Washin'gtondiki Uyghurlar 5-iyul weqesini xatirilep namayish ötküzdi

Bügün 5-iyul weqesining ikki yilliq xatire küni. Ikki yilning aldidiki mushu künde 1000din artuq Uyghur yash, ürümchidiki xelq meydanigha toplinip, 26‏-iyun shawgüen weqesi heqqide hökümettin melumat telep qilghan.
Muxbirimiz shöhret hoshur
2011-07-05
Share
amerika-namayish-5-iyul-305.jpg Washin'gtondiki Uyghurlar 5-iyul weqesini xatirilep namayish ötküzdi. 2011-Yili 5-iyul.
RFA

Hökümet terep burunqigha oxshashla, namayishchilarning yolluq teleplirini jawabsiz qaldurghan. Jawabsiz qaldurghanla emes, belki, urghan,döshkeligen, tutqun qilghan, hetta oq chiqarghan. Hökümet terep namayishchilarni pütünley charisiz dep oylighan؛ ularning arqisida milyonlighan Uyghur xelqining iradisi we himayisi barliqini untughan؛ qérindashlirining urulup-soquluwatqinini, hetta oqqa tutuluwatqinini körgen, ürümchi kochiliridiki Uyghur yashliri türküm-tütkümlep namayishchilar sépige qétilghan. Xitay saqchilirining zorawanliqliri chektin ashqandin kéyin, bir türküm Uyghur yashlirimu janlirini aliqinigha élip, ölgen, yarilan'ghan qérindashliri üchün qan'gha-qan, jan'gha- jan dep hésab élishqa atlan'ghan. Netijide tinchliq bilen bashlan'ghan namayish toqunushqa aylinip, ürümchining birqanche muhim kochilirini, jesetler, yaridarlar, köydürülgen aptomobillar, yan'ghan binalar we is-tüteler qaplighan. Hökümet terepning melumatida shu küni ölgenlerning sani 197 neper bolup, buning mutleq köp qismi xitay puqraliri, emma muhajirettiki Uyghur teshkilatlirining melumatlirida körsitilishiche, shu küni oqqa tutulghan we iz-déresiz yoqalghan namayishchilarning sani bir qanche ming we bularning hemmisi dégüdek Uyghur.

amerika-namayish-5-iyul-385.jpg
Washin'gtondiki Uyghurlar 5-iyul weqesini xatirilep namayish ötküzdi. 2011-Yili 5-iyul.
RFA

Muhajirettiki Uyghurlar, 5-iyul künini, özlirining teshkillinish iqtidarini, milliy uyushqaqliqini, zorawanlardin qorqmaydighanliqini ispatlighan, yeni bir qehrimanliq dastanini yaratqan kün dep iptixar bilen xatirilise, yene bir tereptin ölgen, tutulghan qérindashlarning sanining köplüki, yoluqqan qiyin-qistaqlirining éghirliqi seweblik, Uyghur tarixidiki paji'elik künlerning biri süpitide échinish bilen eslimekte.

Mana bügün washin'gtonning dupon merkizi meydani dep atilidighan qaynaq merkezliridin birige toplan'ghan Uyghurlar, jarangliq sho'arliri we tesirlik nutuqliri bilen, 5-iyul tinchliq namayishini qanliq basturghan xitay hökümitige naraziliqini bildürmekte. Buning bilen birlikte yene 5-iyul weqeside hayatidin ayrilghan, shu weqe seweblik bügün türmilerde yétiwatqan qehriman oghul-qizlirigha we ularning a'ile-tawabatlirigha hörmet bildürmekte.

Uyghur milliy herikitining rehbiri rabiye xanim, dunya jama'etchilikini, 5-iyul weqesini untup qalmasliqqa, 5-iyulda tutulghanlarning türmilerde tartiwatqan azablirigha köz yumuwalmasliqqa, 5-iyulda ölgen we tutulghanlarning yigha-zarigha, ah-peryadigha qulaq yopuruwalmasliqqa dewet qilmaqta.

Namayishta söz qilghan rabiye xanim, 5-iyul namayishchilirining, Uyghurlar üchün öginish ölgisi ikenlikini, 5-iyul we uningdin kéyinki weqelerde ölgen Uyghurlarning qénining yerde qalmaydighanliqini, Uyghur xelqi tölewatqan bu bedellerning axiri méwe béridighanliqini, yeni öz wetini'ige özi ige bolidighan, öz ishlirigha özliri xoja bolidighan, hür, erkin zamanlargha choqum érishidighanliqini yene bir qétim tekitlidi.

Mushu tapta namayishta towliniwatqan sho'arlar, washin'gton kochilirini bashqiche janlandurmaqta. Sep-sep bolup tizilip méngiwatqan namayishchilarning qolidiki ay-yultuzluq kökbayraq washin'gitonliqlarning diqqitini tartmaqta. Namayishchilar bolsa, ene shu 5-iyuldiki namayishchilarning jenggiwarliqlirini eslesh, yoluqqan zorwanliqlirigha échinish tuyghuliri ichide namayishni dawamlashturmaqta. Töwende bir türküm namayishchilarning namayish tesiratlirini, mushu minutlardiki oy we héssiyatlirini diqqitinglargha sunimiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet