Uyghur wekilliri UNPO ijra'iye komitéti yighinigha qatnashti

• Muxbirimiz ekremning bu heqtiki toluq melumati
• Download story audio

Wekaletsiz milletler teshkilati ijra'iye komitétining 2007 - yilliq 2 - qétimliq yighini 11 - ayning 30 - künidin 12 - ayning 1 - künige qeder gollandiyining amistérdam shehiride ötküzülgen.

Birleshken döletler teshkilatida wekili bolmighan 60 tin artuq milletning eza bolushi bilen qurulghan wekaletsiz milletler teshkilatining bash shitabida ötküzülgen bu qétimqi yighin'gha Uyghurlargha wekaliten d u q ning bash katipi, yawrupa sherqiy türkistan birliki teshkilatining re'isi dolqun eysa ependi bashchiliqidiki Uyghur wekillirimu qatnashqan. Dolqun eysa ependi 2006 - yili 8 - ayda teywende chaqirilghan wekaletsiz milletler teshkilati UNPO ning qurultiyida, UNPO ijra'iye komitéti ezaliqigha saylan'ghan bolup, 250 milyondin artuq xelqqe wekillik qilidighan bu teshkilatning 11 neper ijra'iye komitéti ezasining biri bolghan.

Melumki, wakaletsiz milletler teshkilati xelq'aradiki tesirlik hökümetsiz teshkilatlarning biri. Uyghurlar bolsa wekaletsiz milletler teshkilatini qurghuchi milletlerning biri hésablinidu. Uyghur teshkilatlirining, bolupmu d u q ning siyasiy pa'aliyetliri hazirgha qeder UNPO bilen zich hemkarliq ichide élip bérilmaqta. D u q 2007 - yili 5 - ayda chaqirilghan "Uyghur rehberlirini démokratiye we kishilik hoquq bilimliri buyiche terbiyilesh kursi"ni gollandiyining daha'ag shehiride UNPO bilen hemkarliship élip barghan idi. Dolqun eysa ependining bildürüshiche, bu qétimqi ijra'iye komitéti yighinida kéler nöwetlik "Uyghur rehberlirini démokratiye we kishilik hoquq bilimliri buyiche terbiyilesh kursi" ni yenila UNPO we shuninggha oxshash hökümetsiz teshkilatlar bilen hemkarliship élip bérishning muzakirisimu bolup ötken.

Dolqun eysa ependining pikrige asaslan'ghanda, d u q xitayda 2008 - yili ötküzmekchi bolghan olimpik musabiqisige qarshi UNPO bilen zich hemkarliq ornatqan bolup, béyjing olimpik musabiqisini bayqut qilish we xitaydiki insan heqliri depsendichilikini, bolupmu Uyghur millitining kishilik heq - hoquqlirining xarlinish mesilisini dunya jama'itige tonutush jehette ortaq pa'aliyet élip baridiken. UNPO Bilen d u q yene yawrupa birliki, b d t we barliq démokratik ellerge qarita xitaydiki kishilik hoquq depsendichilikini pash qilish pa'aliyetlirini qanat yaydurushning pilan - programmilirigha ige iken.

D u q ning bash katipi bu qétimqi yighin jeryanida yene , gollandiyidiki Uyghur jama'iti we " gollandiye sherqiy türkistan wexpi" teshkilatining ezaliri bilenmu uchrishish élip barghan bolup, d u q rehberlirining yéqinqi bir mezgil ichide dunyaning her qaysi jaylirida élip barghan siyasiy pa'aliyetliridin melumatlar bergen we qurultayning gollandiye Uyghurliridin kütidighan telep - isteklirini otturigha qoyup ötken.

Bu pa'aliyetning jeryani heqqide dolqun eysa ependi etrapliq chüshenche bérip ötti. (Ekrem)