Америка пайтәхти вашингтонда 5- феврал ғулҗа вәқәси хатириләнди


2008-02-05
Share

Ғулҗа намайишиниң 11 йиллиқ хатирә күни дуняниң һәрқайси җайлирида, җүмлидин америка пайтәхти вашингтонда хатириләнди. RFA Photo / Juma

1997- Йили 5- феврал күни, миңлиған ғулҗа яшлири, хитай һөкүмитиниң уйғурларға қаратқан адаләтсиз сияситигә наразилиқ билдүрүп тинч йосунда намайиш елип барған иди. Әмма, мәзкур тинчлиқ намайиши хитай һөкүмитиниң зораванлиқ ишлитип бастуруши билән хатимилинип, тинчлиқ билән зораванлиқниң рошән селиштурмисини һасил қилған болса, әркинликкә интилгүчи барлиқ уйғур хәлқиниң ирадисиниң намайәндиси һәмдә 20- әсир җүмлидин 2- ераниң ахирида уйғур хәлқиниң зораван күчләргә қарши елип барған бир қәдәр зор көләмлик қаршилиқ һәрикити сүпитидә тарих бетидин орун алди.

Бу қетимқи намайишни тәшкиллигүчиләрниң ейтишичә, гәрчә, ғулҗида елип берилған бу намайиш бир нәччә саәт давамида зораванлиқ билән җимиқтурулған болсиму, әмма мәзкур намайишниң авази һәр хил йоллар билән хәлқара җәмийәткә аңлитилғандин кейин, бу намайишта қәтли қилинған қорқумсиз яшларниң ирадиси вә җан талишиватқан дәқиқиләрдики ахирқи нидалири билән юғурулған уйғур авази дуняниң һәрқайси җайлирида зилзилә пәйда қилған.

Мана бүгүн бу намайиш болуп өткинигә 11 йил болған болсиму, у пәйда қилған зилзилә билән техиму юқири чәккә йәткән уйғур авази йирақ шәрқтики японийә тупрақлиридин ғәрбий йерим шардики америка вә канада дөләт мәҗлислиридә һәр түрлүк инкасларни үзүлдүрмәй қозғап турди.

Мана бүгүн уйғур вәтинидә 20- әсирдә әң ахирқи қетим елип берилған ғулҗа намайишиниң 11 йиллиқ хатирә күни дуняниң һәрқайси җайлирида, җүмлидин америка пайтәхти вашингтонда хатириләнди.

Бу намайишини хатириләш вә хитай һөкүмитиниң уйғурлар устидин йүргүзүватқан зораван сияситини әйибләш үчүн 300 гә йеқин намайишчи амма вашингтонға җайлашқан хитай әлчиханиси алдида намайиш елип барди.

Намайишчилар қоллирида "или қирғинчилиқиға җаваб бәр", "уйғурларни бастурушни тохтат", "шәрқи түркистанға һөрлүк вә әркинлик керәк" дегән хәтләр йезилған пилакатларни вә шәрқи түркистанниң ай юлтузлуқ көк байрақлирини көтүрүшүп хитай әлчиханиси алдида намайиш қилди.

Намайиш бешида дуня уйғур қурултийиниң рәиси уйғур миллий һәрикитиниң рәһбири рабийә қадир ханим мәзкур намайиш мунасивити билән баянат елан қилди.

Намайиш хитай әлчиханиси алдида 3 саәт давам әткәндин кейин шу җай вақти кәч саәт 6ләр әтрапида утуқлуқ аяғлашти. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт