Ray sinashta melum bolghan selbiy bahalarmu amérika hökümitige ashkara anglitildi

Amérikidiki 'péw' tetqiqat merkizining re'isi andiru koxut bügün washin'gtonda, amérika hökümitige we amérika xelqighe 4‏ - aydin 5‏ - ayghiche 21 dölette élip bérilghan ray sinash ehwalini, bolupmu dunya xelqining amérika hökümitige bolghan köz qarishini ashkara chüshendürdi.
Muxbirimiz weli
2010-06-18
Share

Amérikidiki 'péw' tetqiqat merkizi 'pütün yer shari buyiche xelqning rayi' dégen témida 4‏ - aydin 5 ‏ - aygha qeder 21 dölette 24 ming adem da'iriside ray sinash élip barghan idi. Tünügün birleshme agéntliqi bu ray sinashning netijisini, bolupmu pütün yer shari buyiche iqtisad töwenleshke yüzlen'gendin kéyin, shundaqla amérika afghanistan, iraqlarda urush qilghan weziyette, dunya xelqining rayi qandaq ikenliki toghrisidiki sanliq melumatlarni élan qilghan idi.

Bügün dunyadiki b b s qatarliq bashqa chong uchur wastilirimu, bu ray sinash netijisini téximu tepsiliy élan qildi. Amérika awazi bolsa, bu ray sinashta melum bolghan dunya xelqining amérikigha bolghan köz qarashlirining tepsilatinila emes, belki amérikining dölet ichide, xelqning hazirqi amérika hökümitige qarita qandaq oxshimighan köz qarashliri barliqinimu ashkara élan qildi.

'Musulmanlarning nopusi eng küp 7 dölette amérikigha guman bilen qaraydighan adem köp'

Birleshme agéntliqining bayan qilishiche, dunyada musulmanlarning nopusi eng küp bolghan 7 dölette, amérikigha guman bilen qaraydighan adem köp. Misirda amérikini qollaydighan adem 17%, pakistanda, türkiyide 21%, liwanda 52%, hindonéziyide 59%, négiriyide 81%. Buning ichide i'ordaniye, hindonéziye, misirlarda, amérika prézidénti obamagha bolghan qiziqish bulturqidin töwenlep ketkenliki, pakistan qatarliq döletlerde bolsa, köpinche ademde amérikini kelgüsidiki tehdit dégen köz qarash peyda bolghanliqi yene bir alahidilik.

'Emma, osama bin ladinning elqa'idisini qollaydighanliqini ipadiligen adem chiqmidi'

Emma bu döletlerde, özini öltürüwélish shekli bilen hujum qozghashni qollaydighan adem az, liwanda 39%, türkiyide 5%. Emma bu qétimqi ray sinashta, osama bin ladinning el -qa'idisini qollaydighanliqini ipadiligen adem chiqmighanliqi yene bir alahidilik.

'Gérmaniye qatarliq döletlerde amérikini qollaydighan adem sani köpeygen, emma amérikining afghanistan bilen iraqqa qaratqan siyasitige bolghan qarshiliq nahayiti jiddiy'

Birleshme agéntliqining bayan qilishiche, yuqirida nami tilgha élin'ghan yette dölettin bashqa döletlerde, yeni gérmaniye, ispaniye, rusiye, xitay, fransiye, argéntina, jenubiy koriye, yaponiyilerde amérikini qollaydighan adem sani bulturqidin köpeygen. Buning ichide gérmaniye bilen ispaniyide 60%ge yetkenliki, bu döletlerde gerche amérika hökümitining inawiti ösken bolsimu, emma amérikining afghanistan bilen iraqqa qaratqan siyasitige bolghan qarshiliq nahayiti jiddiy ikenliki bir alahidilik.

'Peqet xitaydila 90% adem öz dölitining iqtisadini yaxshi dep pexirlinidu'

Yene bir alahidilik shuki, polsha, xitay, braziliyidin bashqa döletlerde, xelq öz dölitining iqtisadini yaxshi démeydu. Peqet xitaydila 90% adem öz dölitining iqtisadini yaxshi dep pexirlinidu.

'Mutleq köp sanliq dölet iran'gha qarita herbiy emes, iqtisadiy jaza qollinishni qollaydu'

Bu qétimqi ray sinash da'irisidiki mutleq köp sanliq dölet, iran'gha qarita herbiy jehettin emes, belki iqtisadiy jehettin jaza qollinishni qollaydu. Buning ichide 16 dölet, iran bilen herbiy toqunushtin saqlinish kérek dep qaraydu.

'Mékiskida amérikini qollaydighan adem 62% din 44% ge chüshüp qalghan'

Birleshme agéntliqining bayan qilishiche yene, amérikining arizona shitatida qanunsiz köchmenlerge zerbe béridighan qanun maqullinishtin burun, mékiskida amérikini qollaydighan adem 62% bolup, hazir 44% ke chüshüp qalghan.

'Musulmanlarning obamadin ümidsizlinishke bashlighanliqi melum boldi'

Amérika awazining bayan qilishiche, 'péw' tetqiqat merkizining re'isi andiru koxut bügün washin'gtonda, amérika hökümitige we amérika xelqighe, 4‏ -aydin 5‏ - ayghiche 21 dölette élip bérilghan ray sinash ehwalini, bolupmu dunya xelqning amérika hökümitige bolghan köz qarishini ashkara chüshendürdi.

Andiru koxut bu qétimqi ray sinash netijisini tonushturghanda, amérika prézidénti obama 'men amérika xelqning pütün dunyadiki musulmanlargha dostluqini we salamini yetküzgenlikim üchün pexirlinimen"! dégende güldüras alqish lerzige chiqqan idi. Emma bu qétimqi ray sinashta, shuningdin kéyin, dunyadiki musulmanlar uningdin ümidsizlinishke bashlighanliqi melum boldi' dédi.

'Obama isra'iliye bilen pelestin otturisidiki toqunushni yaxshi birterep qilmidi dégen selbiy köz qarash mewjut'

'Péw' tetqiqat merkizining re'isi andiru koxut bu qétimqi ray sinash netijisini tonushturghanda yene 'bu qétimqi ray sinashta ziyaritimizni qobul qilghan musulmanlar ichide, amérikini bir tereplime dölet, herbiy tehdit, afghanistan we iran mesilisini yaxshi bir terep qilmidi dep qarawatqan adem köp, téximu yamini, obamani isra'iliye bilen pelestin otturisidiki toqunushni yaxshi bir terep qilmidi dégen selbiy köz qarash mewjut' dédi.

'Obama dunyada hürmetke sazawer bolsimu, emma uning obrazi hazir dölet ichide mesilige duch kéliwatidu'

Amérika awazi bügün bu heqte élan qilghan xewiride yene 'gerche prézidént obama dunyada omumiy jehettin yenila hürmetke sazawer bolsimu, emma uning obrazi hazir dölet ichide mesilige duch kéliwatidu, amérikida qarshiliq ipadilep namayish qilghan kishiler, bizge sotsi'alizmchi mustebit kérek emes, dégendek shu'arlarnimu towlap qoydi' dep bayan qildi.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet