Prizédént bush téksasta se'udi weli'ehdi bilen söhbetleshti

Seyshenbe küni, amérika prézidénti jorj w bush, özining téksas shitatidiki qoruqida se'udi erebistanning weli'ehdi abdulla bilen üch yildin béri tunji qétim uchriship, öz - ara söhbet élip bardi.

Hazirche, söhbet mezmuni heqqide éniq melumat bolmisimu, biraq bu qétimqi uchrushushning aldida prézidént bush: " se'udi erebistanning weli'ehdi néfit - gaz bahasini kontrol qilishta ölchemlik sewiyini saqlap qalalaydu" dégen qarishini otturigha qoyghan idi.

Mölcherleshlerge qarighanda, ikki terepning söhbet mezmuni ottura sherqning tinchliqi bilen munasiwetlik bolup, rayondiki qarshiliq körsetküchi qoralliq küchlerni basturush we se'udi erebistanning dunya soda teshkilatigha kirish mesililirini öz ichige alidiken.

Küzetküchiler: " prézidént bush bu qétimqi uchrishish pursitini ching tutup, néfit bahasining pewqul'adde örlep kétish mesilisige estayidil mu'amile qilish kérek, bu néfit bahasini hel qilishtiki yaxshi bir peyt hésablinidu" diyishmekte.

Bu arida, en'giliye b b s radi'o - téléwiziye istansisi bu heqte xewer bérip, tashqi dunya abdulla bilen bushning bu qétim téksasta élip barghan uchrishishini intayin sezgür bolghan bir qétimliq uchrishish dep qaraydu, sewebi üch yil burun yüz bergen 11 - séntebir weqesini keltürüp chiqarghanlarning köpinchisi se'udi erebistanliqlar bolup, shundin béri amérika bilen se'udining munasiwiti jiddiylik ichide dawamliship kéliwatatti digen'ge oxshash mesillerni bayan qildi.

Démek, küzetküchiler buningdin yene " yuqirida tilgha élin'ghan mesilini arqa körünüsh qilghan asasta, ikki terep rehberliri, ortaq yosunda térrorchiliqqa qarshi turush hemkarliqini kücheytishni shuningdek ottura sherq rayonigha démokratiyini tarqitishni eng asasliq söhbet témisi qilishi mumkin " dégen yekünni chiqardi.

Prézidént bush, abdulla bilen uchrishishtin ilgiri, amérika xelq nöwette eng köngül bölüwatqan, bolupmu bushning étibarini ashuridighan muhim mesillerdin biri bolghan néfit bahasi heqqide muxbirlargha söz qilip: " se'udi erebistanning rehbiri, néfit bahasini normal saqlap turushning halqiliq muhim mesile ikenlikini bilidu, shunga men abdulla bilen bu mesile üstide yaxshi muzakirilishimen" digen .

Ötken hepte bush yene : " méning qarishimche, ular héchqachan néfit quduqlirini kolap qurutup bolmidi" dep ashkara otturigha qoyghan. Bu sözdin peqet se'udini mehsulat ishlepchiqirish miqdarini ashurushqa köndürgendila , néfit bahasining qimmitini chüshürgili bolidu dégen qarashni köriwalghili bolidiken.

Biraq, néfit mutexessislirining qarishi del buning eksiche iken, ular se'udi erebistan üchün élip éytqanda, hazir ular eng köngül bölidighan muhim mesile pelestin - isra'iliye mesilisining tinchliq bilen hel qilinishi bolup, se'udi erebistan mezkur mesilining ténch yol bilen hel qilinishi, pütkül erep dunyasining tinchliq pilani bilen biwaste munasiwetlik dep hésablaydiken.

Lékin, isra'iliye ghezze rayonidin chékinip chiqip kétish siyasitini yolgha qoyushqan temshiliwatqan bir muhim peytte, belki prézidént bush yuqirida tekitliniwatqan shertlerni qobul qilmasliqi mumkin iken .(Eqide)