Америка президенти буш, америка - яврупа мунасивитини күчәйтишни тәкитлиди


2005-02-21
Share
EU-US-BUSH-CHIRAC-200.jpg
21-Феврал күни, америка президенти җорҗи буш билән франсийә президенти җәк ширак билән брюсселда. AFP

Америка президенти җорҗ буш, йәкшәнбә күни белгийиниң пайтәхти брюсселға йетип келип, явропаға қаратқан 5 күнлүк зияритини башливәтти.

Буш: яврупа билән шималий америка дуня бихәтәрликиниң асаслиқ таянч күчи

Президент буш яврупа иттипақи вә шималий атлантик әһди тәшкилатиниң баш шитаби брюсселда яврупа иттипақи вә шималий атлантик әһдә тәшкилатиниң рәһбәрлиригә, атлантик окяндин һалқиған иттипақлиқ қәдимини башлаш дәвриниң йетип кәлгәнлики һәққидә тохтилип " яврупа билән шималий америка дуня бихәтәрликиниң асаслиқ таянч күчи" дәп көрсәтти.

Җорҗ буш сөзидә, дуня тинчлиқи вә демократийини илгири сүрүш үчүн америка билән яврупа иттипақи арисидики достлуқниң интайин муһим икәнликини һәмдә америкиниң оттура шәрқ тенчлиқ пиланини ишқа ашуруш үчүн, яврупа иттипақиниң қоллишиға еһтияҗлиқ икәнликини тәкитлиди.

Җорҗ буш бу һәқтә оттуриға қойған нутқида, пәләстин - исраилийә тоқунушни тохтитиш, нөвәттики муһим нишанниң бири икәнликини тәкитләш билән биргә йәнә яврупа иттипақидики бир қисим рәһбәрләрниң бу һәқтики қарашлирини қоллайдиғанлиқини билдүрди.

Америка- яврупа мунасивитиниң әһмийити тоғрисида тохталған җорҗ буш йәнә, яврупаниң интайин күчлүк болушини үмид қилидиғанлиқини, америкиниң пүткүл дуняда әркинликни ишқа ашуруш йолида көрситиватқан тиришчанлиқи үчүн, ирадилик бир һәмраһниң керәкликини оттуриға қойди.

У бу һәқтә тохтилип : " бизниң достлиқимиз пүтүн йәр шариниң тинчлиқи, ронақ тепиши билән зич мунасивәтлик, һәр қандақ вақитлиқ ихтилап, һөкүмәтләр арисида буниңдин илгири йүз бәргән зиддийәтләр вә дунядики һечқандақ күч бизни айривитәлмәйду" деди.

Ирақни тоғра сиясәт, иқтисад вә бихәтәрлик тәдбирлири билән тәминләш керәк

Җорҗ буш, яврупа билән америка арисида ирақ мәсилисидә йүз бәргән анчә - мунчә ихтилапларни муәййәнләштүрүп, һазир дуняда әң йеңи һесабланған демократик бир ирақниң қурулғанлиқини, әмдиликтә йеңидин қурулған бу ирақни тоғра сиясәт, иқтисад вә бихәтәрлик тәдбирлири билән тәминләш керәкликини алаһидә тәкитлиди.

Бу арида америкиниң яврупа иттипақида турушлуқ баш әлчиси, президент бушниң иккинчи қетим вәзипигә тәйинләнгәндин кейин тунҗи қетим яврупа иттипақида елип барған зияритиниң интайин муһим вә әһмийәтлик икәнликини билдүрүп, мәзкур зиярәт вә президент бушниң яврупа билән болған мунасивәт һәққидә билдүргән күчлүк вә ениқ ипадисиниң кәлгүси америка вә яврупа мунасивитигә йеңи бир һаяти күч беғишлайдиғанлиқини әскәртти.

Җорҗ бушниң яврупа иттипақида елип баридиған бәш күнлүк зиярити мунасивити билән, яврупа иттипақи брюсселда 2 миң 500 сақчини һәмдә америкиниң 250 нәпәр алаһидә бихәтәрлик хадимлирини орунлаштуруп, зиярәт давамидики бихәтәрлик хизмәтлирини ишлиди.

Бу арида йәнә, җорҗ бушниң зияритигә нарази болған нәччә миңлиған намайишчилар, буш белгийигә йетип келиши билән тәң, брюссел шәһәр мәркизидә наразилиқ намайиши өткүзди.

Җорҗ буш, брюсселдики үч күнлүк зияритидә яврупа иттипақиниң рәһбәрлири билән учрашқандин сирт, шималий атлантик әһдә тәшкилатини зиярәт қилиду, у сәйшәнбә вә чаршәнбә күнлири йәнә франсийә президенти җәк ширак, әнгилийә баш министири тонй беләйер вә германийә баш миниситири герхард шурудерләр билән учришиду. Президент буш пәйшәнбә күни словакийидә елип баридиған зиярити давамида русийә президенти виладимир путин билән учрашмақчи. (Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт