Eydizdin saqlinishning charisi zinadin yiraq turushtur

Namelum eydiz chékermenlirining körünüshi chüshürülgen süret.

Dunya sehiye teshkilati teripidin kishilerni eydiz késilining xetiridin agahlandurush meqsiti bilen her yili eydizdin ibaret bu iplas aghriqning xetirini bayan qilish we uningdin saqlinish charilirini otturigha qoyush ishliri dawam qilmaqta.

Eydiz aghriqi üchinchi dunya elliride köp

Eydizdin saqlinish we uning xetiridin agahlandurush programmisining ottura sherq boyiche tonulghan mutexessisi proféssor xedije mu'elli 2011 - yilliq eydiz doklatida mundaq dep yazghan:“Özige eydiz wirusini yuqturuwalghanlarning sani shimaliy afriqa bilen ottura sherq döletliride intayin köp bolup, 2007 - yildiki resmiy statistikigha asaslan'ghanda, eydiz késilige griptar bolghanlarning sani 380ming ademge yetken. Birleshken döletler teshkilatining eydizning aldini élish programmisi teripidin élan qilin'ghan statistikigha asaslan'ghanda, shimaliy afriqa we ottura sherq döletliride eydiz késlige muptila bolghanlardin aran yüzde 5 pirsentila dawalinish imkaniyitige ige bolalaydiken. Qalghanliri ölümge mehkum iken. Ereb döletliride eydiz wirusigha yoluqqan kishilerdin yüzde 90 pirsentining buni hés qilalmay kéliwatqanliqi bekmu échinishliq ish.”

Eydiz wirusi zinadin kélidu

Dunyadiki barche dinlar eng awwal insanlarning bext sa'aditini we xatirjem, dert - elemsiz hayat kechürüshini arzu qilidu. Xususen samawi dinlarning peqet insanlarning bext - sa'aditi üchün kelgenlikide qilche shek yoq. Dunyada her qandaq bir din aldi bilen kishilerni zinadin tosidu. Zinani men'i qilmaydighan birmu din yoq dunyada. Chünki zina a'ilini parchilaydighan, ademni aghriqchan qilidighan, balilarni yétim qilidighan, muhebbetni nepretke, jennet kebi a'ilini dozaqqa ayalandurup qoyidighan yaman qilmishtur.

Islam ölimaliri eydiz késilining peyghember eleyhissalam hediste agahlandurghan xeterlik aghriq ikenlikini sözlimekte. Peyghember eleyhissalam mundin 1400yil ilgiri kishilerni zinaning xetiridin agahlandurup:“Qandaqla bir millette zina - pahishe köp bolidiken, ulargha ilgirikilirige kélip baqmighan késellik yétidu” dégen. Hediste közde tutulghan“Késellik”ning eydiz ikenlikini islam ölimaliri sözlimekte.

Islam ölimalirigha köre, insanlar allahning körsetmisi boyiche hayat kechürüp, özlirini haram ishlardin yiraq tutsa, ular mundaq iplas aghrilardin we türlük bextsizliklerdin elwette aman qalidu.