Amérika paytexti washin'gtonda 5- féwral ghulja weqesi xatirilendi


2008-02-05
Share

Ghulja namayishining 11 yilliq xatire küni dunyaning herqaysi jaylirida, jümlidin amérika paytexti washin'gtonda xatirilendi. RFA Photo / Juma

1997- Yili 5- féwral küni, minglighan ghulja yashliri, xitay hökümitining Uyghurlargha qaratqan adaletsiz siyasitige naraziliq bildürüp tinch yosunda namayish élip barghan idi. Emma, mezkur tinchliq namayishi xitay hökümitining zorawanliq ishlitip basturushi bilen xatimilinip, tinchliq bilen zorawanliqning roshen sélishturmisini hasil qilghan bolsa, erkinlikke intilgüchi barliq Uyghur xelqining iradisining namayendisi hemde 20- esir jümlidin 2- éraning axirida Uyghur xelqining zorawan küchlerge qarshi élip barghan bir qeder zor kölemlik qarshiliq herikiti süpitide tarix bétidin orun aldi.

Bu qétimqi namayishni teshkilligüchilerning éytishiche, gerche, ghuljida élip bérilghan bu namayish bir nechche sa'et dawamida zorawanliq bilen jimiqturulghan bolsimu, emma mezkur namayishning awazi her xil yollar bilen xelq'ara jem'iyetke anglitilghandin kéyin, bu namayishta qetli qilin'ghan qorqumsiz yashlarning iradisi we jan talishiwatqan deqiqilerdiki axirqi nidaliri bilen yughurulghan Uyghur awazi dunyaning herqaysi jaylirida zilzile peyda qilghan.

Mana bügün bu namayish bolup ötkinige 11 yil bolghan bolsimu, u peyda qilghan zilzile bilen téximu yuqiri chekke yetken Uyghur awazi yiraq sherqtiki yaponiye tupraqliridin gherbiy yérim shardiki amérika we kanada dölet mejlisliride her türlük inkaslarni üzüldürmey qozghap turdi.

Mana bügün Uyghur wetinide 20- esirde eng axirqi qétim élip bérilghan ghulja namayishining 11 yilliq xatire küni dunyaning herqaysi jaylirida, jümlidin amérika paytexti washin'gtonda xatirilendi.

Bu namayishini xatirilesh we xitay hökümitining Uyghurlar ustidin yürgüzüwatqan zorawan siyasitini eyiblesh üchün 300 ge yéqin namayishchi amma washin'gton'gha jaylashqan xitay elchixanisi aldida namayish élip bardi.

Namayishchilar qollirida "ili qirghinchiliqigha jawab ber", "Uyghurlarni basturushni toxtat", "sherqi türkistan'gha hörlük we erkinlik kérek" dégen xetler yézilghan pilakatlarni we sherqi türkistanning ay yultuzluq kök bayraqlirini kötürüshüp xitay elchixanisi aldida namayish qildi.

Namayish béshida dunya Uyghur qurultiyining re'isi Uyghur milliy herikitining rehbiri rabiye qadir xanim mezkur namayish munasiwiti bilen bayanat élan qildi.

Namayish xitay elchixanisi aldida 3 sa'et dawam etkendin kéyin shu jay waqti kech sa'et 6ler etrapida utuqluq ayaghlashti. (Jüme)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet