Amérika prézidént saylimi eng jiddiy bolidighan axirqi bir hepte

Amérikida prézidént saylimi bu yil 2 ‏ - aydila bashlan'ghan idi. 8 ‏ - Ayda, démokratlar partiyisi bilen jumhuriyetchiler partiyisidin ibaret ikki partiye qurultaylirini échip, saylam riqabitige qatnashqanlar ichidin birdin prézidént we mu'awin prézidént namzatini tallap chiqti.
Muxbirimiz weli
2008-10-28
Share
Obama-Mekkeyin-Saylam-305.jpg Démokratlar partiyisi bilen jumhuriyetchiler partiyisidin ibaret bu ikki partiye kandidatliri mikkéyin bilen obamaning munazire körünüshlirining biri.
AFP Photo

Shuningdin kéyin ikkinchi basquchluq saylam bashlandi. Saylamning axirqi bélet tashlash küni 11‏ - ayning 4 ‏ - küni. Qaysi partiyining prézidént namzati ghelibe qilghanliqi melum bolidighan bu axirqi kün'ge yene bir hepte qaldi.

Ikki namzat hazir saylamgha muhim tesir körsiteleydighan shitatlarda riqabetlishiwatidu

Amérika awazining bayan qilishiche, prézidént saylimining eng axirqi heptiside, barak obama bilen john mikkéyin hazir, her qétimliq prézidént saylimida muhim tesir körsitip kéliwatqan oxayo shtati qatarliq bir nechche shitatta eng axirqi saylam riqabitige chüshti. Ular nuqtiliq mesililerde yenila öz - ara hujum qozghimaqta.

Barak obama 'saylam nutqida, eger prézidént bolup saylansa, dölet ichide ikki partiyini ittipaqlashturup iqtisadiy riqabetke, xelq'arada bolsa bixeterlik riqabitige taqabil turidighanliqini jakarlidi. Shundaqla u yene john makkéynni prézidént bushning siyasetlirining warisi déyish arqiliq uninggha hujum qilishni toxtatmidi.

John makkéynmu saylam nutqida, barak obamaning baj islahati toghrisidiki pilanida mesile bar, u bayliq yaritishni emes, belki bayliqlarni kontrol qilishni meqset qilidu, hemme amérikiliq üchün xizmet we bayliq pursetliri yaritish emes, belki bayliqni teqsim qiliwétishni meqset qilidu, dep hujum qilishni toxtatmidi.

Hazirgha qeder tashlan'ghan bélet sanidin qarighanda, john mikkéyin érishken bélet sani, saylam bashlan'ghandin buyan üstünlükni igilep kéliwatqan barak obamagha yétishiwélishqa yene yette tochka qaldi. John mikkéyin bu boshluqni toldurush üchün tirishiwatidu. Obama bolsa qollighuchilirini hazirqi üstünlükni saqlap qélish üchün bixestilik qilmasliqqa chaqiriwatidu.

Amérikini inawetlik qerz krizisidin qutuldurush üchün bir chong maliye pilani kérek

Iqtisadshunaslarning qarishiche, jorj bush hökümiti mezgilidiki iraq urushi sewebidin amérikining chiqimi éship ketti, dölet ichide inawetlik qerz krizisi peyda boldi.

Amérikini bu krizistin qutuldurush üchün iqtisadni güllendürüshke türtke bolidighan bir chong maliye pilani bolush kérek. Amérika xelqi hazir ikki namzatning iqtisadni güllendürüsh pilanlirining qaysi muwapiq ikenlikini talliwélish üchün bash qaturuwatidu.

Barak obamagha qest qilishni pilanlighan ikki aq tenlik irqchi qolgha élindi

Shinxu'a agéntliqining bügün xewer qilishiche, démokratlar partiyisining prézidént kandidati barak obama özining awaz üstünlükini saqlash üchün, jumhuriyetchiler partiyisining prézidént namzati john mikkéyin bolsa özining ghelibe qazinishi üchün tirishiwatqan jiddiy peytte, aq tenlik irqchi daniyal koward )yigirme yash( bilen pawl shléssilman )on sekkiz yash( ikkileylen barak obamani öltürüshni pilanlighanliqi üchün tennasi shitatining fédéral teptishliri teripidin qolgha élindi.

Afriqiliqlar obamani alqishlimaqta

Merkizi agéntliqining yohennis burgtin xewer qilishiche, uganda, kéniye, jenubiy afriqa qatarliq afriqa döletliride, kishiler amérika prézidénti bolup saylinishi mumkin bolghan afriqa neslidiki barak obamagha alqish yaghdurmaqta. Ularning qarishiche, eger obama amérikining 46‏ - qétimliq prézidénti bolsa, iraqta we bashqa döletlerde urush toxtaydu.

Xewerde éytilishiche yene, afriqa döletliride ezeldin amérikigha qiziqmaydighan qiz - oghul yashlar ichidimu hazir obamani özining ülgisi, ghayisi dep qarap, obama süretlik mayka kiyish moda boldi. Obamaning ata yurti kéniyide bolsa, amérikidiki saylam uchurliridin xewer tépish üchün kishiler TV din köz üzmey, hayajanlinip munazire qilishmaqta we amérikidiki jumhuriyetchiler partiyisining kandidati john makkéynning qollighuchiliri obamani 'sotsiyalizimchi' dégenlikige naraziliq bildürmekte.

Bitereplermu barak obama bilen qehriman makkéynning qaysisigha bélet tashlashni jiddiy oylashmaqta

Bu qétimqi prézidént saylimida, bitereplerning kimge bélet tashlaydighanliqini belgiliwalghandin kéyin qoshulidighan bélet sanighimu sel qarighili bolmaydu. Amérika uniwérsitétining tehlilchisi richning qarishiche, amérikida biterep halette turuwatqan saylam ehlimu, hazir zirek obama bilen qehriman makkéynning qaysisigha bélet tashlashni jiddiy oylashmaqta.

Ayallarning tughushni tallash hoquqi mesiliside we oxshash jinsliqlarning toy qilishni qanunlashturush mesiliside, ularning makkéyn'ge bélet tashlaydighanliqi éniq. Emma iqtisadiy mesile we déplomatiye mesilisi jehette, qaysi kandidatqa bélet tashlashni talliwélishi hazir gerche qiyindek körünsimu, emma kéler seyshenbe küni chuqum birsige bélet tashlaydighanliqi éniq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet