Amérika iran bilen biwaste söhbet élip barmaqchi

Amérikining iraqtiki nopuzluq bash elchisi zelmey xelilzad yéqinda News Week zhorniligha bergen bayanatida, amérika prézidénti jurj bushning uninggha iraqtiki weziyetni muqimlashturush toghrisida iran bilen biwaste söhbet ötküzüsh heqqide salahiyet bergenlikini ashkarilidi. Siyasiy mulahizichilerning éytishiche, bu heriket amérikining siyasitidiki chong bir özgirish hésablinidiken. Chünki amérika bilen iran otturisida, 2003 - yili may éyida yeni iraqta saddam hüseyin hakimiyiti amérika herbiy qisimliri teripidin aghdurulup uzun ötmey, bir qitimliq biwaste söhbet ötküzülgen bolup, andin kéyin ikki dölet wekilliri otturisida biwaste söhbet élip bérilmighan.

Xewerlerge qarighanda, u qé'itm ikki dölet wekilliri otturisida élip bérilghan biwaste söhbette, amérika hökümiti elqa'ide teshkilatining se'udi erebistanda élip barghan hujumining iranda pilanlan'ghanliqini otturigha qoyghan. Amérika terepning bu eyiblishidin qattiq ghezeplen'gen iran, amérika bilen afghanistan we iraq mesiliside élip bériliwatqan diplomatiye söhbitini derhal toxtatqan idi.

Siyasiy analizchi jim lobning asiya waqti gézitide élan qilghan maqaliside bildürüshiche, iran bilen qaytidin biwaste söhbet bashlash - bashlimasliq mesilsi, iranning yadro programmisini dawamlashturishi tüpeylidin, amérika hökümiti ichide nurghun talash- tartishlargha seweb bolghan.

Irandiki mewjut hakimiyetni aghdurush meqset qilin'ghan

Amérika hökümiti ichidiki konsriwatiplar, irandiki öktichi guruppilarning pa'aliyetliri heqqide téximu köp melumat qolgha keltürüsh üchün, amérika hökümitidin tihranda bir diplomatiye ishxanisi échishini telep qilghan. Ularning éytishiche, eger amérika hökümiti irandiki siyasiy öktichi guruppilargha muwapiq yardem yetküzelise, bu öktichi guruppilar, 1980 - yilliri polshada hemkarliq jem'iyiti hakimiyetni aghdurghandek, irandiki mewjut hakimiyetni aghduriwitishi mumkin.

Emma amérika hökümitidiki yene bir qisim kishiler, iran bilen nöwette biwaste söhbet élip bérishning siyasiy jehettin ziyanliq ikenlikini bayan qilip, bundaq bir heriket iran prézidénti mexmut exmedi nijat amérika we isra'iliyini dunya xeritisidin yoqitish kérek dep jar sélip yürgen bir peyitte, uning hakimiyitini xelq'arada qanunlashturghan bolup qalidu dep, iran bilen biwaste söhbet élip bérishqa qarshi chiqqan.

Amérika charisiz qalghan

Emma, michigen uniwérsitétining proféssori jan kol qatarliq bezi ottora sherq mutexesssiliri, amérika hökümitining iran bilen, iraqtiki weziyet heqqide biwaste söhbet ötküzüsh teshebbusini, amérika hökümitining iraq mesilsidiki charisizlikining bir ipadisi we iraqtin chiqish üchün iranning yardimige éhtiyachliq ikenlikini étirap qilghanliq dep tebirlimekte.

Néme bolushidin qet'iynezer, iraqtiki amérika bash elchisi zelmey xelilzadning, iran bilen biwaste söhbet ötküzüsh toghrisidiki bayanati, uzundin biri amérikidiki sabiq amérika milliy bixeterlik kingishining re'isi brnét skukraft qatarliq jumhuriyetchiler we bezi démokratlarteripidin otturigha qoyuliwatqan istratégiyisining bir qismi hésablinidu. Ular uzundin biri, amérika hökümitidin iraq mesilsini birterep qilish üchün iraqning qoshniliri bilen hemkarliq ornitishini telep qilmaqta.

Xewerlerge qarighanda, amérika xelqining prézidént bushning iraqqa qaratqan siyasitige bolghan köz qarishining özgirip, iraqtiki urushtin narazi bolghanlar sanining kündin ـ kün'ge köpiyishi, bush hökümitini iraq mesilisi toghrisida yéngi teshebbuslarni otturigha qoyushqa, hetta iran bilen biwaste söhbet élip bérishqa mejburlighan bolushi mumkin. (Qanat)