin muhim bolghan bu yighin meydan'gha keltürgen su'allarning biri.

Burun melum bolghinidek xitay re'isi xu jintaw yéqindin buyan oz yéqinlirini muhim orunlargha qoyushqa bashlidi. Junggo torida 20 - séntebir bérilgen melumatqa qarighanda, ling jixu'a xitay kompartiyisi merkiziy komitéti sékrétariyatining sékrétari qilip östürülüp , eslide bu orunda xizmet qiliwatqan wang gangning ornigha dessitilgen.

Xu jintaw yene 2003 - yili xitayda sars késili tarqalghanda béyjing shehirining bashliqliq wezipisidin élip tashlan'ghan méng shönungni shenshi ölkisining re'islikige teyinligen. Li we ménglarning her ikkilisi ilgiri xitay kommunistik partiyisi yashlar ittipaqi saheside xizmet qilghan iken.

Xu jintaw bilen birdeklikni saqlash xelq ammisining menpe'etini qoghdashtin köp muhim

Amérikida intérnét arqiliq xitay tilida tarqitilidighan paydilinish gézitning sabiq muherriri li xongku'en ependining tehlilige qarighanda , méng shönung bolsa ittipaq guruhigha tewe kishi bolup öz waqtida sars késili tarqalghanda uchurni qamal qilip késellikning tarqilip kitishige seweb bolghan bir ademning yene qayta östürülüshi asasi qatlam xadimlirigha mezhepchilikning muhimliqini hés qilduridiken.

Xu jintaw inaq jem'iyet berpa qilish dégen sho'arni otturigha qoydi. Emeliyette u xelqning menpe'etini nezerge élipmu qoymaydu. Uning köngül bölidighini partiye we hökümet ichide öz ademlirining qanchilik orun'gha érishishi. Xitay kompartiyisining byurokrat tüzümi buyiche, xu jintaw ornini mustehkemlep bolghandin kéyin qol astidikiler özlükidin jyang zémin guruhining ademliridin yiraqliship uninggha yéqinlishidu. Shunga méng shönungning qayta wezipige teyinlinishidin bashqilar xu jintaw bilen birdeklikni saqlash xelq ammisining menpe'etini qoghdashtin köp muhim iken dégen signalni qobul qilidu .

Xitay siyasiy sehnisidiki özgirishlerge yéqindin nezer sélip turghan siyasiy tehlilchi shixenze uniwérsitétining sabiq proféssori ilshat ependining qarishiche, xu jintawning peqet öz yéqinlirini muhim orunlargha kirgüzüshidiki birdin ‏- bir seweb xitay kompartiyisi ichidiki ornini mukemmelleshtürüsh, we öz guruhini köprek menpe'etke érishtürüsh iken.

Heqiqiy wezipige teyinlesh we menpe'et bölüshüsh ishliri yighindin burun orunlashturulup bolghan

17 - Qurultay harpisida, bu qurultayning herxil teyyarliq we xizmetliri ishlinip boldi. Emma xitay tehlilchi li xungku'angning öz muxbirimizgha bildürüshiche, mezkur qurultay bir yosun xaraktérini alghan bolup héchqandaq emeliy rolgha ige emesken. Uning körsitishiche, meyli xitay kommunistik partiyisining qurultayliri bolsun we yaki bashqa xelq wekiller qurultiyi bolsun , hemmisi bir xil yalghan démokratiye sheklini alghan bolup, adem belgilesh we wezipige qoyush ishliri bundaq yighinlardin burun békitilip bolidiken.

U " xitay kompartiyisining bundaq wekiller yighinliri adette qol kötirip békitish mashinisi. Heqiqiy wezipige teyinlesh we menpe'et bölüshüsh ishliri yighindin burun orunlashturulup bolghan bolidu. Shunga yighin échish bolsa bir xil démokratiye yosunida shundaqla bir körsitip qoyushtin ibaret bolup, yighin échilghanda chong chataq chiqmaydu " deydu.

Uning körsitishiche yene, hazirqi xitay döliti bir xelq jumhuriyiti bolghanliqtin xitayning hakimiyet tüzümliride azraq démokratiye tekitlinidighan bolup, ding shyawping dewridikidek padishahning dégini dégen bolidighan dewr ayaghlashqan iken.

U yene mundaq deydu " jumhuriyet tüzümi choqum ochuq ‏- ashkara bolushi, adil saylam ötküzülüshi kérek bolghachqa , xitay kompartiyisining hazir qiliwatqini, meyli omumi xelq qurultiyi bolsun we meyli siyasiy kéngeshning yighinliri bolsun hemmisi oxshashla saxta démokratiye sheklidinla ibaret."

Tehlilchiler: xu jintawning orun basar teyinlesh ishliri tosalghugha uchrishi mumkin

Tehlilchilerning qarishiche, xu jintaw hazir mushu qétimliq yighin jeryanida oz orun basarini békitip chiqishi mumkin , melum bolushiche, xu jintaw nezirini lyawning ölkisining partiye sékrétari li kéchyanggha tikmekte iken. Emma, washin'gton pochta gézitide körsitilishiche, xu jintaw oz iz basarini békitish jehette burunqi xitay rehberliri maw zédung we déng shyawpinggha oxshash tewrenmes siyasiy imtiyazgha ige emes iken.

Siyasiy közetküchi ilshat ependining qarishiche, hazir xitay kompartiyisi krizis ichide turuwatqan bolup, bu xildiki qurultay aldida héchqachan bundaq jiddiy adem almashturush ishliri bolup baqmighan bolup, ilshat ependimu xu jintawning izbasar teyinlesh jeryanida yoluqidighan qiyinchiliqliri jehette washin'gton pochta gézitide körsitilgen seweblerge oxshash qarashlarni otturigha qoydi. (Jüme)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet