Xitay bilen amérika herbiy munasiwetler boyiche söhbet élip bardi


2005-02-01
Share

Teywen mesilisi xitay - amérika yuqiri derijilikler herbiy söhbétidiki eng sezgür témilarning biri bolghan. Amérika herbiy wekiller ömikige dölet mudapi'e ministirliqining mu'awin yardemchi ministiri richard lawléz yitekchilik qildi. Xitay terepke dölet mudapi'e ministirliqining tashqiy ishlar idarisi bashliqi jang bangdong bashchiliq qilghan. Bu qétimqi söhbetni her ikkila terep " siyaset mesililiri boyiche resmi dé'alog" dep atidi.

Teywen mesilisi

Düshenbe küni bashlan'ghan söhbet témisi térorchiliqqa qarshi turush, rayon xaraktirlik bixeterlik shundaqla teywen boghuzidiki jiddi weziyetke chétilghan. "Jonggo" gézitining xewer qilishiche, xitay dölet mudapi'e ministirliqining emeldari polkownik tu chiming, ikki terepning teywen boghuzi weziyitini muzakire qilghanliqini ashkarilighan. Béyjing hökümiti teywen mesilisining xitay - amérika munasiwitige tosalghu yaritiwatqan muhim amilliqini agahlandurup, amérikining teywenni qoral - yaraq bilen teminlesh siyasitini tenqid qilip keldi. Amérika teywen boghuzi ikki qirghiqining herbiy küch jehettiki tengpungliqini saqlash, teywen boghuzidiki muqimliqni qoghdashqa paydiliq, dep körsetmekte. Chünki béyjing hökümiti teywen musteqilliq jakarlisa herbiy hujum qozghaydighanliqini agahlandurup kelgen.

Uyghurlar mesilisi

Térorchiliqqa qarshi turush mesiliside qandaq konkért mesililer boyiche söhbet élip bérilghanliqini her ikkila terep élan qilmidi. Bu jehette amérika afghanistanda esirge élin'ghan gu'antanamodiki Uyghurlarni xitaygha qayturmaydighanliqini ashkare jakarlighan. Gu'antanamodiki Uyghurlarni qayturup bérishni telep qilghan béyjing hökümiti, amérikini térorchiliq mesiliside qosh ölchem qollinish bilen eyiplimekte. Amérika, gu'entanamodiki Uyghurlar xitaylargha qayturup bérilse ten jazasigha uchraydighanliqini shundaqla ölüm jazasi bilen jazalinish ihtimalliqi éghirliqini eskertip keldi.

Qoral-yaraq mesilisi

Xitay - amérika otturisidiki ixtilaplarning yene biri, shimali koriye yadro qorallar mesilisi bilen yawropa ittipaqining xitaygha qoyghan qoral - yaraq imbargosi hisaplinidu. Yawropa ittipaqi 1989 - yili tyen enmindiki oqughuchilar herikiti basturulghandin kéyin xitaygha imbargo qoyghan . Amérika xitaygha qoyulghan qoral - yaraq imbargosini bikar qilishqa qarshi chiqmaqta. Washin'gton, xitayning yawropadin sétiwalghan qorallar bilen teywen'ge hujum qilishidin ensireydiken. Biraq xitay tashqiy ishlar ministirliqining bayanatchisi kong chü'en, amérikining endishisini " orunsiz " dep körsetti. U, "imbargoni bikar qilish 3 - bir döletning menpe'etige tesir yetküzmeydu shundaqla ziyan'gha uchratmaydu," dep sözlidi . Kong chü'en , amérikini öz ichige alghan 3 - bir döletning bu mesilige tosqunluq qilmasliqini ümid qilghan

Biraq xitay dölet mudapi'e ministirliqidiki emeldarlar, imbargo mesilisining xitay - amérika herbiy wekiller söhbitidiki muzakire témisi emes, dep körsetmekte. Fransiye axbarat agéntliqining xewer qilishiche, polkownik tu chiming söhbet témisining qoral - yaraq imbargosi bilen shimali koriye yadro qorallar mesilisige chétilmighanliqini bildürgen. Ikki terep otturisidiki söhbet seyshenbe küni axirlashti.

Teywen mesilisi xitay –amérika munasiwitidiki muhim amil

Amérika herbiy wekiller ömikining bashliqi richard lawliz, shu küni xitay xelq azatliq armiyisining mu'awin shtab bashliqi shyong gu'angkey bilen söhbet élip barghan. Fransiye axbarat agéntliqining xewer qilishiche, richard lawliz amérika " teywen mesilisining tinch yollar bilen hel bolushini ümid qilidu," dep körsetken. Shinxu'a axbarat agéntliqi shyong gu'angkeyning " teywen mesilisi jonggoning igilik hoquqi we zimin pütünlikige alaqidar, jonggo xelqining négizlik menpe'etige munasiwetlik prinsipal mesile shundaqla jonggo - amérika munasiwitidiki muhim amillarning biri," dep söz qilghanliqini xewer qildi.

Amérika tinbch okyan armiyisi 7 - pilotining qomandani mu'awin admiral jonatan gréynértning bildürüshiche, koriye yérim arilidiki urush xewpiy, teywen boghuzining weziyiti shundaqla xitay - yaponiye munaswitining yiriklishishi amérika déngiz armiyisini endishige sélishqa bashlighan. Polkownik tu chiming, ikki terep herbiy wekillirining öz- ara issiq liniyilik téléfon alaqisi ornitish, 2005 - yildiki herbiy almashturush pilani shundaqla herbiy bixeterlik mesililiri boyiche muzakire élip barghanliqini bildürgen. Xitay - amérika herbiy munaswiti 2001 - yili 4 - ayda xitay urush ayrupilani bilen amérika razwitka ayrupilanining soqulup kétish weqesidin kéyin ongushsizliqqa uchrap, 2003 - yili eslige kélishke bashlighan. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet