Түркийә, әзәрбәйҗан, қазақистан вә қирғизистан ташқи ишлар министирлири түркийидә учрашти

Түркийә, әзәрбәйҗан, қирғизистан вә қазақистан ташқи ишлар министирлири түркийиниң саяһәт шәһәрлиридин бири болған бодрум шәһиридә учрашти. Икки күнлүк учришиш ахирлашқандин кийин 4 дөләтниң ташқи ишлар министирлири бодрумдики мармара меһманханисида мухбирларни күтивелиш йеғини өткүзди.
Мухбиримиз әркин тарим
2010.08.06
Share on WhatsApp
Share on WhatsApp
Tashqi-ishlar-ministiri-ahmet-dawutoglu-305 7 - Айниң 5 - күнидики үрүмчи қанлиқ бастутуш вәқәсигә түркийә ташқи ишлар министири байанат елан қилип, хитай һөкүмитини әйиплиди. Сүрәттә, ташқи ишлар министири аһмәт давутоглу.
RFA Photo / Erkin Tarim

Түркийә ташқи ишлар министири әхмәт давутоғли, әзәрбәйҗан ташқи ишлар министири әлмар мәммәтяроф, қазақистан ташқи ишлар министири қанат савдабайеф вә қирғизистан ташқи ишлар министири руслан қазақбайеф қатарлиқлар мухбирларни күтивелиш йиғинида  достлуқ вә қериндашлиқ һәққидә муһим сөзләрни қилди.
 
Бу учришишта нохтилиқ һалда 4 - айниң 7 - күни қирғизистанда мәйданға кәлгән вәқәдин кейинки қирғизистанниң вәзийити вә енергийә һәққидә музакирә елип берилған. Йиғинда һәммә бирдәк, биз ортақ мәдәнийәткә игә дөләтләр, немә үчүн техиму көп җәһәттин һәмкарлишалмаймиз дегән пикирни оттуриға қойди. Мухбирларни күтивелиш  йиғинида 4 министирниң һәммиси бирдәк биз ортақ өтмүшкә игә қериндаш милләтләр, һәмкарлиқни техиму күчәйтишимиз керәк деди.

Мухбирларни күтивелиш йиғинида алди билән түркийә ташқи ишлар министири профессор доктор әхмәт давутоғли сөз қилип мундақ деди: нурғун мәсилиләрдә охшаш көз қарашқа игә, әҗдадимиз  вә йилтизимиз  бир болған  қериндаш дөләтләрниң ташқи ишлар министирлири болуш сүпитимиз билән йеңи бир қәдәм аттуқ, бу қетимқи учришишта нурғун мәсилиләр һәққидә әтраплиқ музакирә елип бардуқ.
   
Қазақистан ташқи ишлар министири савдабайеф, биз түркий җумһурийәтлириниң министирлири давамлиқ учришип турушимиз керәк. Чүнки бизниң  тарихимиз ортақ, қәлбимиз  бир деди.
   
Әзәрбәйҗан ташқи ишлар министири мәммәтяроф мухбирларни күтивелиш йиғинида сөз қилип, бизниң өрп-адитимиз, мәдәнийитимиз охшаш, шуңа  мәсилилиримизни бирликтә һәл қилишимиз керәк деди.
   
Әң ахирида қирғизистан ташқи ишлар министири қазақбайеф сөз қилип, қериндашлирим ейтқан сөзләргә қошулимән. Әхмәт акимизниң тәклипигә бинаән бу йәргә кәлдуқ. Қирғизистанда мәйданға кәлгән вәқәдин кейин бизгә мадди вә мәнивий җәһәттин ярдәм қилған  қериндаш дөләтләргә рәһмәт ейтимән. Биз һәмкарлиқимизни мушундақ тәрәққи қилдуришимиз керәк. Йәнә қайси җәһәтләрдә һәмкарлишалаймиз, түрк дуняси бирликини қуруп чиқиш үчүн немиләрни қелишимиз керәк? бу һәқтә әтраплиқ музакириләр елип бардуқ. Худайим буйриса һәммә ишимиз яхши болуп кетиду. Бу йил түркийидә җәм болдуқ, келәр йили тәңритеғиниң етәклиридә  җәм болсақ болиду деди. 
   
Түркийә ташқи ишлар министири әхмәт давутоғли бир мухбирниң түркий җумһурийәтләр оттурисидики һәмкарлиқ сестимилаштиму дегән соалиға мундақ җаваб бәрди: түрк дуняси һәйәтләр иттипақиниң баш катиплиқ ишханиси  истанбулда ечилмақчи. Түркий җумһурийәтләр оттурисидики һәмкарлиқни бир мәркәздин системилиқ һалда елип баридиғанлиқимизға ишәнчимиз камил. Нурғун җәһәттә өз-ара һәмкарлишимиз. Қирғизистанниң дәрди түркийиниңму, әзәрбәйҗанниңму дәрди. Қазақистан бу йил яврупа бихәтәрлик  һәмкарлиқ тәшкилатиниң вақитлиқ башлиқлиқини өз үстигә алди. Бу пәқәтла қазақистан үчүн әмәс, һәммимиз үчүн бир  шәрәп. Түркий җумһурийәтлиридин бириниң муваппәқийити һәммимизниң муваппәқийити, бириниң мәсилиси  һәммимизниң мәсилисидур. Тәңритағлиридин түркийидики торос теғиғичә һәммимиз охшаш һавадин нәпәс алимиз. 

Бу қетимқи түркий җумһурийәтләр ташқи ишлар министирлири йиғини қирғизистанда мәйданға кәлгән вәқәдин кейинки қирғизистанниң вәзийити вә түркий җумһурийәтләрниң вәзийити һәққидә музакирә елип бериш үчүн чақирилған тунҗи қетимлиқ  йиғин икән.   

Юқиридики аваз улинишидин, бу һәқтики мәлуматимизниң тәпсилатини аңлайсиләр.


 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт