18 - Қурултай мәзгилидә түрмидики уйғурларниң аилилири вә әрздарлар нуқтилиқ назарәт обикти қилинди

8 - Ноябир башланған хитайниң 18 - қурултийи мәзгилидә хитайда қаттиқ бихәтәрлик тәдбирлири елинғанлиқи йеқиндин буян чәтәл ахбарат вастилиридики асаслиқ хәвәрләрниң бири болмақта. Радиомиз уйғур елидин игилигән әһваллардин мәлум болушичә, уйғур ели даирилири 18 - қурултай мәзгилидә балилири вә уруқ - туғқанлири һәр хил сияси җинайәтләр билән әйиблинип түрмидә йетиватқан уйғур аилилирини нуқтилиқ назарәт обикти қилған.
Мухбиримиз меһрибан
2012-11-09
Елхәт
Пикир
Share
Принт
Аилә-тавабиатлири муһаҗирәттики уйғурларниң ярдимигә еришкән ғайиб болған уйғурлар.
Аилә-тавабиатлири муһаҗирәттики уйғурларниң ярдимигә еришкән ғайиб болған уйғурлар.
RFA


Уйғур елиниң һәрқайси җайлиридин радиомиз зияритини қобул қилған уйғурларниң билдүрүшичә, бейҗиңда ечиливатқан хитай компартийисиниң 18 - қурултийи мәзгилидә, һәрқайси вилайәт, шәһәр, наһийиләрдә қаттиқ бихәтәрлик тәдбирлири елинған. Болупму сияси җинайәтләр вә диний әсәбийлик билән әйиблинип түрмиләрдә йетиватқан уйғурларниң аилә - тавабатлири вә 5 - июл вәқәсидин кейин ғайиб болған уйғурларниң аилә - тавабиатлири нуқтилиқ тәкшүрүш обикти қилинип, тәқиб астиға елинған.

Оғуллири диний китаб сатқанлиқи үчүнла сияси җинайәт билән әйиблинип қамақ җазасиға һөкүм қилинған бир атиниң билдүрүшичә, хитай компартийисиниң 18 - қурултийи мәзгилидә уларниң аилиси йәнә нуқтилиқ назарәт обиктиға айланған.

Униң баян қилишичә, уларниң аилисигә қаритилған тәқип қилиш оғуллири қамақ җазасиға һөкүм қилинғандин буян давамлишиватқан болуп, уларниң аилиси шу наһийидики нуқтилиқ тәкшүрүш обикти қилинған. Бу аилигә келидиған хәт, халта қатарлиқ почта йолланмилири аввал ечип тәкшүрүлгәндин кейин уларниң елип кетишигә рухсәт қилинған. Даириләр бултурдин буян йәнә улар олтурушлуқ мәһәллә комитетиға рәсмий уқтуруш чүшүрүп, бу аилини вә бу аилигә келидиған меһманларни назарәт қилишни орунлаштурғини үчүн, икки йилдин буян уларниң өйигә келидиған меһманларму азлап кәткән.

Илгири сиясий җинайәт билән әйиблинип 10 нәччә йиллиқ түрмә һаятидин кейин җаза муддити тошуп қоюп берилгән бир уйғурниң аилисидикиләрниң билдүрүшичә, бу киши түрмидин чиққандин кейинму униң өз мәһәллисидин рухсәтсиз айрилишиға йол қоюлмиған. Бу аилә нуқтилиқ назарәт астиға елинған.

Өзиниң қошна йезидики уруқ - туғқанлириниң той - төкүн, нәзир - чирақ паалийәтлиригиму бериши чәкләнгинини билдүргән бу киши, нөвәттә бейҗиңда ечиливатқан 18 - қурултай мәзгилидә йезилиқ сақчиханиниң мәхсус адәм аҗритип, у турушлуқ мәһәллигә аманлиқ сақлашқа әвәткәнликини билдүрүп, түрмидин чиққандин буян өзиниң бу хил назарәт вә тәқип қилишларға давамлиқ учрап кәлгини үчүн, һазир бу хил әһвалларға пәрва қилмайдиған болуп қалғанлиқини әскәртти.

Игилигән башқа учурлардин мәлум болушичә, уйғур аптоном районлуқ һөкүмәтниң һәрқайси вилайәт, шәһәр вә наһийиләрдики қанун иҗра қилиш тармақлири, муқимлиқни қоғдиғучи хадимлар, җ х органлири вә һөкүмәт тармақлири бирлишип, үрүмчи, ғулҗа, қәшқәр қатарлиқ шәһәр кочилиридики яймичи, китаб, пластинка сатқучиларни халиған җайға яйма йейип тиҗарәт қилиштин чәклигән. Үрүмчидә олтурушлуқ аһалиләрниң билдүрүшичә, дөңкөврүк қатарлиқ уйғурлар топлашқан җайларда тәкшүрүш күчәйтилип, хәлқара чоң базарға киргән - чиққанларниң сомкисини ечип тәкшүрүш ишлириму елип берилған.

Хитай компартийисиниң 18 - қурултийи мәзгилидә йәнә, әрз үчүн бейҗиңға барған уйғурларму тутқун қилинишқа учриған. Уйғур биз ториниң хәлқара тор бекитидики хәвәрдин мәлум болушичә, қәшқәр шамалбағ йезидики өйи чеқилған 100 нәччә аилигә вәкил болуп әрз үчүн бейҗиңға барған әрздарлардин үч киши қәшқәр даирилири тәрипитин тутқун қилинип 5 - ноябир күни бейҗиңдин қайтуруп келингәндин кейин, қәшқәрдики мәлум қамақханиға солап қоюлған.

Д у қ баянатчиси дилшат ришит радиомиз арқилиқ баянат берип, хитай даирилириниң қурултайни баһанә қилип, уйғур елидә тәкшүрүш вә тәқип қилишни күчәйткәнликини әйиблиди. Қурултай баянатчиси дилшат ришит сөзидә даириләрниң уйғурларға қаритилған назарәтни күчәйткәнликини, болупму һәр хил сиясий җинайәтләр билән әйиблинип түрмидә йетиватқан уйғурлар аилисиниң нуқтилиқ назарәт обикти қилиниши вә қурултай мәзгилидә әрз үчүн бейҗиңға барған әрздарларниң һечқандақ қануний рәсмийәтсиз солап қоюлушиниң уйғурларға қаритилған еғир миллий кәмситиш қилмиши икәнликини билдүрди.

Пикирләр (0)
Share
Толуқ бәт