Афғанистан парламенти тәрипидин қобул қилинған кәчүрүм қануни тәнқиткә учриди


2007-02-16
Share

Хәвәрләргә қариғанда, афғанистан парламенти тәрипидин қобул қилинған кәчүрүм қануни, талибанлар алдимиздики әтиязда кәң көләмлик бир һуҗумға өтүшни пиланлаватқан бир пәйттә, талибанлар арисида пикир җәһәттин ихтилап чиқирип, уларниң һәрикитини аҗизлитишни мәқсәт қилидикән.

Афғанистанда талибанлар көпәймәктә

Афғанистанда қайтидин тәшкиллинип, афғанистандики иттипақдаш армийә вә афған миллий армийисигә қарши һуҗумға өткән талибанларниң, аста-аста афғанстанниң һәр қайси районлиридики урушхумар йәрлик қоманданларни өз сепигә тартишқа башлиғанлиқи, афғанистан һөкүмитини һәмдә америка рәһбәрликидики иттипақдаш армийә хадимлирини қайғуландурмақта.

Өткән йили әтиязда талибанлар афғанистанда кәң көләмлик бир хәлқ қозғилиши чиқириш үчүн тиришқан, хәвәрләргә қариғанда улар бу қетим мәқситигә йетиш үчүн өткән йилға қариғанда техиму яхши тәйярлиқ көрмәктә.

Сиясий вә һәрбий мулаһизичиләрниң ейтишичә, өткән йили талибанлар афғанистанда талибанлар сепидә урушуш үчүн 40 миң кишини җәлип қилған. Бу йил талибанлар сепидә урушуши халайдиған җәңчиләрниң сани техиму көпәйгән болуп, нәччә миң киши бу мәқсәт билән аллиқачан пакистандин афғанистанниң һелмәнд өлкисиниң гәрмсиер наһийисигә өткән.

Буниңдин сирт йәнә нәччә миң киши пакистанниң баҗавәр районидин афғанистанниң күнәр, нуристан вә кабул шәһирини қоршаш үчүн тәгап райониға беришқа тәйярланмақта.

Талибанлар афғанистанниң пәктика , пәктия, хост вә ғәзни өлкилиридә аллиқачан күчлүк тәсирини турғузған болуп, хәвәрләргә қариғанда, талибанлар рәһбири молла өмәр бир нәччә һәптә ичидә йеңи қоманданларни тәйинләп, талибанларниң һәрбий қурулмисиға бәзи өзгиришләр киргүзидикән.

Талибанларниң 2006‏-йилидики асаслиқ нишани қәндәһар шәһириниң контроллуқини қолға кәлтүрүп, кабулға һуҗум қилиш үчүн тәйярлиқ қилиш иди. Сиясий мулаһизичи сед сәлим шаһзадниң асия вақти гезитидә елан қилған мақалисидә билдүрүшичә, талибанларниң һәрбий тәйярлиқлиридин уларниң бу йил кабулға һуҗум қилиш үчүн тәйярлиниватқанлиқи мәлум болмақта.

Кәчүрүм қануни тоқунушларға йо ечиши мумкин

Талибанларниң кәң көлүмлик бир һуҗум үчүн тәйярлиқи афғанистан парламенти йәрлик қоманданларниң талибанлар сепигә қетилип кетишиниң алдини елиш һәмдә талибанлар сепидә ихтилап пәйда қилиш мәқситидә бир кәчүрүм қануни қобул қилишқа зорлиған.

Сед сәлим шаһзадниң ейтишичә, гәрчә афғанистан президенти һамид кәрзәйниң баянатлиридин униң талибанларни һакимийәткә ширик қилишни халимайдиғанлиқи очуқ көрүнүп турсиму, әмма бу кәчүрүм қанун лайиһисиниң афғанистан парламентида қобул қилинғанлиқи сиясий җәһәттин муһим бир вәқә һесаблиниду. Әмма нимә болушидин қәтийнәзәр, бундақ бир кәчүрүм қануниниң афғанистан парламенти тәрипидин қобул қилиниши, афғанситандики һакимийәт билән ғәрб дөләтлири вә хәлқара кишилик һоқуқ тәшкилатлири оттурисида бир тоқунушқа сәвәб болалайду. Чүнки талибанларниң рәһбири молла өмәр вә афғанистан ислам партийисиниң рәиси һикмәтяр, афғанистанда қайтидин тәшкилләнгән талибанлар һәрикитигә йетәкчилик қиливатқан , америка вә афғанистандики иттипақдаш армийә қисимлири уларни тутуш үчүн һәрикәт елип бериватқан кишиләр. Шундақла мәзкур қанун билән қилмшилири кәчүрүм қилинған нурғун йәрлик қоманданлар, хәлқара кишилик һоқуқ тәшкилатлири тәрипидин уруш җинайити өткүзгән дәп әйибләнмәктә. (Қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт