Рай синашта мәлум болған сәлбий баһаларму америка һөкүмитигә ашкара аңлитилди

Америкидики 'пев' тәтқиқат мәркизиниң рәиси андиру кохут бүгүн вашингтонда, америка һөкүмитигә вә америка хәлқиғә 4‏ - айдин 5‏ - айғичә 21 дөләттә елип берилған рай синаш әһвалини, болупму дуня хәлқиниң америка һөкүмитигә болған көз қаришини ашкара чүшәндүрди.
Мухбиримиз вәли
2010-06-18
Share

Америкидики 'пев' тәтқиқат мәркизи 'пүтүн йәр шари буйичә хәлқниң райи' дегән темида 4‏ - айдин 5 ‏ - айға қәдәр 21 дөләттә 24 миң адәм даирисидә рай синаш елип барған иди. Түнүгүн бирләшмә агентлиқи бу рай синашниң нәтиҗисини, болупму пүтүн йәр шари буйичә иқтисад төвәнләшкә йүзләнгәндин кейин, шундақла америка афғанистан, ирақларда уруш қилған вәзийәттә, дуня хәлқиниң райи қандақ икәнлики тоғрисидики санлиқ мәлуматларни елан қилған иди.

Бүгүн дунядики б б с қатарлиқ башқа чоң учур вастилириму, бу рай синаш нәтиҗисини техиму тәпсилий елан қилди. Америка авази болса, бу рай синашта мәлум болған дуня хәлқиниң америкиға болған көз қарашлириниң тәпсилатинила әмәс, бәлки америкиниң дөләт ичидә, хәлқниң һазирқи америка һөкүмитигә қарита қандақ охшимиған көз қарашлири барлиқиниму ашкара елан қилди.

'Мусулманларниң нопуси әң күп 7 дөләттә америкиға гуман билән қарайдиған адәм көп'

Бирләшмә агентлиқиниң баян қилишичә, дуняда мусулманларниң нопуси әң күп болған 7 дөләттә, америкиға гуман билән қарайдиған адәм көп. Мисирда америкини қоллайдиған адәм 17%, пакистанда, түркийидә 21%, ливанда 52%, һиндонезийидә 59%, негирийидә 81%. Буниң ичидә иорданийә, һиндонезийә, мисирларда, америка президенти обамаға болған қизиқиш бултурқидин төвәнләп кәткәнлики, пакистан қатарлиқ дөләтләрдә болса, көпинчә адәмдә америкини кәлгүсидики тәһдит дегән көз қараш пәйда болғанлиқи йәнә бир алаһидилик.

'Әмма, осама бин ладинниң әлқаидисини қоллайдиғанлиқини ипадилигән адәм чиқмиди'

Әмма бу дөләтләрдә, өзини өлтүрүвелиш шәкли билән һуҗум қозғашни қоллайдиған адәм аз, ливанда 39%, түркийидә 5%. Әмма бу қетимқи рай синашта, осама бин ладинниң әл -қаидисини қоллайдиғанлиқини ипадилигән адәм чиқмиғанлиқи йәнә бир алаһидилик.

'Германийә қатарлиқ дөләтләрдә америкини қоллайдиған адәм сани көпәйгән, әмма америкиниң афғанистан билән ираққа қаратқан сияситигә болған қаршилиқ наһайити җиддий'

Бирләшмә агентлиқиниң баян қилишичә, юқирида нами тилға елинған йәттә дөләттин башқа дөләтләрдә, йәни германийә, испанийә, русийә, хитай, франсийә, аргентина, җәнубий корийә, японийиләрдә америкини қоллайдиған адәм сани бултурқидин көпәйгән. Буниң ичидә германийә билән испанийидә 60%гә йәткәнлики, бу дөләтләрдә гәрчә америка һөкүмитиниң инавити өскән болсиму, әмма америкиниң афғанистан билән ираққа қаратқан сияситигә болған қаршилиқ наһайити җиддий икәнлики бир алаһидилик.

'Пәқәт хитайдила 90% адәм өз дөлитиниң иқтисадини яхши дәп пәхирлиниду'

Йәнә бир алаһидилик шуки, полша, хитай, бразилийидин башқа дөләтләрдә, хәлқ өз дөлитиниң иқтисадини яхши демәйду. Пәқәт хитайдила 90% адәм өз дөлитиниң иқтисадини яхши дәп пәхирлиниду.

'Мутләқ көп санлиқ дөләт иранға қарита һәрбий әмәс, иқтисадий җаза қоллинишни қоллайду'

Бу қетимқи рай синаш даирисидики мутләқ көп санлиқ дөләт, иранға қарита һәрбий җәһәттин әмәс, бәлки иқтисадий җәһәттин җаза қоллинишни қоллайду. Буниң ичидә 16 дөләт, иран билән һәрбий тоқунуштин сақлиниш керәк дәп қарайду.

'Мекискида америкини қоллайдиған адәм 62% дин 44% гә чүшүп қалған'

Бирләшмә агентлиқиниң баян қилишичә йәнә, америкиниң аризона шитатида қанунсиз көчмәнләргә зәрбә беридиған қанун мақуллиништин бурун, мекискида америкини қоллайдиған адәм 62% болуп, һазир 44% кә чүшүп қалған.

'Мусулманларниң обамадин үмидсизлинишкә башлиғанлиқи мәлум болди'

Америка авазиниң баян қилишичә, 'пев' тәтқиқат мәркизиниң рәиси андиру кохут бүгүн вашингтонда, америка һөкүмитигә вә америка хәлқиғә, 4‏ -айдин 5‏ - айғичә 21 дөләттә елип берилған рай синаш әһвалини, болупму дуня хәлқниң америка һөкүмитигә болған көз қаришини ашкара чүшәндүрди.

Андиру кохут бу қетимқи рай синаш нәтиҗисини тонуштурғанда, америка президенти обама 'мән америка хәлқниң пүтүн дунядики мусулманларға достлуқини вә саламини йәткүзгәнликим үчүн пәхирлинимән"! дегәндә гүлдүрас алқиш ләрзигә чиққан иди. Әмма бу қетимқи рай синашта, шуниңдин кейин, дунядики мусулманлар униңдин үмидсизлинишкә башлиғанлиқи мәлум болди' деди.

'Обама исраилийә билән пәләстин оттурисидики тоқунушни яхши биртәрәп қилмиди дегән сәлбий көз қараш мәвҗут'

'Пев' тәтқиқат мәркизиниң рәиси андиру кохут бу қетимқи рай синаш нәтиҗисини тонуштурғанда йәнә 'бу қетимқи рай синашта зияритимизни қобул қилған мусулманлар ичидә, америкини бир тәрәплимә дөләт, һәрбий тәһдит, афғанистан вә иран мәсилисини яхши бир тәрәп қилмиди дәп қараватқан адәм көп, техиму ямини, обамани исраилийә билән пәләстин оттурисидики тоқунушни яхши бир тәрәп қилмиди дегән сәлбий көз қараш мәвҗут' деди.

'Обама дуняда һүрмәткә сазавәр болсиму, әмма униң образи һазир дөләт ичидә мәсилигә дуч келиватиду'

Америка авази бүгүн бу һәқтә елан қилған хәвиридә йәнә 'гәрчә президент обама дуняда омумий җәһәттин йәнила һүрмәткә сазавәр болсиму, әмма униң образи һазир дөләт ичидә мәсилигә дуч келиватиду, америкида қаршилиқ ипадиләп намайиш қилған кишиләр, бизгә сотсиализмчи мустәбит керәк әмәс, дегәндәк шуарларниму товлап қойди' дәп баян қилди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт