'Америка сәпири' намлиқ һөҗҗәтлик филимдә америкидики мусулманлар тонуштурулди

Америка университетиниң оқутқучиси профессор Akbar Ahmed әпәнди бир қисим америкилиқларниң иислам дини вә мусулманларға болған сәлбий қарашлирини йоқитиш үчүн, америкида яшаватқан барлиқ мусулманларниң ортақ тиришчанлиқ көрситип, паалийәтлирини күчләндүрүш вә гүзәл әхлақ пәзилити арқилиқ кишиләрни қайил қилиш тәшәббүсини оттуриға қойди.
Мухбиримиз әқидә
2010-11-18
Share
amerika-sepiri-islam-dini-305 Сүрәт, 'америка сәпири' намлиқ китапниң ташқи көрүнүши.
www.amazon.com Дин елинди.

Әң йеңи мәлуматларға асасән, америкида йәттә милйон әтрапида мусулман яшайдиғанлиқи оттуриға қоюлмақта. Америкиниң һәрқайси шитатлиридики шәһәрләрдә көплигән мәсчитләр болғандин сирт, Michigan шитатиниң Dearborn шәһири әрәб мусулманлириниң макани һесаблиниду. Америкидики әң қәдимий мәсчит Ayova шитатида болуп, шийә мусулманлири мәркизи NewYork та, һәмдә пайтәхт вашингтонға әң чоң ислам мәркизи җайлашқан.

Омумән ислам дини америкиниң һәммә җайлириғичә, болупму муһаҗирлар көп яшайдиған җайларда турмушниң айрилмас қисмиға айлинип болған шуниңдәк америкида яшайдиған мусулманлар болса һәр қайси саһәләрдә муһим орунни игиләп, америка үчүн зор төһпиләрни қошмақта.

Шундақ болушиға қаримай, бир қисим америкилиқларда мусулманларға қарита сәлбий қарашларму мәвҗут болуп, пакистанлиқ сабиқ дипломат,  америка университетиниң оқутқучиси Akbar Ahmad әпәнди, америкилиқларниң исламни өзлиригә тәһдит дәп қарайдиғанлиқини, бу хил көз қарашларға рәддийә бериш үчүн барлиқ мусулманларниң ортақ тиришчанлиқ көрситип, паалийәтләрни күчләндүрүшини, болупму гүзәл әхлақ пәзилити арқилиқ кишиләрни қайил қилишини тәшәббүс қилған.

Әкбәр әхмәт әпәнди йәнә  оқуғучилири билән биргә америкиниң75 шәһиридә, мәхсус тәкшүрүш елип берип, "америка сәпири" намлиқ һөҗҗәтлик филим һазирлиған. Филимдә америкилиқларниң ислам диниға вә мусулманларға қарита иҗабий вә сәлбий қарашлири көрситилгән.

Филимдә бир қисим америкилиқлар  "мусулманларни яхши көрмәймиз, улар бизниң әйсаға баш урмайду" дейишсә, йәнә бир қисимлири, "мусулманлар юртимизни игиливилип, ислам әқидиси бойичә түзүм бәрпа қилишқа урунмақта ", "мусулманлар аялларни хорлайду" дегән.

Әкбәр әхмәт әпәндиниң қаришичә, 11 ‏- сентәбирдин кейин америкида мосулманларға болған қарашлар өзгәргән. Ислам дини вә мусулманларға болған сәлбий қарашларни йоқитишниң бирдин ‏- бир йоли, мусулманлар арисидики паалийәтләрни күчләндүрүштин ибарәт икән.

Әкбәр әхмәт әпәндиниң "америка сәпири" намлиқ һөҗҗәтлик филимигә интайин юқири баһа берилгән. Бу хил баһаларда буниңдин илгири мусулманларни толуқ чүшәндүридиған, мәзкүз һөҗҗәтлик филимдәк мүкәммәл бир тонуштурушниң оттуриға чиқимиғанлиқи тәкитләнгән болуп, филимдә мусулман зиялийлар, дохтур, һөнәрвән, тиҗарәтчи вә адвокат аяллар тоғрисидики мәлуматларни көргили болиду.

Мәсилән, филимдә 1971 ‏- йили америкиға пәқәт 100 доллар билән келип, һазир америкидики әң чоң карханичилар қатаридин орун алған Munir Chodiry әпәндиниң һаяти тонуштурулған болуп, у" :мәйли қайси саһәдә болсун, инсан тиришчанлиқ көрситип меһнәт қилсила, көзлигән мәқситигә йетиду, һазир мениң карханамда миңлиған киши хизмәт қилиду" дегән.

Америкида 10 йилдин буян яшаватқан җамаәт әрбаби ғәйрәт һаҗимниң қариши Munir Chodiry билән охшаш болуп, у америкида яшаватқан уйғур мусулманлириниң әркин ибадәт қилиш билән тәң, һәрқайси саһәләр бойичә тиришчанлиқ көрситип, нәтиҗиләрни қолға кәлтүрүп, яхши һаят кәчүрүватқанлиқини билдүрди.

"Америка сәпири" филимидә тәсвирлишичә йәнә, вирҗиния шитатиға җайлашқан "арлиңтон дөләтлик қәбристанлиқи"да йүзлигән мусулманларниң қәбриси бар болуп, улар америкини өзиниң ана вәтини орнида қоғдап, күрәш қилип иссиқ қенини төккән җәңчиләр қатаридин орун алған. Мәлуматларға қариғанда нөвәттә 15 миң мусулман америка армийисидә вәзипә өтимәктә.

Профессор әкбәр әхмәт әпәнди сөзидә йәнә, нюйорктики "әркинлик илаһи" ниң америкиниң символи икәнликини, бу земинға қәдәм басқан һәр инсанниң қизғин күтивелинидиғанлиқи, шуңа муһаҗирларниң бу дөләтниң ронақ тепиши үчүн һәссә қошуп, төһпикар пуқраға айлиниши керәкликини оттуриға қойған.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт