Amérika ottura asiyadiki herbiy bazilirini chékindürmeydu


2005-07-26
Share
Amérika dölet mudapi'e ministiri donald ramsféld qirghizistan prézidénti qurmanbég baqiyéf bilen béshkekte. AFP

Tajikistanda ziyarette boluwatqan amérika dölet mudapi'e ministiri donald ramsféld, tajikistan da'irilirining amérika tajikistan hawa tewesi we herbiy eslihelirini dawamliq ishletse bolidu, dégen wedisige érishti.

Tajikistan amérika bilen dawamliq hemkarlishidu

Ramsféld seyshenbe küni paytext düshenbide tajikistan prézidénti imam eli raxmanow bilen söhbet élip bardi.

Fransiye axbarat agéntliqining xewer qilishiche, ularning söhbiti amérika - tajikistan herbiy hemkarliqini asasi téma qilghan. Tajikistan tashqi ishlar ministiri talbax nazarow, amérika we fransiye herbiy ayropilanlirining uchush we tajikistanda may qachilash meshghulati toghrisida toxtilip, " tajikistan xelq'ara jem'iyetning telipini nezerde tutup keldi we shundaq qilishni dawamlashturidu," dep tekitligen.

Donald ramsféld, talbax nezerow bilen ötküzgen muxbirlarni kütüwélish yighinida, " biz ikki dölet yer shari xaraktérlik diniy esebiylikke qarshi turush shundaqla afghanistanda muqimliqni we tinchliqni ornitish yolidiki mustehkem shérikler," dep körsetti.

Talbax nezerow, amérika bashchiqilidiki ittipaqdash küchlerning afghanistanda taliban hakimiyini aghdurush herikiti " ottura asiya rayonigha kéliwatqan tehditni bikar qildi," dep tekitligen.

Ramsféld : amérika eskerliri yük - taqilirini yighishturmisimu bolidu

7 - Ayning bashlirida qirghiz we tajikistanlarni öz ichige alghan shangxey guruhidiki döletler, xitay bilen rusiyining bashchiliqida amérikini özbékistan we qirghizistandiki herbiy bazirilirini taqiwétishke chaqirghan.

Ramsféld tajikistan'gha kélish aldida béshkekni ziyaret qilip, qirghizistan da'irilirining amérika qisimlirini dawamliq baza bilen teminlesh toghrisidiki wedisige érishken.

Ramsféld, muxbirlarni kütüwélish yighinida béshkektiki amérika herbiy bazisining kélechiki toghrisida ipade bildürüshni ret qildi. Ramsféld, " bu mesile qirghizistan hökümitining qararigha baghliq," dep körsetti. Ramsféld , tajikistan'gha qarap yolgha chiqqanda ayropilandiki herbiy xadimlargha, bu yerdiki amérika qisimliri yük - taqlirini pat yéqinda yighishturushni oylashmisimu bolidu, dep tekitligen.

Amérika qirghizistandiki bazini afghanistandiki weziyet özgergiche ishletse bolidu

Qirghizistan dölet mudapi'e ministiri ismayil isaqow, amérika qirghizistandiki " bazini afghanistandiki weziyet özgergiche ishletse bolidu," dédi.

Bu ayning bashlirida qirghizistan prézidénti qurmanbég baqiyéw, amérikining qirghizistandiki qoshunlirini chékindürüsh qerelini békitish waqti kélip qalghanliqini tekitligen. Emma isaqow, seyshenbe küni ramsféld bilen ötküzgen béshkektiki muxbirlarni kütüwélish yighinida, " afghanistan weziyiti muqimlashsa bu yerdiki bazigha éhtiyaj qalmaydu. Men ramsféld ependining afghanistandiki weziyet muqimliqtin yiraq, dégen köz qarishigha qoshulimen," dep eskertken. Ramsféld, " ular bizning afghanistanda qiliwatqan ishimizning ehmiyitini chüshinidu. Men munasiwitimizning burunqi tertip boyiche dawamlishidighanliqigha ishinimen," dédi.

Ramsféld : qirghizistandiki saylam adil we erkin ötküzüldi

Ramsféld prézidént baqiyéwning saylamda ghelibe qilghanliqini tebriklep, qirghizistandiki saylam xelq'ara jem'iyetning nazariti astida adil we erkin élip bérilghanliqini bildürgen.

Manas ayrodrumining ijarisi qirghizistanni yilda 50 milyon dollar iqtisadi kirimge érishtürmekte. Amérika emeldarlirining ashkarilishiche, ramsféld, prézidént baqiyéw we dölet mudapi'e ministiri isaqowlargha afghanistanda herbiy heriketni dawamlashturushning zörürlüki shundaqla ottura asiyadiki bazilargha ihtiyaji barliqini chüshendürgen.

Amérika özbékistanni terk'etse afghanistandiki herikitini dawamlashturuwéridu

Ramsféldning ottura asiya elliridiki ziyariti charshenbe küni axirlishidu. Bu ramsféldning qirghizistanni yéqinqi 4 ay ichide 2 - qétim ziyaret qilishidur.

Ramsféld, düshenbe küni amérika özbékistandiki herbiy bazisini terk etken ehwalda, afghanistandiki herbiy herikitini dawamlashturuwéridu, dep tekitligen.

Özbékistan hökümitining 13 - mayda yüz bergen enjandiki xelq isyanini basturush herikiti amérikining tenqidige uchrighandin kéyin, kerimof hökümiti amérika qoshunlirining xan'abad hawa armiye bazisidiki uchush meshghulatigha cheklime qoyghan. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet