Дуня әйдиз күни мунасивити билән доктор муһәммәт имин әпәндини зиярәт

• Мухбиримиз меһрибанниң бу һәқтики мәлумати
• Download story audio

2006 – Йили 1 – декабир күни хитайниң шеняңшәһиридә бир раһибә чоң бир қизил лента тәйярлимақта. AFP

Бу йилқи дуня әйдиз күниниң баш темиси "әйдизни тизгинләп, вәдимиздә турайли" дегән шуар болуп, бу күнниң йетип келиши билән, бирләшкән дөләтләр тәшкилатиниң баш катипи кофи аннан һәрқайси дөләт рәһбәрлирини өз вәдилиридә туруп, әйдизни тизгинләп, униң алдини елип, җәмийәттики аҗиз тәбиқиләрни қоғдашқа чақирди.

Бирләшкән дөләтләр тәшкилати дуня әйдиз күни елан қилған 2006 ‏- йиллиқ доклатида, әйдиз кесилиниң асия дөләтлиридики тарқилиш әһвалиниң интайин еғир болуватқанлиқи, болупму хитайдики әйдиз вәзийитиниң техиму җиддий һаләткә йәткәнлики алаһидә оттуриға қоюлған болуп, бу һәқтә хитай һөкүмити қилишқа тегишлик ишларниң техиму көп икәнлики алаһидә тәкитләнгән.

Доклатта ейтилишичә, 25 йилдин буян, дуняда 25 милйон адәм әйдиз кесили түпәйлидин өлгән һәмдә 40 милйон адәм әйдиз вируси билән юқумланған. Асия районида болса, әйдиз вируси билән юқумланғучилар сани8 милйон 600 миңға йәткән болуп, хитайдики әйдиз вируси билән юқумланғучилар саниниң өзила 650 миңдин ашқан һәмдә көпийиш нисбити бир йил ичидә 30 % өрлигән.

Бу қетимқи дуня әйдиз күни йетип келиш алдида, хитай һөкүмити өзиму мәзкур дөләттики әйдиз апитиниң һәқиқәтән наһайити еғир һаләттә икәнликигә иқрар болған һәмдә уйғур елидики әйдиз апитиниңму илгирики йилларға қариғанда техиму бәк әвҗ елип кетиватқанлиқини етирап қилған.

Нюйорктики медитсина тәтқиқатчиси, уйғур елидики әйдиз мәсилиси һәққидә изчил тәтқиқат елип бериватқан доктор муһәммәт имин әпәнди дуня әйдиз күни мунасивити билән зияритимизни қобул қилди.