Rayis: xongkongning siyasi teqdirini xongkongluqlar hel qilishi kérek

• Muxbirimiz erkinning bu heqtiki melumati
• Download story audio

Amérika tashqi ishlar ministiri kondiliza rayis, ikki kün ilgiri washin'gtonda xongkong parlaméntidiki démokratik küchlerning li juming we shen jongkey qatarliq wekillirini qobul qilip, xongkongda démokratik islahat élip bérish mesilisini muzakire qilghandin kéyin, xitay tashqi ishlar ministirliqi peyshenbe küni bayanat élan qilip, " xongkong mesilisi junggoning ichki ishi. Biz her qandaq chet'ellikning ichki ishlirimizgha arilishishigha qarshi turimiz," dédi.

Li juming bashchiliqidiki démokratik küchlerning 4 kishilik wekiller ömiki " xongkong xelqining démokratiyige bolghan telipini qollashqa ige qilish meqsiti bilen düshenbe küni amérikini ziyaret qilishqa bashlighan. Démokratik küchler 2007 we 2008 - yillirida yaki 2012 - yilghiche xongkong parlamént ezaliri we memuriy emeldarini omumi saylam arqiliq saylashni telep qilmaqta.

Xitay hökümiti némishqa qorqidu?

Li juming charshenbe küni washin'gtonda xongkong alahide rayon memuriy emeldari zéng yingchü'enni " xongkong xelqining küchlük arzusini béyjinggha yetküzelmidi," dep eyiblidi. U, " xongkong xelqining arzusini tinch yighilishlar arqiliq béyjing rehberlirige bizning démokratiye telep qilidighanliqimiz we uninggha layiq ikenlikimizni yetküzüshtin bashqa tallash yoli yoq " deydu.

Li juming charshenbe küni radi'omizni ziyaret qilghanda, " eger men béyjing rehberliri bilen yüz turane oltursam, aldi bilen ulargha démokratiyidin néme üchün qorqidighanliqini soraymen? némidin qorqudu? yaki xongkong musteqilliq dawasi qiliwatmisa " dédi. Uning tekitlishiche, béyjing hökümiti aldi bilen kishilik hoquq, andin erkinlik, kéyinrek démokratiye, arqidin musteqilliq teleplirining chiqishidin qorqudiken.

Zor kölemlik namayish

Xongkongdiki démokratik küchler 4 - dékabir küni xongkong boyiche zor kölemlik namayish ötküzüshni pilanlimaqta. Xelq rayini sinash netijilirige qarighanda namayishchilarning sani 200 mingdin éship kétishi mumkin.

Xongkong memuriy emeldari zéng yingchü'en, xongkongda islahat élip bérish pilanini otturigha qoyghan bolsimu, emma islahat waqit jedwilini tilgha almighan. U, charshenbe küni xongkong puqralirigha téléwiziye nutiqi sözlep, özining islahat layihisini qollashni telep qildi. Emma zéng yingchü'enning islahat layihisi démokratik küchlerning tenqidige uchrimaqta.

Töt kishilik wekiller ömikining ezasi shen jongkey, zéng yingchü'enning islahat pilanida omumi saylamning waqit jedwili tilgha élinmighanliqini eskertip, "bu nishani bolmighan bir islahat layihisi. Omumi saylam 2012 - yili élip bérilamdu? 2017 - yilimu yaki 2022 - yilimu ? we yaki 20 - 30 yildin kéyinmu ? buni biz bilmeymiz " dédi.

Li jumingning tekitlishiche, gerche béyjing hökümiti xongkong parlaméntidiki bezi démokratik ezalarni söhbet ötküzüshke chaqirghan bolsimu, emma béyjingning kocha namayishini tosup qélish pilani "muwappeqiyetlik bolalmaydiken "

Xitay hökümiti xongkong parlaméntidiki démokratik küchlerni öz ichige alghan parlamént ezalirini jüme küni shinjénda söhbet ötküzüshke teklip qildi.

En'gliye, 1997 - yili xongkongning igilik hoquqini xitaygha qayturup bergendin kéyin maqullan'ghan tüp qanunda, xongkong memuriy rehbirining démokratik saylam bilen wujudqa kélidighanliqini qobul qilghan. Emma xitay hökümiti ötken yili tüp qanun'gha izahat bérip, xongkongda 2007 we 2008 - yilliri - omumi saylam élip bérilish mumkinchilikini yoqqa chiqarghan idi. Biraq amérika xongkongda démokratik saylam élip bérishni qollimaqta.

Amérika: xongkong alahidiliki we muhim rolini saqlap qalidu

Amérika tashqi ishlar ministirlikining bayanatchisi mikkormakning muxbirlargha tekitlishiche, kondiliza rayis li juming qatarliqlar bilen uchrashqanda " biz, xongkongning siyasi islahat qedimi we islahat kölimini xongkongluqlar tüp qanunidiki belgilimiler boyiche qarar qilishi kéreklikige ishinimiz " dep tekitligen.

Mikkormak, rayisning li juminggha " amérika xongkong démokratiyisini we omum saylam élip bérishni qollaydu " dégenlikini bildürdi. Mikkormak, " biz buni xongkong, xitay we pütün rayonning menpe'etige uyghun kélidu. Xongkongning alahidiliki we dawamliq muhim rol oynishini saqlap qalidu, dep qaraymiz " deydu.

Li juming washin'gtonda xelq'ara jem'iyettin xongkong démokratiye herikitini qollashni telep qilip, 1984 - yili imzalan'ghan xitay - en'gliye qoshma axbaratida xongkonggha aliy aptonomiye ata qilin'ghanliqini bildürdi. U, " bu xongkong xelqining bizning yalghuz emeslikimizni biliwélishi üchün muhim " dep körsetti.

Li jumingning tekitlishiche, tüp qanun 1990 - yili maqullan'ghandin kéyin xongkong xelqi démokratiyini 17 yildin béri kütmekte. Li juming, " hökümetke shuni démekchimenki, dunyada bir dölet xelqi démokratiyini yaxshi nerse, dep qobul qilip turup , uni 17 yil kütkenlikning bir misali barmidu?" deydu. (Erkin)