Amérika, xelq pulining kursi we xitayning amérika bixeterlikige salidighan tehditi heqqide agahlanduruldi

Amérika -xitay iqtisadi bixeterlik közitish komitéti charshenbe küni doklat élan qilip, amérika -xitay munasiwitide duch kéliwatqan bezi achquchluq mesililer heqqide amérika hökümiti we dölet mejlisige bezi tewisiyilerni berdi. 316 Betlik doklat soda -iqtisad, bixeterlik, énirgiye muhit, uchur alaqe qatarliq sahelerge chétilghan.
Muxbirimiz erkin
2010-11-18
Élxet
Pikir
Share
Print
Amérika parlamént binasining sirtqi körünüshi.
Amérika parlamént binasining sirtqi körünüshi.
www.house.gov Din élindi.

Doklatta amérika - xitay munasiwitidiki achquchluq mesililerdin sodiki qizil reqem, xitay xelq pulining kursi, xitay herbiy tereqqiyatining amérika bixeterlik menpe'etige salidighan tehditi qatarliq jehetlerde amérika hökümitini we dölet mejlisini agahlandurghan.

Amérika - xitay iqtisadi bixeterlik közitish komitéti charshenbe küni élan qilghan bu yilliq doklatida otturigha qoyulghan eng muhim mesililerdin biri soda - iqtisad , xelq pulining kursi we xitayning amérika bixeterlik menpe'etige salidighan tehditidur. Doklatta xitayning dawamliq xelq puli kursini kontrol qilip, adaletsiz sodidin payda tépiwatqanliqi ilgiri sürulgen.

Doklatta, xitay hökümitining 2000‏ - yili dunya soda teshkilatigha eza bolup kirishtin burun bergen nurghun wedilirini ijira qilmighanliqini eskertip, éksportni tayanch qilghan xitay iqtisadi xelq pulining kursini kontrol qilish, memliket ichidiki karxanilarni heqsiz yer, erzan eslihe we ösömsiz qerz qatarliq wastiler, baj qayturush qatarliq usullar arqiliq memliket ichidiki karxanilargha qoshumche yardem bériwatqanliqini, buning dunya soda teshkilati qa'idisige xilap ikenlikini tekitligen.

Doklatta eskertilishiche, 2010‏ - yili amérikining xitay bilen bolghan soda qizil reqimi dawamliq chongayghan bolup, bu yilning deslepki 8 éyida xitay amérikigha 229 milyard 200 milyon dollarliq tawar éksport qilghan. Lékin amérika oxshash mezgilde xitaygha 55 milyard 800 milyon dollarliq mal satqan.

Amérikining bu mezgildiki soda qizil reqimi 173 milyard 400 milyon dollargha yétip, ötken yilqidin 6.20 Pirsent köpeygen. Doklatta yer shari iqtisadi krizisigha qarimay, xitay éksport sodisining dawamliq éship barghanliqini eskertip, buningda xitayning chet'el karxanilirini yeklep, öz karxanilirigha bir tereplimilik yan bésishi, xelq pulining kursini kontrol qilishi qatarliq amillarning roli barliqini, amérikining xitay bilen bolghan sodidiki qizil reqimi amérika iqtisadining tereqqiyatigha zor tosalghu peyda qiliwatqanliqini tekitligen. ‏

Amérika - xitay iqtisadi bixeterlik közitish komitétining re'isi dani'al sléyn, charshenbe küni doklat élan qilish munasiwiti bilen élan qilghan bayanatida "xitayning xelq puli kursini kontrol qilishi amérika karxanilirigha we xizmet bazirigha ziyan séliwatqanliqi"ni eskertip, " nöwettiki weziyettin qarighanda xitayning xelq puli kursini bazar arqiliq tengshesh niyiti yoqluqi"ni bildürgen.

Dani'al sléyn radi'omizgha söhbet élan qilip, xitay hökümitining ichki bazirini amérika karxanilirigha échiwétish niyiti barliqidin gumanlinidighanliqi, eger bundaq kétiwerse amérika karxanilirini dölet ichige qayturup kélip, ishqa orunlishishni kücheytishtin bashqa yol qalmaydighanliqini ilgiri sürdi. U, "méning shexsi qarishimche, xitay hökümitining gherizide chet'el karxanilirining jümlidin ammibap mator we ammibap éléktir sana'iti qatarliq amérika karxanilirining xitay bazirigha kirip riqabet qilishigha yol qoyush meyli yoq. Ular peqet xitay - chet'el shérikchilikidiki karxanilarning téxnikisini xitaylar igilep bolghandin kéyin, andin chet'el shirketlirige bazirini échiwétishni oylawatqan bolushi mumkin. Buning axirqi hel qilish charisi peqet amérika karxanilirini amérikining memliket ichige qayturup kélish bolup qalidu. Shundaq qilghandila amérikiliqlargha xizmet tépip bergili bolidu. Amérika hökümiti choqum baj jehette qolayliq yaritish qatarliq usullar arqiliq amérika karxanilirining amérika zéminida ishlepchiqirish bilen shughullinishigha ilham bérishi kérek" dep körsetti.

Dani'al sléynning eskertishiche, xitay hökümiti özining memliket ichidiki karxanilirigha étibar bérip, chet'el karxanilirini yeklesh siyasiti yürgüzüp, chet'el karxanilirining merkez, ölke we yerlik hökümetler bilen soda toxtami tüzüshini pütünley tosashqa tirishmaqtiken. Amérika - xitay iqtisadi bixeterlik közitish komitéti 2000‏ - yili xitay dunya soda teshkilatigha eza bolup kirishtin sel burun qurulghan dölet mejlisining meslihet bérish organi bolup, bu komitétning xizmiti amérika - xitay soda iqtisad munasiwiti we bu munasiwetning amérika bixeterlik menpe'etige yetküzidighan tesiri qatarliq mesililerde doklat hazirlap, dölet mejlisige yollashtur.

Mezkur komitétning bu yilliq doklatida yene, xitayning amérika bixeterlik menpe'etige salidighan tehditi otturigha qoyulup, xitay hawa we bashqurulidighan bomba qisimlirining zamaniwéylishish qedimi tézleshkenlikini, amérikining rayondiki bazilirigha we herbiy orunlashturushigha tehdit sélish küchi ashqanliqini tekitligen.

Doklatta, "eger xelq azadliq armiyisining rayondiki amérika bazilirigha qaratqan her qandaq hawa we bashqurulidighan bomba hujumi muppeqiyet qazansa, rayondiki amérika bazilirining waqitliq taqilishi mumkinliki we amérika armiyisining sherqiy asiyadiki herbiy herikiti ongushsizliqqa uchraydighanliqi"ni ilgiri sürgen.

Amérika - xitay iqtisadi bixeterlik közitish komitétining mu'awin re'isi karolin bartomoli'o, charshenbe küni chaqirilghan axbarat élan qilish yighinida xitay hawa we bashqurulidighan küchining zamaniwéylishishigha yéqindin diqqet qiliwatqanliqini eskertip, xitay herbiy küchining amérika herbiy küchi we herbiy bazilirigha tehdit sélish iqtidari ashqanliqini eskertti. Komitét re'isi dani'al sléyn bolsa xitayning teywen boghuzida urush partlisa, amérika qisimlirining teywen boghuzigha kirishini tosiyalaydighan qudretlik déngiz armiye küchi berpa qiliwatqanliqini bildürgen. U mundaq deydu" : xitay herbiy zamaniwiylashturush qedimini pütün küchi bilen algha sürüwatidu. Hawa armiyisi jehette 4‏ - ewlad küreshchi ayropilanlirini köpeytti. Xitay yene teywen boghuzida urush partlap qalsa, amérikining tinch okyan rayonidiki déngiz armiyisining teywen boghuzigha kirishini tosalaydighan qudretlik déngiz armiye küchi berpa qilmaqta. Buningdin sirt yene , xitay jasusliri amérikining mexpiyetlikini köplep oghrilap, béyjingning herbiy we iqtisadi küchini kücheytishke ishletmekchi boluwatidu. Xitayning amérikigha qaratqan jasusluq herikiti we tor hujumi meyli kölem jehettin, küchlüklük derijisi jehettin we yaki tejribe jehettin bolsun zor derijide yuqiri kötürüldi."

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet