Amérika bilen gérmaniye, otturidiki ixtilaplar boyiche chüshenche hasil qildi

• Muxbirimiz erkinning bu heqtiki xewiri
• Download story audio

23-Féwral, amérika prézidénti bush, gérmaniye bash ministiri gérxard shrödir bilen bille

Amérika prézidénti jorji bush yawropadiki sepirining 3 - küni gérmaniyini ziyaret qilip, bash ministir gérxard shrödir bilen iraq urushi shundaqla iran mesilisini öz ichige alghan ikki dölet menpe'etige alaqidar xelq'ara mesililer boyiche ortaq chüshenche hasil qildi. Biraq xitaygha qaritilghan qoral - yaraq imbargosini saqlap qélish mesiliside yawropaliqlarni qayil qilalmighan.

Iranning yadro qorallirigha ége bolushigha yol qoyulmaydu

Yadro qorallar mesilisi boyiche iranni agahlandurghan prézidént bush bilen gérmaniye bash ministiri shrödir, iranning yadro qorallargha ige bolushigha yol qoyulmaydighanliqini bildürdi. Bu prézidént bushning iraq urushi baghlan'ghan ikki yildin béri tunji qétim gérmaniyini ziyaret qilishi bolup hisaplinidu. Gérmaniye bush hökümitining iraqni ishghal qilish qararigha qarshi chiqqan. Amérika prézidénti bilen gérmaniye bash ministiri, yuqiriqi sözlerni charshenbe küni gérmaniyining méyniz shehiride uchrashqandin kéyin ötküzgen muxbirlarni kütüwélish yighinida tekitlidi.

Bush mundaq deydu: " iran, bixeterlik we tinchliq üchün yadro qorallargha ige bolmasliqi kérek. Bu jehette en'giliye, fransiye, italiye, gérmaniye we amérikilar ortaq pikirige ige."

Iran, bixeterlik we tinchliq üchün yadro qorallargha ige bolmasliqi kérek. Bu jehette en'giliye, fransiye, italiye, gérmaniye we amérikilar ortaq pikirige ige." Munasiwetlik maqalilar

Prézidént bush, xelq'ara jem'iyet iranning yadro qorallarni tereqqiy qildurushigha bolmaydighanliqini ortaq bir til bilen bildürüshning intayin muhimliqini eskertti. U mundaq deydu:

" Biz dostlirimiz bilen mollilarning yadro qorallardin waz kéchishi kéreklikini chüshüniwélishi üchün birge heriket qilimiz. Kishilerge shu eskertmekchimenki diplomatiyimiz emdi bashlandi. Iran bolsa iraq emes," dep körsetti.

Shrödir, iran mesiliside prézidént bush bilen oxshash qarashqa igilikini bildürgen. U, " biz iranning her qandaq tiptiki yadro qorallarni ret qilishi kéreklikige qoshulimiz," dep körsetti.

< Amérika amma her qandaq yolni sinap körüshtin yanmaydu

Prézidént bushning tekitlishiche, xelq'ara jem'iyet téhranni yadro qorallar pilanidin waz kéchishke izchil türde ündeydiken. Prézidént bush seyshenbe küni amérikining iran'gha hujum qilish niyiti yoqliqini, amma her qandaq yolni sinap körüshtin yanmaydighanliqini bildürgen idi. Bush, muxbirlarni kütüwélish yighinida amérika - gérmaniye munaswitining saghlamliqini eskertti. U mundaq deydu: " bash ministir shrödir bilen ötküzgen söhbitimde sh a o e t ning muhimliqini yene bir qétim mu'eyyenleshtürduq."

Shrödir, méynizda ötküzülgen söhbetning sel aldida amérika bilen gérmaniye otturisidiki ixtilaplarning ötmüshke aylan'ghanliqini élan qilghan. Prézidént bushning yawropadiki ziyaritining meqsidi iraq urushi sewebidin buzulghan yawropa - amérika munaswitini eslige keltürüsh bolup, imbargo mesilisi ziyaret küntertipining bir qisimini igilidi.

Xitaygha qaritilghan qoral imbargo mesili

Prézidént bush, bryusélda amérikining imbargo mesilisidiki endishilirini tilgha alghan. Bush, amérikining qoral - yaraq ötünüp bérish shundaqla xitaygha téxnika éksport qilish mesilisige köngül bölidighanliqini eskertip, bu xitay bilen teywen otturisidiki munasiwetler tengpungliqini özgertiwétishi mümkin," dep tekiligen.

Fransiye prézidénti jak shrak, imbargoni bikar qilish qararini aqlap, u, qoral - yaraq imbargosi tyen'enmin weqesining mehsuli, dep körsetken. Prézidént bush, yawropa döletliri imbargoni bikar qilmaqchi bolsa, aldi bilen amérika dölet mejlisini qayil qilishigha toghra kélidighanliqini bildürdi. Amérika dölet mejlisidiki bezi ezalar, yawropa ittipaqi imbargoni bikar qilsa, öch élish xaraktirlik qanun chiqiridighanliqini agahlandurghan. (Erkin)