Хитай һөкүмити мәктәпләргә әйдизниң алдини елиш дәрисликини киргүзидиғанлиқини елан қилди


2004-09-14
Share

Хитай дөләт кабенти әйдиз кесилиниң алдини елиш вә давалаш хизмити комитити ишханиси йеқинда " мәмликәтлик әйдиз кесилиниң алдини елиш тәшвиқат - тәрбийә хизмити көрсәткүч лайиһиси" ни елан қилип, маарип тармақлиридин 2005 - йилидин башлап әйдиз кесилиниң алдини елиш дәрисликини һәр қайси оттура, оттура - алий техником вә алий мәктәпләрниң оқутуш пиланиға киргүзүшни тәләп қилди.

Бу лайиһидә, толуқсиз оттура синипларда мәвсүмигә алтә саәт , толуқ оттура синипларда төт саәт , алий мәктәпләрдә болса, әйдиз кесилидин мудапиә көрүш һәққидә мәхсос ликсийиләрни орунлаштуруп, бу мәзмунни саламәтлик тәрбийиси қатарлиқ дәрисликләргә киргүзүш керәклики көрситилгән.

Әйдиз кеслиниң алдини елиш тәрбийиси бурунла башлиниши керәк еди

Хитайда әйдиз кесилини давалаш вә алдини елиш хизмитигә сәл қариливатқанлиқи, хәлқара сәһийә тәшкилати қатарлиқ органларниң тәнқидигә учрап киливатқан мәсилиләрниң бири иди. Бейҗиңда яшаватқан әйдиз паалийәтчиси хуҗияниң қаришичә, әйдиз кеслиниң алдини елиш тәрбийиси, әслидә мәктәпләрдә бурунла башлиниши керәк икән. У мундақ деди:

"Әйдиз кесилидин мудапиә көрүш хизмитини ишләватқан бу бир нәччә йил җәрянида биз аллибурун алий мәктәп оқуғучилирини " әйдиз кесилиниң тарқилиш иһтималлиқи юқири болған адәмләр топи" ға киргүздуқ. Чүнки уларниң әйдиз кесили вә җинисий сағламлиқ һәққидики тонуши бәкла кәмчил".

Хитай һөкүмитиниң зувани болған шинхуа агентлиқиниң билдүришичә, мәзкүр лайиһидә, һәр қайси дәриҗилик һөкүмәтләр, маарип, сәһийә вә пиланлиқ туғут қатарлиқ орунларниң һәмкарлиқида бир миханизим турғузуп, һәр қайси алий - оттура мәктәпләрниң дохтури вә тән - саламәтлик тәрбийиси елип баридиған оқутқучиларға әйдиз кесилидин мудапиә көрүш тәлим - тәрбийисини елип бериш бәлгиләнгән.

Униңда йәнә, алий вә техником мәктәплиригә йеңидин қубул қилинған оқуғучиларға әйдиз кесили, җинисий кесәлләрниң алдини елиш тәрбийә қолланмиси тарқитиш, һәр қайси алий вә оттура мәктәпләрниң күтүпханилириға әйдиз кесилигә аит оқушлуқларни қоюш, мәктәпләрниң тәшвиқат тахтилирини вақти - вақтида йеңилаш қатарлиқлар көрситилгән.

Хәвәргә қариғанда, хитай дөләт кабенти әйдиз кесилини давалаш вә алдини елиш хизмити комитити юқирдики тәшвиқатлар арқилиқ, амминиң болупму яш- өсмүрләрниң әйдиз кесилигә болған тонушини өстүрүп, кәмситиш вә хата қарашларни йоқутушни һәмдә уларниң әйдиз кеслиниң алдини елиш хизмитигә қатнишиш қизғинлиқини өстүрүшни үмид қилидиғанлиқини билдүргән.

Буниң үнүми зади қанчилик болар?

Уйғур ели нөвәттә әйдиз кесли әң тез ямраватқан раюнларниң бири, уйғур елидә узун йил оқутқучилиқ қилған чәтәлдики яшар әпәнди, хитай һөкүмитиниң бу қарарини қарши алидиғанлиқини , бирақ бу тәдбирләрниң үнүмидин гуманлинидиғанлиқини оттуриға қоюп мундақ деди:

яшар әпәнди йәнә өзи оқутқучи болуп ишлигән мәзгилидә, мәктәпләрдә әйдиз кесилидин мудапиә көрүш тәрбийилириниң асасән елип берилмиғанлиқини көрсүтүп мундақ диди:

У ахирида, әйдиз кесилиниң алдини елиш тәрбийисини күчәйтиш билән бир вақитта, хитай һөкүмитини диний әркинликни қоюп берип, диний етиқатни күчәйтиш арқилиқ, кишиләрниң әхлақини яхшилап, әйдиз кесили вә зәһәрлик чикимликкә охшаш җәмийәт мәсилилириниң алдини елишқа чақирди.

Фирансийә ахбарат агенитлиқиниң билдүришичә, һазир хитайда 840 миңдин артуқ әйдиз вироси билән юқумланғучилар бар дәп елан қилинмақта. Бирақ хәлқара әйдиз паалийәтчилири һәқиқи санниң хитай һөкүмити елан қилған рәқәмдин хелила көп икәнликини билдүрмәктә. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт