Amérika teywendiki déplomatlirini aktip wezipidiki herbiylerdin tallaydu

Washin'gtonning teywende turushluq ish bashqarmisidiki déplomatik emeldarliqini, dölet mudapi'e ministirliqida aktip wezipidiki herbiylerning üstige alidighanliqi élan qilindi.

Amérika 25 yilliq siyasitini özgertti

En'giliyide chiqidighan "jénis mudapi'e heptilik zhornili ning ashkarilishiche, amérika 25 yildin béri dawamlashturup kéliwatqan aditini buzup, teywende turushluq amérika ish bashqarmisidiki herbiy emeldarini, tunji qétim aktip wezipidiki herbiylerdin teyinleshni qarar qilghan.

Amérika 1979 - yili xitay bilen déplomatik munasiwet ornatqandin kéyin, teywendiki amérika elchixanisini béyjinggha köchürüp, bu yerdiki déplomatik orginini amirika ish bashqarmisigha özgertken, shundaqla ish bashqarmisidiki herbiy emeldarliqni pinsiyige chiqqan herbiyler yaki sabiq déplomatlar üstige alghan idi.

Yéngi siyasetni dölet mejlisi testiqlighan

"Jénis mudapi'e heptilik " zhornilining xewerige qarighanda, teywendiki amérika herbiy emeldarining ornini aktip wezipidiki herbiyler üstige élish heqqidiki qanun teklip layihisi, 2002 - yili amérika awam palatasi teripidin testiqlan'ghan bolup, "amérikining dölet menpe'etige zörür bolsa " teywen'ge aktip wezipidiki herbiy emeldar ewetishni maqullighan. "Jénis mudapi'e heptilik zhornili " ning körsitishiche, bu siyaset amérikining teywen bilen bolghan herbiy munasiwitini kücheytidighanliqini shundaqla xitayning teywen boghizidiki herbiy qara niyitidin ensirewatqanliqini körsitidiken.

Amérikining teywen mesilisidiki siyasiti özgermidi

Teybéydiki amérika ish bashqarmisining bayanatchisi dana smis, yuqiriqi wezipige " amérika dölet mudapi'e ministirliqidiki herbiy forma kiymeydighan xadimlar yaki aktip wezipidiki herbiyler teyinlinidighanliqi" ni bildürdi. U, amérikining teywen mesilisidiki meydanida özgirish bolmighanliqini eskertip, bu qétimqi özgirishni " xizmet ünümini östürüsh yolidiki normal kadir almashturush, bu shunchilikla ish" dep körsetti.

Amérikining teywen'ge aktip wezipidiki herbiy déplomat ewetish qarari, xitay hökümitining derhal naraziliqini qozghidi. Xitay tashqi ishlar ministirliqi, amérikining siyasiti teywen boghizi ikki qirghiqi munaswitining muqimliqini buzidu, dep agahlandurghan.

Xitay tashqiy ishlar ministirliqining bayanatchisi lyu jyenchaw, seyshenbe küni ötküzülgen muxbirlarni kütüwélish yighinida washin'gtonni tenqid qildi. Lyu jyenchaw mundaq deydu: "amérikining teywen bilen her qandaq bahane yaki shekilde herbiy munasiwet qilishi, jonggo - amérika otturisidiki üch qoshma axbaratning rohigha xilap. Bu xil heriketler teywendiki bölgünchilik pa'aliyitige yel bérip, teywenning tinchliqi , muqimliqi we jonggo - amérika munasiwitige buzghunchiliq qilidu. Biz amérikining wedisige emel qilip, teywen'ge qoral - yaraq sétip bérish we teywen bilen bolghan herbiy munasiwetni toxtitishni shundaqla jonggo bilen amérikining ortaq menpe'etini ziyan'gha uchritishtin saqlinishni ümid qilimiz."

Amérika teywen bilen yer ijarige élish toxtimi tüzdi

Bu arida washin'gton, teywendiki amérika ish bashqarmisining yéngidin sélinidighan xizmet binasi üchün, teywen bilen 99 yilliq yer ijarige élish toxtimi imzalighan. Teywen tashqi ishlar ministiri chén tangshyen, " bu kélishim teywen bilen amérika munasiwitining zichliqini körsitidighan eng yaxshi pakit," dep körsetken. Teywendiki amérika ish bashqarmisining bashliqi doglas poll, kélishimni " amérika - teywen xelqler munaswitining xatire munari" dep teripligen.

Amérikining teywen'ge esker chiqirishini dölet mejlisi qarar qilidu

Buning bilen birge amérikining mu'awin tashqi ishlar ministiri richard armitej, teywen mesilisi heqqide toxtulup, " teywen munasiwet qanuni' da amérika teywenni choqum qoghdaydu déyilmigen, dep körsetti. U mundaq deydu : " teywen munasiwet qanunidiki belgilimide, bizning asiya - tinch okyan rayonida yiterlik herbiy küch turghuzup, tasadipiy hujumning aldini élishimiz teshebbus qilin'ghan. Biraq, bizning ularni choqum qoghdishimiz belgilenmigen." Armitej, eger xitaylar teywen'ge qoralliq hujum qilsa, amérikining esker chiqirish - chiqarmasliqini amérika dölet mejlisi qarar qilidighanliqini tekitligen.

"Amérika teywendin asan waz kechmeydu"

Armitejning sözi teywenliklerning jiddi inkasini qozghighan. Teywen dölet kabintining bayanatchisi chén chiméyning bildürüshiche, teywenning amérikida turushluq wekili li dawéy , amérika tashqi ishlar ministirliqi we dölet xewpsizlik komitétidin armitejning sözige chüshenche bérishni telep qilghan. Teywenning mu'awin dölet mudapi'e ministiri xu jénpu, te'uwen qanun chiqirish palatasida söz qilip, amérikining teywendin asanliqche waz kechmeydighanliqini bildürgen. Xu jénpu " bizning pilanimiz musteqil urush qilishni aldinqi shert qilghan. Men amérikining teywendin waz kechmeydighanliqigha ishinimen. Chünki, ikki qirghaq munasiwiti hergizmu noqul halda bizning xitay kompartiyisi bilen bolghan munaswitimiz emes. Bu pütün rayonning bixeterlikige munasiwetlik mesile," dep körsetken.

Amérika 1979 -yili " teywen munasiwet qanuni" ni maqullap, teywenni qoghdash mejburiyiti barliqini qobul qilghan. Amérika teywenning eng muhim herbiy ittipaqdishi shundaqla teywenni qoral- yaraq bilen teminleydighan asasliq dölet. Nöwette teywen hökümiti amérikidin 15 yil ichide 18 milyard dollarliq qoral - yaraq sétiwélish xam chotini teywen parlaméntining testiqlishigha sun'ghan.(Erkin)