Amérika prézidénti bush, amérika - yawrupa munasiwitini kücheytishni tekitlidi


2005.02.21
Share on WhatsApp
Share on WhatsApp
EU-US-BUSH-CHIRAC-200.jpg
21-Féwral küni, amérika prézidénti jorji bush bilen fransiye prézidénti jek shirak bilen bryussélda. AFP

Amérika prézidénti jorj bush, yekshenbe küni bélgiyining paytexti bryussélgha yétip kélip, yawropagha qaratqan 5 künlük ziyaritini bashliwetti.

Bush: yawrupa bilen shimaliy amérika dunya bixeterlikining asasliq tayanch küchi

Prézidént bush yawrupa ittipaqi we shimaliy atlantik ehdi teshkilatining bash shitabi bryussélda yawrupa ittipaqi we shimaliy atlantik ehde teshkilatining rehberlirige, atlantik okyandin halqighan ittipaqliq qedimini bashlash dewrining yétip kelgenliki heqqide toxtilip " yawrupa bilen shimaliy amérika dunya bixeterlikining asasliq tayanch küchi" dep körsetti.

Jorj bush sözide, dunya tinchliqi we démokratiyini ilgiri sürüsh üchün amérika bilen yawrupa ittipaqi arisidiki dostluqning intayin muhim ikenlikini hemde amérikining ottura sherq ténchliq pilanini ishqa ashurush üchün, yawrupa ittipaqining qollishigha éhtiyajliq ikenlikini tekitlidi.

Jorj bush bu heqte otturigha qoyghan nutqida, pelestin - isra'iliye toqunushni toxtitish, nöwettiki muhim nishanning biri ikenlikini tekitlesh bilen birge yene yawrupa ittipaqidiki bir qisim rehberlerning bu heqtiki qarashlirini qollaydighanliqini bildürdi.

Amérika- yawrupa munasiwitining ehmiyiti toghrisida toxtalghan jorj bush yene, yawrupaning intayin küchlük bolushini ümid qilidighanliqini, amérikining pütkül dunyada erkinlikni ishqa ashurush yolida körsitiwatqan tirishchanliqi üchün, iradilik bir hemrahning kéreklikini otturigha qoydi.

U bu heqte toxtilip : " bizning dostliqimiz pütün yer sharining tinchliqi, ronaq tépishi bilen zich munasiwetlik, her qandaq waqitliq ixtilap, hökümetler arisida buningdin ilgiri yüz bergen ziddiyetler we dunyadiki héchqandaq küch bizni ayriwitelmeydu" dédi.

Iraqni toghra siyaset, iqtisad we bixeterlik tedbirliri bilen teminlesh kérek

Jorj bush, yawrupa bilen amérika arisida iraq mesiliside yüz bergen anche - munche ixtilaplarni mu'eyyenleshtürüp, hazir dunyada eng yéngi hésablan'ghan démokratik bir iraqning qurulghanliqini, emdilikte yéngidin qurulghan bu iraqni toghra siyaset, iqtisad we bixeterlik tedbirliri bilen teminlesh kéreklikini alahide tekitlidi.

Bu arida amérikining yawrupa ittipaqida turushluq bash elchisi, prézidént bushning ikkinchi qétim wezipige teyinlen'gendin kéyin tunji qétim yawrupa ittipaqida élip barghan ziyaritining intayin muhim we ehmiyetlik ikenlikini bildürüp, mezkur ziyaret we prézidént bushning yawrupa bilen bolghan munasiwet heqqide bildürgen küchlük we éniq ipadisining kelgüsi amérika we yawrupa munasiwitige yéngi bir hayati küch béghishlaydighanliqini eskertti.

Jorj bushning yawrupa ittipaqida élip baridighan besh künlük ziyariti munasiwiti bilen, yawrupa ittipaqi bryussélda 2 ming 500 saqchini hemde amérikining 250 neper alahide bixeterlik xadimlirini orunlashturup, ziyaret dawamidiki bixeterlik xizmetlirini ishlidi.

Bu arida yene, jorj bushning ziyaritige narazi bolghan nechche minglighan namayishchilar, bush bélgiyige yétip kélishi bilen teng, bryussél sheher merkizide naraziliq namayishi ötküzdi.

Jorj bush, bryusséldiki üch künlük ziyaritide yawrupa ittipaqining rehberliri bilen uchrashqandin sirt, shimaliy atlantik ehde teshkilatini ziyaret qilidu, u seyshenbe we charshenbe künliri yene fransiye prézidénti jek shirak, en'giliye bash ministiri tony béleyér we gérmaniye bash minisitiri gérxard shurudérler bilen uchrishidu. Prézidént bush peyshenbe küni slowakiyide élip baridighan ziyariti dawamida rusiye prézidénti wiladimir putin bilen uchrashmaqchi. (Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet