Xristi'anliqni qobul qilghan afghanistan puqrasining aqiwiti gherb ellirini ghezeplendürmekte


2006-03-28
Share
abdulraxman-xristian-200.jpg

Abdul raxmanning xristi'an dinini qobul qilghan dep eyiblinip sotqa tartilghanliqi, gherb döletlirining bolupmu amérika hökümitining qattiq tenqidige uchridi. Afghanistan qanunlirigha asasen eger abdul raxmanning xristi'an dinini qobul qilghanliqi ispatlansa, uning ölüm jazasigha höküm qilinishi mumkin idi.

Islam dunyasi bilen gherb dunyasi arisidiki toqunushmu?

Esli bir diniy heriket bolghan talibanlarning afghanistandiki hökümranliqi jeryanida yüz bermigen bundaq bir weqening, amérikining herbiy yardimi bilen hakimiyet béshigha kelgen hemde asasen amérika we gherb döletlirining herbiy we maliye yardimi bilen hakimiyitini dawamlashturuwatqan shundaqla démokratiye mesiliside rayondiki döletlerge ülge qilip körsitiliwatqan bir dölette yüz bérishi, gherb döletlirini bolupmu, amérika hökümitini heyran qaldurdi.

Bezi siyasiy mulahizichiler, bu weqening islam dunyasi bilen gherb döletlirini yene bir toqunushning girdabigha élip kelgenlikini, islam dunyasi muhemmet peyghemberning karton resimlirining gherb metbu'atida neshr qilin'ghanliqigha naraziliq bildürgen bolsa, gherb döletlirining abdul raxmanning sotqa tartilishigha naraziliq bildürüwatqanliqini bayan qildi.

Amérika we gherb ellirining inkasi

Amérika prézidénti bush we bashqa gherb döletlirining rehberliri abdul raxmanning xristi'an dinini qobul qilghanliqi üchün qolgha élinip sotqa tartilghanliqini qattiq tenqid qilip, afghanistan prézidénti hamid karzaydin mesilini tézdin bir terep qilishni telep qildi.

Prézidént bush bu hepte ichide bergen bayanatida, abdul raxman mesilisining özini qattiq epsuslandurghanliqini tekitlep, amérika herbiy qisimliri afghanistan'gha, radikal musulman sotchilar kishilerni diniy étiqadi tüpeylidin ölüm jazasigha höküm qilsun dep emes, talibanlarning hakimiyitidin qutulushi üchün yardem qildi, dédi.

Amérika bilen birlikte afghanistanni herbiy we iqtisadiy yardem bilen teminlewatqan gérmaniye we italiye bu mesile sewebidin afghanistan'gha bériwatqan herbiy yaridimini qaytidin közdin köchürüshi mumkinliqini bildürdi. Gérmaniye ichki ishlar ministiri wolfgang shuybil, bu mesile tüpeylidin gérmaniye hökümitining afghanistan'gha bériwatqan iqtisadiy yardimini toxtitishi mumkin, dédi. Lékin afghanistan xelqining asasliq qismi, amérika we gherb döletlirining bésim we iqtisadiy yardemni toxtitish tehditlirige pisent qilmidi.

Afghan xelqining naraziliq kücheymekte

Asiya waqti gézitining xewer qilishiche, afghan mujahitlirining ataqliq rehberliridin biri we afghanistan islam iqtidar partiyisining bashliqi exmetshah exmetzey sotning qandaq qarar chiqirishidin qet'iynezer, afghanistandiki pütün diniy ölimalar abdul raxmanning choqum ölüm jazasi bilen jazalinishini telep qilmaqta, dégen.

Afghanistan diniy ölimalar kéngishining ezasi abdul ra'uf amérika birleshme agéntliqigha bergen bayanatida, biz xelqni abdul raxmanni tartip chiqip, parche ‏- parche qiliwitishke chaqirimiz, dégen.

Abdul raxmanning tughulghan jayi bolghan penjshir rayonidin nurghunlighan kishiler kabulgha kélip, sottin uni ölüm jazasigha höküm qilishini telep qilghan. Xewerlerge qarighanda, afghansitan hökümitidiki ministirlar xelqning naraziliqidin qorqup, bu mesilide ochuq bir pikir bayan qilishtin özlirini qachurghan.

Bu weqedin afghanistandiki taliban qalduqliri we radikal diniy guruppilar afghanistan xelqini amérika we gherb döletlirige qarshi qozghash üchün paydilinishi mumkin.

Gwentanamoda amérikiliq soraqchilarning qur'an kerimni depsende qilghanliqi toghrisidiki xewerler hemde gherb metbu'atida muhemmet peyghemberning karton resimlirining neshr qilin'ghanliqi afghanistanda nurghun kishilerning naraziliqini qozghap, qanliq namayishlarning yüz bérishige seweb bolghan idi.

Bezi xewerlerge qarighanda, 16 yil burun afghanistanda pa'aliyet élip barghan bir chet'el tibbiy yardem teshkilatida ishlewatqan mezgilide xristi'an dinini qobul qilghan abdul raxmanning mesilisi, jiddiy siyasiy tesiratidin bashqa yene diniy étiqad mesilisi afghanistandimu bezi jiddiy su'allarni otturigha chiqarmaqta. (Qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet