Ирақ уруши, америка -хитай мунасивити җәһәтләрдә америкиниң сиясәтлиридә йеңи өзгириш болмақта

• 
  2006-12-07

• Мухбиримиз вәлиниң буй һәқтики мәлумати
• Download story audio

Америкидки җумһурийәтчиләр вә демократлардин ибарәт икки чоң партийә бирликтә тәшкиллигән тәтқиқат гурупписиниң 90 нәччә бәтлик доклатиниң мәзмунлирини мәтбуатлар 12 ‏- айниң 6 ‏- күни елан қилди. 'Америка авази'ниң хәвәр қилишичә, бу доклатта президент бушниң ирақ истратегийиси мувәппиқийәтлик болмиди, буниң үчүн америка һәрбий, депломатийә җәһәтләрдә дәрһал чоң өзгириш ясиши лазим, дәп көрситилгән иди.

Җорҗи буш көрсәткән америка дөләт мудапиә министири вәзипә өтәшкә тәйярланмақта

Америка президенти җорҗи буш йеқинда вәзиписидин истипа бәргән америка мудапиә министири рамисфлид әпәндиниң орниға сабиқ америка мәркизи ахбарат идарисиниң башлиқи, икки партийә бирликтә юқирий салаһийәтлик әрбаблардин тәшкиллигән тәтқиқат гурупписиниң әзаси робрт гәйтс әпәндини көрсәткән иди. 'Бирләшмә агентлиқи'ниң хәвәр қилишичә, робрт гәйтс әпәнди америка дөләт мәҗлисидә икки партийиниң суаллириға җаваб бәргәндин кейин, униң америка дөләт мудапиә министирилиқ салаһийити кеңәш палатасида 2 гә қарши 95 аваз билән тәстиқланди.

Америка ирақ урушида техи ғәлибә қилмиди

Б б с ниң хәвәр қилишичә, робрт гәйтс әпәнди америка дөләт мәҗлисидә икки партийиниң террорчилиққа қарши уруш, хитайниң һазир һәрбий күчини һәдәп өстүрүватқанлиқи, америка -русийә мунасивити, шималий корийә мәсилиси, иран, сүрийә мәсилиси қатарлиқ җәһәтләрдә сориған кәскин суаллириға җаваб бәрди. Робрт гәйтс әпәндиниң қаришичә, америка ирақ урушида техи ғәлибә қилмиди, буниң үчүн һәр икки партийә бирликтә дөләт мәнпәәтини нәзәрдә тутуп, қайтидин узун муддәтлик, изчил истратегийә вә сиясәт түзүп чиқип, риқабәтләргә бирликтә тақабил туруш керәк. Гәйтс әпәнди буниңға, бурун соғуқчилиқ урушида америкиниң қудрәтлик совет иттипақини йеңип чиқиши пүтүнләй партийә айримай, мәзһәп айримай бирдәк һәрикәт қилғанлиқиниң нәтиҗиси икәнликини дәлил қилип көрсәтти.

Иран америкиға тәһдит болуп чиқалмайду, әмма...

Робрт гәйтс әпәнди америка дөләт мәҗлисидә, икки партийиниң 'террорчилиқ оқ мәркизи' дейиливатқан мәсилә һәққидики суаллириға җаваб бәргәндә 'иран һәрбий җәһәттә америкиға тәһдит болуп чиқалмайду, лекин, иран парс қолтуқини қамал қилип, нефит икиспорт йоллирини тосаш иқтидариға, пүтүн оттура шәрқтә, яврупада вә америкида террорчилиқ һуҗуми қозғаш иқтидариға игә. Униң буниңдин кейин ирақта техиму чоң чатақ чиқириш иқтидариму бар' дәп көрсәтти.

Робрт гәйтс әпәнди америка дөләт мәҗлисидә сурийә мәсилиси һәққидә соралған суалларға җаваб бәргәндә 'дәмәшиқ һөкүмитиниң америкиниң мәнпәәтигә зиян селиш иқтидари иранға қариғанда көп аҗиз . Әмма америка, әгәр сүрийигә зәрбә бәрсә, у америкиниң бу райондики узун муддәтлик мәнпәәтлиригә қарита яман тәсир пәйда қилиши мумкин' дәп көрсәтти.

'Америка -хитай мунасивитидики учурларни инчикә тәтқиқ қилимән'

Робрт гәйтс әпәнди америка дөләт мәҗлисидә 'америкиға хитай һәрбий җәһәттә тәһдит болуп шәкилләнмәктә' дейиливатқан мәсилә һәққидә икки партийиниң суаллириға җаваб бәрди. Җумһурийәтчиләрниң бир кеңәш палата әзаси гәйтс әпәндидин 'хитайниң қозғитилған нур билән америкиниң сүний һәмралириға кашила қиливатқанлиқи' , 'хитай америкиниң һөкүмәт тор бәтлиригә хекир арқилиқ һуҗум қиливатқанлиқи' , 'хитайниң суң дәриҗилик суасти парахоти америкиниң кичик лачин авиаматкиси парахот топиға әгишип йеқинлашқанлиқи' қатарлиқ учурлардин хәвири бар-йоқлиқини сориған иди. Буниңға қарита робрт гәйтс әпәнди 'мән һөкүмәт ишидин айрилип кәткили хели узун вақит болуп қалғачқа, гәрчә бу һәқтики мәхпий учурлардин хәвирим болмисиму, әмма капаләтлик қилимәнки, мән вәзипә өтәшкә башлиғандин кейинла бу һәқтики учурларни инчикә тәтқиқ қилип, униңға тиз чарә қоллинимән' дәп җаваб бәрди.(Вәли)