Америка оттура асиядики һәрбий базилирини чекиндүрмәйду


2005-07-26
Share
Америка дөләт мудапиә министири доналд рамсфелд қирғизистан президенти қурманбег бақийеф билән бешкәктә. AFP

Таҗикистанда зиярәттә болуватқан америка дөләт мудапиә министири доналд рамсфелд, таҗикистан даирилириниң америка таҗикистан һава тәвәси вә һәрбий әслиһәлирини давамлиқ ишләтсә болиду, дегән вәдисигә еришти.

Таҗикистан америка билән давамлиқ һәмкарлишиду

Рамсфелд сәйшәнбә күни пайтәхт дүшәнбидә таҗикистан президенти имам әли рахманов билән сөһбәт елип барди.

Франсийә ахбарат агентлиқиниң хәвәр қилишичә, уларниң сөһбити америка - таҗикистан һәрбий һәмкарлиқини асаси тема қилған. Таҗикистан ташқи ишлар министири талбах назаров, америка вә франсийә һәрбий айропиланлириниң учуш вә таҗикистанда май қачилаш мәшғулати тоғрисида тохтилип, " таҗикистан хәлқара җәмийәтниң тәлипини нәзәрдә тутуп кәлди вә шундақ қилишни давамлаштуриду," дәп тәкитлигән.

Доналд рамсфелд, талбах нәзәров билән өткүзгән мухбирларни күтүвелиш йиғинида, " биз икки дөләт йәр шари характерлик диний әсәбийликкә қарши туруш шундақла афғанистанда муқимлиқни вә тинчлиқни орнитиш йолидики мустәһкәм шерикләр," дәп көрсәтти.

Талбах нәзәров, америка башчиқилидики иттипақдаш күчләрниң афғанистанда талибан һакимийини ағдуруш һәрикити " оттура асия райониға келиватқан тәһдитни бикар қилди," дәп тәкитлигән.

Рамсфелд : америка әскәрлири йүк - тақилирини йиғиштурмисиму болиду

7 - Айниң башлирида қирғиз вә таҗикистанларни өз ичигә алған шаңхәй гуруһидики дөләтләр, хитай билән русийиниң башчилиқида америкини өзбекистан вә қирғизистандики һәрбий базирилирини тақиветишкә чақирған.

Рамсфелд таҗикистанға келиш алдида бешкәкни зиярәт қилип, қирғизистан даирилириниң америка қисимлирини давамлиқ база билән тәминләш тоғрисидики вәдисигә еришкән.

Рамсфелд, мухбирларни күтүвелиш йиғинида бешкәктики америка һәрбий базисиниң келәчики тоғрисида ипадә билдүрүшни рәт қилди. Рамсфелд, " бу мәсилә қирғизистан һөкүмитиниң қарариға бағлиқ," дәп көрсәтти. Рамсфелд , таҗикистанға қарап йолға чиққанда айропиландики һәрбий хадимларға, бу йәрдики америка қисимлири йүк - тақлирини пат йеқинда йиғиштурушни ойлашмисиму болиду, дәп тәкитлигән.

Америка қирғизистандики базини афғанистандики вәзийәт өзгәргичә ишләтсә болиду

Қирғизистан дөләт мудапиә министири исмайил исақов, америка қирғизистандики " базини афғанистандики вәзийәт өзгәргичә ишләтсә болиду," деди.

Бу айниң башлирида қирғизистан президенти қурманбег бақийев, америкиниң қирғизистандики қошунлирини чекиндүрүш қәрәлини бекитиш вақти келип қалғанлиқини тәкитлигән. Әмма исақов, сәйшәнбә күни рамсфелд билән өткүзгән бешкәктики мухбирларни күтүвелиш йиғинида, " афғанистан вәзийити муқимлашса бу йәрдики базиға еһтияҗ қалмайду. Мән рамсфелд әпәндиниң афғанистандики вәзийәт муқимлиқтин йирақ, дегән көз қаришиға қошулимән," дәп әскәрткән. Рамсфелд, " улар бизниң афғанистанда қиливатқан ишимизниң әһмийитини чүшиниду. Мән мунасивитимизниң бурунқи тәртип бойичә давамлишидиғанлиқиға ишинимән," деди.

Рамсфелд : қирғизистандики сайлам адил вә әркин өткүзүлди

Рамсфелд президент бақийевниң сайламда ғәлибә қилғанлиқини тәбрикләп, қирғизистандики сайлам хәлқара җәмийәтниң назарити астида адил вә әркин елип берилғанлиқини билдүргән.

Манас айродруминиң иҗариси қирғизистанни йилда 50 милйон доллар иқтисади киримгә ериштүрмәктә. Америка әмәлдарлириниң ашкарилишичә, рамсфелд, президент бақийев вә дөләт мудапиә министири исақовларға афғанистанда һәрбий һәрикәтни давамлаштурушниң зөрүрлүки шундақла оттура асиядики базиларға иһтияҗи барлиқини чүшәндүргән.

Америка өзбекистанни тәркәтсә афғанистандики һәрикитини давамлаштурувериду

Рамсфелдниң оттура асия әллиридики зиярити чаршәнбә күни ахирлишиду. Бу рамсфелдниң қирғизистанни йеқинқи 4 ай ичидә 2 - қетим зиярәт қилишидур.

Рамсфелд, дүшәнбә күни америка өзбекистандики һәрбий базисини тәрк әткән әһвалда, афғанистандики һәрбий һәрикитини давамлаштурувериду, дәп тәкитлигән.

Өзбекистан һөкүмитиниң 13 - майда йүз бәргән әнҗандики хәлқ исянини бастуруш һәрикити америкиниң тәнқидигә учриғандин кейин, кәримоф һөкүмити америка қошунлириниң ханабад һава армийә базисидики учуш мәшғулатиға чәклимә қойған. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт