Xitay bilen amérika otturisidiki soda majrasi barghanséri kücheymekte


2006-08-31
Share

Wall Street Zhornilidiki maqalida, yéqinqi bir nechche aydin buyan xitay hökümitining chet'el shirketlirining xitay shirketliri bilen birlishishige qarita tekshürüshni alahide kücheytip, chet'el meblighining xitay bankilirigha kirishni tosaydighan bir yürüsh belgilimilerni tüzüp chiqqan.

Xitayning yuqiri qatlamdiki rehberliri bolsa, xitayning tereqqiy qiliwatqan döletler arisidiki nechche yillardin buyan chet'el meblighini eng köp qobul qilghan dölet bolush süpiti bilen, chet'el meblighigha qarita ishikni qet'iy yépiwalmaydighanliqini, emma yéngi chiqirilghan bu cheklime belgilimilerning chong hejimdiki iqtisadiy tengpungluqning éhtiyaji bolup, hergizmu melum chet'el shirketlirige qarshi tedbir emeslikini tekitligen.

Chet'el meblighini özige tartish emdi xitayning aldinqi wezpisi emes

Xewerde melum bolishiche, bu yéngi tedbirler xitaydiki parche satquchi sodigerlerning telipige bina'en chiqirilghan iken. Eger bu belgilimiler emeliyleshtürülse, xitayda tijaret qiliwatqan < wal-mart> we kaliforgha oxshash parche satquchi chet'el shirketliri paydisiz orun'gha chüshüp qalidiken. Amérika karxaniliri shu sewebtin, xitayning bu yéngi belgilimilirining chet'el shirketlirining xitay bazirigha kirishini téximu qiyinlashturidighanliqidin endishe qilmaqta. Yawropa "sandérbérd soda inistituti" ning béyjingda turushluq asiya ishliridiki mu'awin mudiri lin dün "xitay hazir chet'el shirketlirige qattiq mu'amile qilalaydighan mezgilge keldi. Chünki chet'el meblighini özige tartish emdi xitayning aldinqi wezpisi emes" deydu.

Nöwette amérika soda wekili suzan shwab béyjingda ziyarette boliwatqan bolup, u xitay emeldarliri bilen körüshkende bu mesililerni otturigha qoyghan hemde xitayning chet'el shirketlirige qayturghan inkasining baldurluq qilidighanliqini bildürgen. Suzan yene, amérika xitay soda munasiwetliride toxtitilip, amérikining soda guruppiliri gerche xitayda melum derijide paydigha érishiwatqan bolsimu, lékin ularning xitayda soda qilishi nurghun tosalghulargha duch kéliwatqanliqini éytqan. Uning éytishiche, xitay dunyadiki 3‏- chong soda döliti bolush süpiti bilen esli dunya sodisida téximu chong we téximu aktip rol oynishi kérek؛ tamojna béjini ilgirligen halda qisqartip soda tosalghulirini azaytishi we özining emeliy herikiti bilen dunya sodisidiki chong dölet bolush ornini ipadilishi kérek.

Amérika karxanilirining xitayda tijaret qilishi omumiyüzlük qilip éytqanda xushallinarliq bolmighan

Buning bilen bir waqitta, amérika-xitay soda komitéti charshenbe küni bir parche doklat élan qilip, bu komitétqa tewe karxanilar üstidin élip barghan bu yilliq tekshürüshige asasen, amérika karxanilirining xitayda tijaret qilishi omumiyüzlük qilip éytqanda xushallinarliq bolmighanliqini körsetken. Doklatta melum bolishiche, xitayda tijaret qiliwatqan amérika shirketlirining 81% i paydigha érishken bolsimu, lékin ular tijaret resmiyetlirini teste béjirish, eqliy mülük hoquqi yaxshi qoghdalmasliq we nazaret tüzümliri rushen bolmasliq qatarliq türlük tosqunluqlargha duch kelgen.

Amérika soda wekili suzan shwab bu nöwet xitay emeldarliri bilen körüshkende, gerche xitay bilen amérika otturisida yuqiridek bir yürüsh soda ixtilapliri mewjut bolsimu, lékin amérikining bu mesililerni xitay bilen söhbet arqiliq hel qilishni xalaydighanliqini, xitaygha zit tedbirlerni qollunushni ep körmeydighanliqini bildürgen. Suzan shwab seyshenbe künidin bashlap xitayda ziyarette bolup, béyjingda ötküzülgen yer shari soda söhbitige qatnashti. U muxbirlarning ziyaritini qobul qilghanda, " méning bu qétim xitaydiki sepirimning meqsiti, xitayni dunya soda teshkilatigha bergen wediside turushqa ündesh. Undaq bolmighanda, eng ziyan tartidighini xitay özi bolidu" dep bildürgen. Nöwette amérika xitay bilen bolghan soda munasiwetlirige jiddiy pozitsiye tutmaqta. 2005‏- Yili amérikining xitay bilen bolghan soda passip balanisi 200 milyard amérika dollirigha yetken. (Peride)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet