Démokratlar dölet mejlisi awam palatasida köp sanliqni igilidi


2006-11-08
Share

Seyshenbe küni élip bérilghan saylamda démokratlar amérika dölet mejlisi awam palatasidiki 228 orunni igilep, jumhuriyetchilerning awam palatasidiki 12 yilliq siyasiy monopoliyisige xatime berdi. Gerche kéngesh palatasi üchün élip bérilghan saylam netijisi téxi éniq bolmisimu, emma démokratlar kéngesh palatasining kontrolluqini qolgha keltürüsh üchün kéreklik bolghan 6 orunning 5 ini alliqachan igiligen. Démokratlarning awam palatasida köp sanliqni igilishi, prézidént bushni hakimiyitining axirqi ikki yilida nurghun qiyinchiliqlargha uchritishi mumkin.

Prézidént bush siyasiyitini qaytidin közdin köchürüshi kérek

Siyasiy mulahizichi rojer kohenning intérnatsi'onal hrald tribyon gézitide élan qilghan maqaliside bildürüshiche, démokratlarning saylamdiki ghelibisi bilen, prézidéntning xelq'ara térrorchiliqqa qarshi urush we iraq urushi toghrisida özidin bashqa köz qarashta bolghan kishilerni xalighan waqitta wezipisidin élip tashlash dewri ayaqlashti. Emdi prézidént bush pütün siyasitini qaytidin közdin köchürüshi kérek.

Prézidént bush saylamdin bir kün kéyin, iraq urushining bash pilanlighuchisi dep qaralghan amérika dölet mudapi'e ministiri donald ramizfildni wezipisidin élip tashlash arqiliq, amérika xelqining eng köp naraziliqini qozghawatqan we seyshenbe küni élip bérilghan saylamda jumhuriyetchilerning meghlubiyetke uchrishining eng asasliq sewebi hésablan'ghan iraqqa qaratqan siyasitini közdin köchüridighanliqining bisharitini berdi.

Charshenbe küni aqsarayda ötküzgen muxbirlarni kütiwélish yéghinida, iraqtiki weziyetning saylam netijisige tesir qilghanliqini étirap qilghan prézidént bush, démokratlarning eng asasliq telepliridin béri bolghan dölet mudapi'e ministiri donald ramizfildni wezipisidin alghanliqini jakarlidi:

"Gerche tünügün élip bérilghan saylam netijside washin'gtonda nurghun nersiler özgergen bolsimu, emma amérika qoralliq qisimlirining bash qomandani bolush süpitim bilen asasliq wezipem bolghan bu milletni qoghdash wezipem özgermidi. 6 Yildin béri mudapi'e ministiri wezipisini ötewatqan donald ramizfild bilen élip barghan jiddiy söhbetler arqiliq mudapi'e minstirlikide özgirish élip bérish waqtining yétip kelgenlikini qarar qilduq".

Prézidént bush sabiq amérika merkiziy axbarat idarisining re'isi robrt gétni yéngi mudapi'e ministiri qilip teyinligenlikini bildürdi.

Bush iraq mesilisi heqide toxtaldi

Seyshenbe künidiki saylamda amérika xelqining iraqtiki weziyettin razi emeslikini ipadiligenlikini bildürgen prézidént bush, amérika xelqining jumhu'iyetchiler we démokratlarning öz ‏- ara talash-tartishlarni bir terepke qayrip qoyup, iraq qatarliq muhim mesililerni hel qilish üchün birlikte heriket qilishi kéreklikini otturigha qoyghanliqini eskertip mundaq dédi:

"Aldimizdiki künlerde we heptilerde , men we milliy bixeterlik kéngishi ezaliri dölet mejlisidiki her ikki partiyining rehber we ezaliri bilen uchriship we ularning mesililerge bolghan köz qarishini we mesililerni qandaq bir terep qilip toghrisidiki tekliplirini anglaymiz" .

Przidént bush, saylam netijisidin epsuslan'ghanliqini we jumhuriyetchi partiyisining rehbiri bolush süpiti bilen partiyining saylamdiki meghlubiyitide chong mes'uliyiti barliqini étirap qilidighanliqini bildürdi:

"Tünügünki saylamda xelq amérika dölet mejliside yéngi bir yönilish üchün awaz berdi. Gerche kéngesh palatasi saylimda awazlar téxi hésablinip bolmighan bolsimu, tünügün axsham démokratchilar üchün yaxshi bir axsham idi. Buning üchün ularni tebrikleymen".

Bush démokratlar bilen bolghan talash – tartishni untup birlikte xizmet qilidighanliqini bildürdi

Charshenbe küni etigen amérika dölet mejlisidiki démokrat partiye rehberlirige téléfon qilip, saylamdiki ghelibisi üchün ularni tebrikligenlikini hemde ularni aqsaraygha teklip qilghanliqini tekitligen prézidént bush dölet mejlisidiki jumhuriyetchi partiyisining rehberliridin saylam harpisida démokratlar bilen élip bérilghan talash-tartishlarni untup, démokratlar bilen birlikte memliketning asasliq mesililirini bir terep qilishni telep qilghanliqini bildürdi.

Seyshenbe künidiki saylamda amérika xelqining yéngi bir yönilish üchün awaz bergenlikini bildürgen amérika dölet mejlisidiki démokratlarning rehbiri nensi pelusi, "amérika xelqining bolupmu, iraq urushida yéngi bir yönilish telipi nahayiti ochuq idi. Bu mesilide prézidént bilen birlikte ishlishimiz kérek. Iraqta élip bériliwatqan mewjut siyaset héchqandaq netije bermidi . Mewjut siyaset ya iraqqa yakiy rayon'gha tinchliq we muqimliq élip kilelmidi. Bu siyaset choqum özgirishi kérek " dédi. (Qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet