Iraq urushi, amérika -xitay munasiwiti jehetlerde amérikining siyasetliride yéngi özgirish bolmaqta

• 
  2006-12-07

• Muxbirimiz welining buy heqtiki melumati
• Download story audio

Amérikidki jumhuriyetchiler we démokratlardin ibaret ikki chong partiye birlikte teshkilligen tetqiqat guruppisining 90 nechche betlik doklatining mezmunlirini metbu'atlar 12 ‏- ayning 6 ‏- küni élan qildi. 'Amérika awazi'ning xewer qilishiche, bu doklatta prézidént bushning iraq istratégiyisi muweppiqiyetlik bolmidi, buning üchün amérika herbiy, déplomatiye jehetlerde derhal chong özgirish yasishi lazim, dep körsitilgen idi.

Jorji bush körsetken amérika dölet mudapi'e ministiri wezipe öteshke teyyarlanmaqta

Amérika prézidénti jorji bush yéqinda wezipisidin istipa bergen amérika mudapi'e ministiri ramisflid ependining ornigha sabiq amérika merkizi axbarat idarisining bashliqi, ikki partiye birlikte yuqiriy salahiyetlik erbablardin teshkilligen tetqiqat guruppisining ezasi robrt geyts ependini körsetken idi. 'Birleshme agéntliqi'ning xewer qilishiche, robrt geyts ependi amérika dölet mejliside ikki partiyining su'allirigha jawab bergendin kéyin, uning amérika dölet mudapi'e ministiriliq salahiyiti kéngesh palatasida 2 ge qarshi 95 awaz bilen testiqlandi.

Amérika iraq urushida téxi ghelibe qilmidi

B b s ning xewer qilishiche, robrt geyts ependi amérika dölet mejliside ikki partiyining térrorchiliqqa qarshi urush, xitayning hazir herbiy küchini hedep östürüwatqanliqi, amérika -rusiye munasiwiti, shimaliy koriye mesilisi, iran, süriye mesilisi qatarliq jehetlerde sorighan keskin su'allirigha jawab berdi. Robrt geyts ependining qarishiche, amérika iraq urushida téxi ghelibe qilmidi, buning üchün her ikki partiye birlikte dölet menpe'etini nezerde tutup, qaytidin uzun muddetlik, izchil istratégiye we siyaset tüzüp chiqip, riqabetlerge birlikte taqabil turush kérek. Geyts ependi buninggha, burun soghuqchiliq urushida amérikining qudretlik sowét ittipaqini yéngip chiqishi pütünley partiye ayrimay, mezhep ayrimay birdek heriket qilghanliqining netijisi ikenlikini delil qilip körsetti.

Iran amérikigha tehdit bolup chiqalmaydu, emma...

Robrt geyts ependi amérika dölet mejliside, ikki partiyining 'térrorchiliq oq merkizi' déyiliwatqan mesile heqqidiki su'allirigha jawab bergende 'iran herbiy jehette amérikigha tehdit bolup chiqalmaydu, lékin, iran pars qoltuqini qamal qilip, néfit ikisport yollirini tosash iqtidarigha, pütün ottura sherqte, yawrupada we amérikida térrorchiliq hujumi qozghash iqtidarigha ige. Uning buningdin kéyin iraqta téximu chong chataq chiqirish iqtidarimu bar' dep körsetti.

Robrt geyts ependi amérika dölet mejliside suriye mesilisi heqqide soralghan su'allargha jawab bergende 'demeshiq hökümitining amérikining menpe'etige ziyan sélish iqtidari iran'gha qarighanda köp ajiz . Emma amérika, eger süriyige zerbe berse, u amérikining bu rayondiki uzun muddetlik menpe'etlirige qarita yaman tesir peyda qilishi mumkin' dep körsetti.

'Amérika -xitay munasiwitidiki uchurlarni inchike tetqiq qilimen'

Robrt geyts ependi amérika dölet mejliside 'amérikigha xitay herbiy jehette tehdit bolup shekillenmekte' déyiliwatqan mesile heqqide ikki partiyining su'allirigha jawab berdi. Jumhuriyetchilerning bir kéngesh palata ezasi geyts ependidin 'xitayning qozghitilghan nur bilen amérikining sün'iy hemralirigha kashila qiliwatqanliqi' , 'xitay amérikining hökümet tor betlirige xékir arqiliq hujum qiliwatqanliqi' , 'xitayning sung derijilik su'asti paraxoti amérikining kichik lachin awi'amatkisi paraxot topigha egiship yéqinlashqanliqi' qatarliq uchurlardin xewiri bar-yoqliqini sorighan idi. Buninggha qarita robrt geyts ependi 'men hökümet ishidin ayrilip ketkili xéli uzun waqit bolup qalghachqa, gerche bu heqtiki mexpiy uchurlardin xewirim bolmisimu, emma kapaletlik qilimenki, men wezipe öteshke bashlighandin kéyinla bu heqtiki uchurlarni inchike tetqiq qilip, uninggha tiz chare qollinimen' dep jawab berdi.(Weli)