Демократлар дөләт мәҗлиси авам палатасида көп санлиқни игилиди

• Мухбиримиз қанатниң бу һәқтики мәлумати
• Download story audio

Сәйшәнбә күни елип берилған сайламда демократлар америка дөләт мәҗлиси авам палатасидики 228 орунни игиләп, җумһурийәтчиләрниң авам палатасидики 12 йиллиқ сиясий монополийисигә хатимә бәрди. Гәрчә кеңәш палатаси үчүн елип берилған сайлам нәтиҗиси техи ениқ болмисиму, әмма демократлар кеңәш палатасиниң контроллуқини қолға кәлтүрүш үчүн керәклик болған 6 орунниң 5 ини аллиқачан игилигән. Демократларниң авам палатасида көп санлиқни игилиши, президент бушни һакимийитиниң ахирқи икки йилида нурғун қийинчилиқларға учритиши мумкин.

Президент буш сиясийитини қайтидин көздин көчүрүши керәк

Сиясий мулаһизичи роҗәр коһәнниң интернатсионал һралд трибйон гезитидә елан қилған мақалисидә билдүрүшичә, демократларниң сайламдики ғәлибиси билән, президентниң хәлқара террорчилиққа қарши уруш вә ирақ уруши тоғрисида өзидин башқа көз қарашта болған кишиләрни халиған вақитта вәзиписидин елип ташлаш дәври аяқлашти. Әмди президент буш пүтүн сияситини қайтидин көздин көчүрүши керәк.

Президент буш сайламдин бир күн кейин, ирақ урушиниң баш пиланлиғучиси дәп қаралған америка дөләт мудапиә министири доналд рамизфилдни вәзиписидин елип ташлаш арқилиқ, америка хәлқиниң әң көп наразилиқини қозғаватқан вә сәйшәнбә күни елип берилған сайламда җумһурийәтчиләрниң мәғлубийәткә учришиниң әң асаслиқ сәвәби һесабланған ираққа қаратқан сияситини көздин көчүридиғанлиқиниң бишаритини бәрди.

Чаршәнбә күни ақсарайда өткүзгән мухбирларни күтивелиш йеғинида, ирақтики вәзийәтниң сайлам нәтиҗисигә тәсир қилғанлиқини етирап қилған президент буш, демократларниң әң асаслиқ тәләплиридин бери болған дөләт мудапиә министири доналд рамизфилдни вәзиписидин алғанлиқини җакарлиди:

"Гәрчә түнүгүн елип берилған сайлам нәтиҗсидә вашингтонда нурғун нәрсиләр өзгәргән болсиму, әмма америка қораллиқ қисимлириниң баш қомандани болуш сүпитим билән асаслиқ вәзипәм болған бу милләтни қоғдаш вәзипәм өзгәрмиди. 6 Йилдин бери мудапиә министири вәзиписини өтәватқан доналд рамизфилд билән елип барған җиддий сөһбәтләр арқилиқ мудапиә минстирликидә өзгириш елип бериш вақтиниң йетип кәлгәнликини қарар қилдуқ".

Президент буш сабиқ америка мәркизий ахбарат идарисиниң рәиси робрт гетни йеңи мудапиә министири қилип тәйинлигәнликини билдүрди.

Буш ирақ мәсилиси һәқидә тохталди

Сәйшәнбә күнидики сайламда америка хәлқиниң ирақтики вәзийәттин рази әмәсликини ипадилигәнликини билдүргән президент буш, америка хәлқиниң җумһуийәтчиләр вә демократларниң өз ‏- ара талаш-тартишларни бир тәрәпкә қайрип қоюп, ирақ қатарлиқ муһим мәсилиләрни һәл қилиш үчүн бирликтә һәрикәт қилиши керәкликини оттуриға қойғанлиқини әскәртип мундақ деди:

"Алдимиздики күнләрдә вә һәптиләрдә , мән вә миллий бихәтәрлик кеңиши әзалири дөләт мәҗлисидики һәр икки партийиниң рәһбәр вә әзалири билән учришип вә уларниң мәсилиләргә болған көз қаришини вә мәсилиләрни қандақ бир тәрәп қилип тоғрисидики тәклиплирини аңлаймиз" .

Прзидент буш, сайлам нәтиҗисидин әпсусланғанлиқини вә җумһурийәтчи партийисиниң рәһбири болуш сүпити билән партийиниң сайламдики мәғлубийитидә чоң мәсулийити барлиқини етирап қилидиғанлиқини билдүрди:

"Түнүгүнки сайламда хәлқ америка дөләт мәҗлисидә йеңи бир йөнилиш үчүн аваз бәрди. Гәрчә кеңәш палатаси сайлимда авазлар техи һесаблинип болмиған болсиму, түнүгүн ахшам демократчилар үчүн яхши бир ахшам иди. Буниң үчүн уларни тәбрикләймән".

Буш демократлар билән болған талаш – тартишни унтуп бирликтә хизмәт қилидиғанлиқини билдүрди

Чаршәнбә күни әтигән америка дөләт мәҗлисидики демократ партийә рәһбәрлиригә телефон қилип, сайламдики ғәлибиси үчүн уларни тәбриклигәнликини һәмдә уларни ақсарайға тәклип қилғанлиқини тәкитлигән президент буш дөләт мәҗлисидики җумһурийәтчи партийисиниң рәһбәрлиридин сайлам һарписида демократлар билән елип берилған талаш-тартишларни унтуп, демократлар билән бирликтә мәмликәтниң асаслиқ мәсилилирини бир тәрәп қилишни тәләп қилғанлиқини билдүрди.

Сәйшәнбә күнидики сайламда америка хәлқиниң йеңи бир йөнилиш үчүн аваз бәргәнликини билдүргән америка дөләт мәҗлисидики демократларниң рәһбири нәнси пәлуси, "америка хәлқиниң болупму, ирақ урушида йеңи бир йөнилиш тәлипи наһайити очуқ иди. Бу мәсилидә президент билән бирликтә ишлишимиз керәк. Ирақта елип бериливатқан мәвҗут сиясәт һечқандақ нәтиҗә бәрмиди . Мәвҗут сиясәт я ираққа який районға тинчлиқ вә муқимлиқ елип киләлмиди. Бу сиясәт чоқум өзгириши керәк " деди. (Қанат)