Albaniyidiki Uyghurlardin ababekri qasim amérika- albaniye munasiwiti we kosowa mesilisi üstide toxtaldi

• Muxbirimiz welining bu heqtiki toluq melumati
• Download story audio

Amérika prézidénti jorj bush sana'etleshken sekkiz dölet bashliqliri yighinigha qatnishish jeryanida chéxiye, polsha, italiyilerni ziyaret qilghandin kéyinla, 6 ‏- ayning 9 ‏- küni albaniyini ziyaret qildi.

Jorj bushning bu qétimqi albaniye ziyariti amérika prézidéntining albaniyini tunji qétim ziyaret qilishi bolup hésablinidu. Albaniye bolsa térrorchiliqqa qarshi urushta amérikini eng küchlük qollighan döletlerning biri bolup hésablinidu. Albaniyimu térrorchiliqqa qarshi turush üchün iraq, afghanistanlargha herbiy qisim ewetken.

Amérikining dölet radi'o istansisi n p r ning xewer qilishiche, jorj bush albaniyige kelgende tirana shehirining pak-pakize kochiliridiki retlik imaretlerge amérikining dölet bayriqi ésilghan, jorj bushning we uning repiqisi lora bush xanimning resimlirini kötüriwalghan albanlar bushning aldigha chiqip qizghin qarshi alghan. Albaniyide bu künni xatirilesh üchün mexsus pochta markisi tarqitilghan.

Jorj bilen sali bérisha kosowa mesilisi üstide sözleshken

Ikkinji dunya urushidin kéyin, taki 1992 ‏- yili albaniyide tunji qétimliq prézidént saylimi élip bérilghan'gha qeder, albaniye xelqi pütünley sowét ittipaqining idare qilishi astida yaki yerlik diktator hakimiyetning yuqiri bésimliq siyasitide ézilishke uchrap kelgen idi.

Resimlik xewerlerdin melum bolushiche, bu qétim amérika prézidénti jorj bush albaniyige kelgende, albaniye xelqning qizghin qarshi élishigha érishken. B b s ning xewer qilishiche, jorj bush bu qétimqi 7 sa'etlik ziyariti jeryanida, albaniyining bash ministiri sali bérisha bilen kosowaning musteqil bolush mesilisi heqqide sözleshken.

Amérika prézidénti jorj bush asasiy ahalisi albanlar bolghan kosowaning musteqilliq pilani téz emelge ashurulushi lazim , dégen teshebbusni otturigha qoyghan, gerche sana'etleshken sekkiz dölet bashliqliri yighini jeryanida rusiye prézidénti putin birleshken döletler teshkilatida kosowaning musteqil bolushi heqqide qarar maqullashqa qarshi turidighanliqini ipadiligen bolsimu, lékin prézidént bush beribir kosowaning musteqilliqini qollaydighanliqini tekitligen .

Albaniye shimaliy atlantik okyan ehdi teshkilati ( NATO )gha eza bolushni arzu qilidu

Jorj bushning albaniye ziyariti jeryanida, albaniye hökümiti albaniyining shimaliy atlantik okyan ehdi teshkilati( NATO )gha we yawropa birlikige eza bolup kirish arzusi barliqini ipadiligen.

Ababekri qasim amérika- albaniye munasiwiti we albaniyiliklerning kosowa mesilisidiki qarashlirini bayan qildi.

Hazir albaniyide turuwatqan besh neper Uyghurdin ababekri qasimning bayan qilishiche, jorj bush albaniyige kelgen waqit, ularning bashqa sheherdiki déngiz sahillirigha sayahet qilghili ketken waqtigha toghra kelgenliki, özliri tiranada bolmighanliqi üchün ziyaret ehwalini neq meydanda körelmigenlikige epsuslinidiken.

U özi albaniyide turush jeryanida amérika -albaniye munasiwitining nahayiti yaxshi ikenlikini hés qilghan. Uning qarishiche yene, rusiyining kosowa musteqilliqigha qarshi turushi rusiyidiki bashqa milletlerning, shundaqla Uyghurlarning musteqilliq heriketliridin saqlinishni meqset qilidiken.(Weli)