Алвасти қуюнидин һәзәр әйләң


2007-04-05
Share

Хитай қанун ториниң йеқинқи учурлириға асасланғанда 1998 - йили 4 - айда хитай даирилири тәрипидин мәхсус чәкләш қануни чиқирилип қаттиқ бастурулған шахлитип сетиш, йеқиндин буян башқа хил ниқаплар билән гуаңши җуаңзу аптоном районида қайтидин баш көтүргән болуп, улар асасән хитайниң ғәрбий районлиридики аз санлиқ милләт хәлиқлирини зиянкәшликкә учритиш обйекти қилмақта икән. Нөвәттә гуаңшиниң аммивий телифонлирини асасән шахлитип сетишқа киришкән кишиләр игилигән икән.

Демәк гуаңши җуаңзу аптоном райониға "милйонер" болимиз дәп кетиватқан уйғурлар барғанчә көпийиватқан болуп, улар һәтта шахлап сетишниң характерини билмигән асаста пәқәт йеқинлириниң телефонда қилған асанла бай болуш нәзирийилиригә ишинип бу алвасти қуюниға ғәрқ болмақта икән. Буларниң ичидә анчә ‏- мунчә қанундин савади болған, вәзийәттин хәвәрдар, һошяррақ кишиләр болса, буниң бир алдамчилиқтин башқа нәрсә әмәсликини байқап әгәшмигәнлириму бар әлвәттә. Йеқинда ақсуда әзәлдин һалал әмгики билән тапавәт қилип яшап келиватқан бир киши, өз акисиниң шахлап сетишқа қатнишиш үчүн гуаңшиға келиш тәклипини рәт қилған.

Биз гуаңшидики ақсудин кәлгән уйғурлар арисида хели бурун шахлитип сетишқа киришкән һәмдә бир қанчә он уйғурни бу қуюнға сөрәп киргән әхмәтҗан исимлик бир киши билән янфони арқилиқ алақилаштуқ, у дәсләп маңиму бир йеңи йәмчүк сүпитидә муамилә қилған болсиму, бизниң әркин асия радиоси мухбири икәнликимизни билгәндин кейин дәрһал сирлиқ қияпәткә өтти.

Бу киши өзи қатнишиватқан бу содиниң шахлитип сетиш икәнликини рәт қилған болсиму, әмма бунчә тез пул тепиватқан содисиниң зади немиликини өзиму дәп берәлмиди, шундақла башқа соаллиримизғиму интайин муҗимәл җавабларни бәрди.

Иқтисад, сода саһәсидә шахлап сетишқа "қиммәтлик мал сетиш усули, малниң өзини әмәс бәлки малниң васитиси билән кишилик мунасивәтни, ишәнчини сетиш " дәп баһа бәрсә, алдамчилиқ билән тапавәт қилидиған кишиләр буниңға юқири сәвийилик логикилиқ алдамчилиқ, калла ююш сәнити, юмулиғансири йоғинайдиған дәсмайә, сирлиқ тапавәт қуюни дейишиду.

Әмәлийәттә болса шахлитип сетиш, ширкәтни йепинча қилған, һәр хил сода таварлирини сода қорали қилған, кишиләрни алдап елип киришни сода йоли қилған, пәқәт телефон қатарлиқ алақә вастилири арқилиқ кишиләрни алдап, устилиқ билән тоқуп чиқилған, қаримаққа логикилиқ әмәлийәттә болса ялғанчлиқини, кишиләрни алдап дәсмайә салғузуш арқилиқ чаңгаллап тутуп туруп, шахлитип пул тепишни сода низами қилған, хәлқни еғир зиянларға учритиватқан қанунсиз һәмдә интайин зор бир түрлүк җинайи тәшкилат. Униң сирлиқ йүзи йиртип ташлинип хитайда " алвасти қуюни " дәп һәммә һәзәр әйләватқан пәйттә уйғурларниң бу қуюнға әгишиши уйғур җәмийитидә ғулғула пәйда қилмақта, бу мунасивәт билән биз уйғурларниң алдамчилиқларға қарита өз қануни һоқуқини қандақ қоғдиши керәклики һәққидә мәслиһәт соридуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт