Amérika bilen xitay otturisida 'eqliy mülük hoquqi' jidili yene bashlandi

Xitay dunya soda teshkilatigha eza bolup kirgendin kéyinmu, xitayda amérikining eqliy mülük hoquqigha tajawuz qilip ishlen'gen yumshaq détal, d w d, sa'et, kiyim - kéchek we qimmet bahaliq tére mehsulatliri qatarliq her xil mallar, saxta marka chaplan'ghan mallar, hetta insaniyetning salametlikige ziyan salidighan zeherlik madda qétilghan mehsulatlar dunyagha yamrap kétiwatqanliqi hemmige ayan.
Muxbirimiz weli
2009.01.27
Saxta-Dvd-xitay-305 Xitayda eqliy mülük hoquqigha tajawuz qilip ishlengen we musadire qilinghan saxta DVD lar.
AFP Phot

Bu heqte amérika bilen xitay otturisida köp qétim söhbet ötküzülgen bolsimu, emma mesile hel bolmidi, belki xitay özi tüzüwalghan bezi namuwapiq belgilimiler tüpeylidin, xitayning saxta malliri dawamliq bazargha kirip, bashqa döletlerning menpe'etige ziyan séliwerdi.

Fransiye agéntliqining bayan qilishiche, amérika terep 2007‏ - yili 4 ‏ - ayda dunya soda teshkilatigha eqliy mülükni qoghdash buyiche xitay üstidin erz sun'ghan idi. Dunya soda teshkilatining erziyetlerge höküm chiqirish guruppisi tünügün bu heqte höküm chiqardi. Hökümde 'xitayda eqliy mülük hoquqini qoghdash organliri we qa'ide - tüzümler mukemmel emes, xitayning sodida eqliy mülük hoquqini qoghdishi dunya soda teshkilatning ölchimige uyghun emes' dep körsetti.

Eqliy mülük hoquqi heqqidiki erziyette amérika utti

Amérika awazining bayan qilishiche, dunya soda teshkilatning tünügünki hökümi élan qilin'ghandin kéyin, erzde utup chiqqan amérikining dunya soda teshkilatida turushluq wekili pitér algéyr bayanat élan qilip, dunya soda teshkilatining 'xitayda eqliy mülük hoquqini qoghdash sistémisi mukemmel emes' dégen bahasining toghriliqini téximu ilgirilep ispatlidi we xitay hökümitidin yene 3 xil tosalghuni, yeni birinchidin, eqliy mülük hoquqi toghrisida xitay özi tüzüwalghan namuwapiq belgilimilerni؛ ikkinchidin, xitayda eqliy mülük hoquqigha tajawuz qilip ishlen'gen saxta mallar musadire qilin'ghandin kéyin, uni töküp sétishqa qiliniwatqan tosqunluqni؛ üchinchidin, xitayda ishlen'gen saxta mallarni jinayet dep hésablashning ölchimi toghrisida xitay özi belgiliwalghan cheklimini emeldin qaldurushni telep qildi.

Xitay dunya soda teshkilatning hökümige qarshi chiqti

Emma xitay terep bügün dunya soda teshkilatning hökümi toghrisida bayanat élan qilip, amérika bilen xitay otturisidiki eqliy hoquq mesiliside dunya soda teshkilatning xitayni qollimighanliqigha naraziliq bildürdi.

'Xitay xewer agéntliqi'ning bayan qilishiche, xitay soda ministirliqining bayanatchisi yaw jyen bügünki bayanatida 'dunya soda teshkilatining erzlerge höküm chiqirish guruppisining eqliy mülük hoquqi mesiliside bizni qollimighanliqigha epsuslinimiz' dep jakarlighan. U bayanatida yene 'biz xelq'ara soda teshkilatning tünügün élan qilghan doklatigha qaytidin baha bérimiz' dep qarshiliq körsetken we 'hökümitimiz eqliy mülük hoquqini qoghdashqa yuqiri ölchem bilen hürmet qilip kéliwatidu, bolupmu 30 yilliq islahat jeryanida, eqliy mülük hoquqi jehette qanun tüzdi, teshwiqat élip bardi we uni ijra qilish üchün xelq'ara bilen yéqindin hemkarliship keldi. 2008‏ - Yilida yene 'junggoning eqliy mülükni qoghdash tézisi'ni tüzüp chiqip, xelq'aradiki soda munasiwetlirini saghlam tereqqi qilduruwatidu', dep seweb körsetken.

Soda teshkilatining erzlerni sorap höküm chiqirishqa bashlighanliqi xushallinarliq ish

Amérika bilen xitay otturisidiki eqliy mülük hoquqi mesiliside qaytidin qozghalghan bu talash - tartish heqqide mutexessisler obzor élan qilishqa bashlidi. Amérika awazining bayan qilishiche, xelq'ara eqliy mülük hoquqi mesililiri buyiche amérikidiki kéniyan adwokat mulazimet ornining meshhur adwokati elin lumbart 'dunya soda teshkilatning hazir eqliy mülük hoquqi mesililiridiki erzlerni sorap höküm chiqirishqa bashlighanliqi bir xushallinarliq weqe. Hazir dunyada eqliy mülük hoquqigha tajawuz qilish mesilisi dunyaning tertipini qalaymiqanlashturuwatqan bir chong mesile bolup qalghan idi. Dunya soda teshkilatining bu mesilide chiqarghan hökümi dunyaning tertipini onglash we döletler ara adaletlikni tiklesh üchün intayin muhim ehmiyetlik' dégen.

Tyenjin soda - tijaret uniwérsitétining proféssori li wéygu'angning bayan qilishichimu, xitay 1980‏ - yilidila dunya eqliy mülük hoquqi teshkilatigha eza bolup kirgen idi, ottuz yilgha yéqin waqittin buyan bazar igilikini tiklewatidu. Bu jeryanda xitayda ilgirilesh bolmidi emes, emma ilgirilesh bekla asta. Amérika bilen xitay otturisidiki eqliy mülük hoquqi mesiliside, tünügün dunya soda teshkilatining chiqarghan hökümi emeliyetke uyghun. Bundaq höküm buningdin kéyin xitayni qanun buyiche ish qilidighan yolgha bashlaydu.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.